ދިވެހިރާއްޖޭގެ ޓޫރިޒަމް ބޮއިކޮޓު ކުރުމަށް ގޮވާލައި އެތައް ކެމްޕޭނެއް ކުރި ޑޭވިޑް ހާޑިންހަމް، ރާއްޖެއައިސް ޓޫރިޒަމް ޕްރޮމޯޓް ކުރުމުގެ ކެމްޕޭނެއް ފަށައިފިއެވެ.
ހާޑިންހަމް ރާއްޖެ އައިސްފައިވަނީ މިހާރު ރާއްޖޭގައި ކުރިއަށް ގެންދާ 'ޕެރެމޯޓާ' ހަރަކާތުގައި ބައިވެރިވުމަށެވެ. މި ހަރަކާތަކީ، ރާއްޖޭގައި ބޭނުންކުރާ ޕްލާސްޓިކްގެ މިންވަރު މަދުކުރުމުގެ ގޮތުން މީހުން ހޭލުންތެރި ކުރުމަށް ހިންގާ ކެމްޕޭނެކެވެ.
ހާޑިންހަމަކީ ރާއްޖޭގައި ކުރިސްޓިއަން ދީން ފަތުރާތީ، މައުމޫން އަބްދުލްގައްޔޫމްގެ ވެރިކަމުގައި ޑީޕޯޓުވެސް ކޮށްލާފައި ހުރި މީހެކެވެ.
އޭގެފަހުން އޭނާ އުފައްދާފައިވާ 'ފްރެންޑްސް އޮފް މޯލްޑިވްސް' ޖަމިއްޔާ އިން ވަނީ ރާއްޖޭގެ ފަތުރުވެރިކަން ބޮއިކޮޓް ކުރުމަށް އެތައް ކެމްޕޭނެއް ހިންގާފައެވެ. އަދި އޭނާ އަކީ "މިނިވަން ރޭޑިއޯ"ގެ ފައުންޑާ މެންބަރެކެވެ. މީގެ އިތުރުން ކުރީގެ ރައީސް ނަޝީދުގެ ވެރިކަމުގައި ސޯލްސްބަރީގައި ހުންނަ ދިވެހިރާއްޖޭގެ އޮނަރަރީ ކައުންސެލްގެ މަގާމުވެސް އޭނާ ފުރާފައިވެއެވެ.
މިދިޔަ އަހަރުގެ ރިޔާސީ އިންތިހާބުގެ ކެމްޕޭނު ދުވަސްވަރު، ރައީސް އިބްރާހިމް މުހައްމަދު ސޯލިހުގެ ކެމްޕޭނު ޓީމަކާއެކު، 'ޖަޒީރާ ރާއްޖެ' ޓީޝާޓު ލައިގެން އޭނާ ހުއްޓާ، ނަގާފައިވާ ފޮޓޯތަކެއްވެސް ޓްވިޓާގައި އާންމުވެފައި ވެއެވެ.
