ރާއްޖެއާ ގާތްގުޅުން އޮންނަ ގައުމުތަކާ ދެމެދު ފިތުނަ އުފެއްދުމަށް އެއްވެސް ފަރާތަކަށް ޖާގަ ނުދެއްވާނެ ކަމަށް ދިވެހިރާއްޖޭގެ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ރައީސް ސޯލިހް މިހެން ވިދާޅުވީ ރައްޔިތުންގެ މަޖިލީހުގެ އިންތިހާބުގައި ނައިފަރު ދާއިރާއަށް ވާދަކުރައްވާ ކެންޑިޑޭޓްގެ ކެމްޕޭން އިފްތިތާހް ކުރުމަށް މިއަދު ހެނދުނު ނައިފަރުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ރައީސް ވިދާޅުވީ މިނިވަންކަމާ އެކު އަޑު އުފުލައި ހިޔާލު ފާޅުކުރުމުގެ ފުރުސަތު މި ސަރުކާރުން އެންމެނަށް ވެސް ލިބިފައި އޮންނާނެކަމަށެވެ. އެހެން ނަމަވެސް ގައުމުގެ މަސްލަހަތު ގެއްލުވައި އަމަން އަމާންކަން ގެއްލުވައި ދޭދޭ ގައުމުތަކުގެ ދޭތެރޭގައި ފިތުނަ އުފައްދަން ކުރާ އެއްވެސް މަސައްކަތަކަށް ޖާގަ ނުދެއްވާނެ ކަމަށެވެ.
ދީނަށް އަންނަ ގޮންޖެހުންތަކާ، އިންޑިޔާ ސިފައިން ރާއްޖޭގައި ގާއިމުވެ ތިބުމާ ގުޅިގެން އާޓިފިޝަލް ބީޗުގައި ރޭ އުމަރު ނަސީރު ވަނީ ޖަލްސާއެއް ބާއްވަން މަސައްކަތް ކުރަައްފައިވައެވެ. މި ޖަލްސާގައި އިންޑިއާ ސިފައިން ރާއްޖޭގައި ތިބި ތިބުމާ، އެކަމުގެ ސަބަބުން ކުރިމަތި ވެފައިވާ ކަންބޮޑުވުންތައް ހިއްސާ ކުރައްވާނެ ކަމަށް ވެސް އުމަރު ވިދާޅުވެފައި ވެއެވެ.
އުމަރު ވިދާޅުވީ އޭނާ މި ޖަލްސާގައި ބައިވެރިވެލައްވާފައި ވަނީ، އިންޑިއާ ސިފައިން ރާއްޖޭގައި ތިބުމާ ދެކޮޅަށް އިހުތިޖާޖުކުރުމަށް ސަރުކާރުން ފުރުސަތު ނުދިނުމުން ކަމަށެވެ.
ރޭ ބާއްވަން އުޅުނު ޖަލްސާ މާލެ ސިޓީ ކައުންސިލުން ވަނީ ހުއްޓުވާފައެވެ.
