ފަލަސްތީނުގެ ހަމާސް ޖަމާއަތުން ގާޒާގައި ވެރިކަންކުރަމުން އައި އިދާރާ އުވާލައިފިކަން އިއުލާނު ކޮށްފިއެވެ. މިއީ ހަނގުރާމައިގެ ސަބަބުން ވީރާނާވެފައިވާ ގާޒާ ހިންގުމާ ޓެކްނޮކްރެޓިކް ކޮމިޓީއަކުން ހަވާލުވުމަށް މަގުފަހިކުރުމުގެ ގޮތުން އެޅި ފިޔަވަޅެއް ކަމަށް އަލްޖަޒީރާއިން ރިޕޯޓުކޮށްފައި ވެއެވެ.
ގާޒާގެ ސަރުކާރުގެ މީޑިއާ އޮފީހުން ހޯމަ ދުވަހު ނެރުނު ބަޔާނަކާ ހަވާލާދީ އަލްޖަޒީރާއިން ބުނެފައިވަނީ، ސަރުކާރުގެ އިމަޖެންސީ ކޮމިޓީގެ އިސްވެރިޔާ މުހައްމަދު އަލްފައްރާ މަގާމުން އިސްތިއުފާ ދެއްވައި، އެ ކޮމިޓީ އުވާލަން ނިންމަވާފައިވާ ކަމަށެވެ. މިއީ އެއްބަސްވެފައިވާ ކަންކަން ތަންފީޒުކުރުމަށާއި އިދާރީ ބާރުތައް ބަދަލުކުރުމުގެ މަރުހަލާ ފަސޭހަކުރުމަށް އެޅި ފިޔަވަޅެއް ކަމަށް އެ ބަޔާނުގައިވެއެވެ.
އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ހަމާސްގެ ތަރުޖަމާނު ހާޒިމް ގާސިމް ވިދާޅުވި ގޮތުގައި، ހަމާސްއިން މިހާރު ގާޒާގެ ކަންކަމާ ހަވާލުވެ ނުތިބޭނެއެވެ. އަދި މިއީ އިޒްރޭލުން ކުރަމުންދާ ހަނގުރާމަ ކުރިއަށް ގެންދިއުމަށް ދައްކާނެ ބަހަނާ ނައްތާލުމުގެ ގޮތުން އެޅި ފިޔަވަޅެއް ކަމަށް އޭނާ ފާހަގަކުރެއްވިއެވެ. މީގެ އިތުރުން، ގާޒާ ހިންގުމަށް އެކުލަވާލާފައިވާ ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ގާޒާ (އެންސީއޭޖީ) އަށް ސަރުކާރު ހިންގުމުގެ ޒިންމާތައް ހަވާލުކުރުމަށް ހަމާސްއިން ތައްޔާރަށް އޮތް ކަމަށްވެސް އޭނާ ވިދާޅުވިއެވެ.
ހަމާސްއިން ގާޒާގެ ކޮންޓްރޯލް ނަގާފައިވަނީ 2006 ވަނަ އަހަރު ބޭއްވި ގާނޫނުހަދާ މަޖިލީހުގެ އިންތިހާބު ކާމިޔާބު ކުރުމަށްފަހު، 2007 ވަނަ އަހަރު ފަތަހަ ޖަމާއަތާ ދެމެދު ހިނގި ކުރިމަތިލުންތަކަކަށް ފަހުގައެވެ. ނަމަވެސް، އެމެރިކާ މެދުވެރިވެގެން މިދިޔަ އޮކްޓޯބަރު މަހު ގެނައި ހަމަލާތައް މެދުކަނޑާލުމުގެ އެއްބަސްވުމަށްފަހު، ގާޒާ ހިންގުމުގެ ދުވަހުން ދުވަހުގެ މަސައްކަތްތަކުން ދުރަށް ދިއުމަށް ތައްޔާރަށް އޮތް ކަމަށް ހަމާސްއިން ވަނީ ތަކުރާރުކޮށް ބުނެފައެވެ. އެހެންނަމަވެސް، އެ ޖަމާއަތުގެ ހަތިޔާރު ބޭއްވުމާ ގުޅޭ މައްސަލައަށް އަދި ހައްލެއް ލިބިފައެއް ނުވެއެވެ.
އަލްޖަޒީރާގެ ރިޕޯޓަރު ހާނީ މަހުމޫދު ފާހަގަކުރި ގޮތުގައި، ހަމާސްގެ މި ނިންމުމަކީ ސިޔާސީ ގޮތުން މުހިންމު ނިންމުމެކެވެ. މިއީ މަޝްވަރާތައް ކުރިއަށް ގެންދިއުމަށާއި، ޓެކްނޮކްރެޓިކް ކޮމިޓީއަށް ގާޒާއަށް ވަދެ ޒިންމާތަކާ ހަވާލުވުމަށް މަގުފަހިކުރުމަށް ހަމާސްއިން ދޫދިން ދޫދިނުމެއް ކަމަށް ބެލެވޭ ކަމަށް އޭނާ ބުންޏެވެ. ނަމަވެސް، މީގެ މާނައަކީ ހަމާސްއިން ގާޒާގައި އަދާކުރާ ސިޔާސީ ނުވަތަ އަސްކަރީ ދައުރު ދޫކޮށްލުން ނޫން ކަމަށާއި، މިއީ ހަމައެކަނި މަދަނީ ސަރުކާރު ހިންގުމުން ދުރަށް ޖެހިލުން ކަމަށް އޭނާ ފާހަގަކުރިއެވެ.
އެންސީއޭޖީގެ އިސްވެރިޔާ އަލީ ޝާތު ސޯޝަލް މީޑިއާގައި ވިދާޅުވި ގޮތުގައި، ބޭނުންވާ ވަސީލަތްތަކާއި ގާބިލުކަން ލިބުމާއެކު ގައުމީ ޒިންމާތަކާ ހަވާލުވުމަށް އެ ކޮމިޓީ އޮތީ ފުރިހަމައަށް ތައްޔާރަށެވެ. އެމެރިކާއިން އުފައްދާފައިވާ ބޯޑް އޮފް ޕީސް ފޯ ގާޒާގެ ފަރާތުން އެންސީއޭޖީގެ މަސައްކަތްތައް ބަލަހައްޓަވާ އިސް މަންދޫބު ނިކޮލޭ މިލަޑެނޯވް ވިދާޅުވީ، ހަމާސްގެ މި ނިންމުމަކީ މަޝްވަރާތައް ކާމިޔާބުކަމާއެކު ނިންމާލުމުގެ މުހިންމުކަން އަންގައިދޭ ކަމެއް ކަމަށެވެ. އަދި ތަންފީޒުކުރަން ހުރި ބާކީ ކަންކަމާމެދު އެއްބަސްވުމަކަށް އާދެވުމުން އެންސީއޭޖީއަށް ޒިންމާތަކާ ހަވާލުވެވޭނެ ކަމަށް އޭނާ ވިދާޅުވިއެވެ.
އިޒްރޭލުން ގަބޫލުނުކުރުމުގެ ސަބަބުން އެންސީއޭޖީގެ މެންބަރުން އަދިވެސް ތިބީ ގާޒާއިން ބޭރުގައެވެ. އިޒްރޭލުން ވަނީ ގާޒާގައި ހަމާސްއިން ވެރިކަންކުރުން ބަލައިނުގަންނާނެ ކަމަށް ބުނެފައެވެ. އަދި ހުޅަނގު އައްސޭރި ކޮންޓްރޯލްކުރާ ފަލަސްތީނުގެ އޮތޯރިޓީން ސީދާ ގޮތެއްގައި ގާޒާއާ ހަވާލުވުމަށްވެސް އިޒްރޭލުން މިވަގުތު ދެކޮޅުހަދާ ކަމަށް އަލްޖަޒީރާއިން ރިޕޯޓުކޮށްފައިވެއެވެ.
