ޕޮލިސިސްޓިކް އޯވަރީ ސިންޑްރޯމް ނޫންނަމަ (ޕީސީއޯއެސް) އަކީ ދިވެހީންގެ ތެރޭގައި ވެސް ވަރަށް އާންމު ބައްޔަކަށްވާއިރު ގިނަ މީހުންނަށް ވިސްނިފައި އޮންނަ ގޮތުގައި މިއީ ވަރަށް އާދައިގެ ބައްޔެކެވެ. އެކަމަކު މި ބަލީގެ ވޭނާއި ކެކުޅުންތައް އެންމެ ރަނގަޅަށް ވަޒަންކޮށްލަން އިނގޭނީ މި ބަލި ތަހައްމަލު ކުރަމުންދާ މީހުންނަށެވެ.
ނަމަވެސް މި ލިޔުމުގައި ބައްޔާ ބެހޭ މުހިންމު ބައެއް މައުލޫމާތު ތަކަށް އަލިއަޅުވާލާނަމެވެ. މިއީ ދަރިމައިވުމުގެ އުމުރުފުރައިގެ އަންހެނުންގެ ހަށިގަނޑުގައި ހުންނަ ހޯމޯން ޑިސްއޯޑާއެކެވެ. މި ބަލީގެ ސަބަބުން މެދުވެރިވާ މައިގަނޑު ކަންކަމުގެ ތެރޭގައި މައްސަރުކަންތައް ގަވާއިދުން ނުޖެހުމާއި، މައްސަރުކަންތައް ދިގުލައިގެން ދިއުމުގެ އިތުރުން ފިރިހެން ހޯމޯން ކަމުގައިވާ "އެންޑްރޯޖެން" ހަށިގަނޑުގައި އިތުރުވުން ހިމެނެއެވެ.
ޕީސީއޯއެސް އަލާމާތްތަކުގެ ތެރޭގައި:
- ގަވާއިދުން ޕީރިއަޑް ނުވުން
- ޕީރިއަޑް މުއްދަތު ދިގުލައިގެން ދިއުން
- ބަރުދަން އިތުރުވުން (ހާއްސަކޮށް ބަނޑުގެ ވަށައިގެން)
- ބޮލުގައި ރިއްސުން ނުވަތަ އިސްތަށިގަނޑު ތުނިވުން
- މޫނުމަތީގައި އިސްތަށި ގިނަވުން، މޫނުމަތީ ބިހި ގިނަވުން
- ކަކުލުގައި އަދި އުރަމަތީގެ ދަށުގައި ކަޅު ނުވަތަ ބޯ ހަމުގެ ކުލަތައް ހުރުން
- ހަމުގެ ކުދިކުދި ކޮތަޅުތައް (ސްކިން ޓެގް) ކަރުގެ ފަހަތުގައި ހުރުން
މީގެ އިތުރުންވެސް، ޖިސްމާނީ މި ބަދަލުތަކުގެ އިތުރުން ނަފްސާނީގޮތުންވެސް މީހާއަށް ބޮޑެތި އަސަރުތަކެއް ކުރެއެވެ. އެގޮތުން، އަމިއްލަ ނަފްސަށް އިތުބާރު ކުޑަވެ، ކުދިކުދި ކަންކަމާ މެދު ވަރަށް އަވަހަށް ކަންބޮޑުވެ (އެންޒައިޓީ) އުފެދެއެވެ.
ހަމަ މިއާއެކު، ހިތާމަވެރިކަން އިހުސާސްކުރެވި ޑިޕްރެޝަންގެ ވޭން ތަހައްމަލުކުރަނެ ޖެހެއެވެ. އަދި ބައެއް ފަހަރު ސޯޝަލް އެންޒައިޓީ ފަދަ ކަންކަންވެސް ކުރިމަތިވެ ދިރިއުޅުމުގެ ފެންވަރު ދަށްވެ، އިޖުތިމާއީ ގުޅުންތަކަށްވެސް ނޭދެވޭ އަސަރުތައް ކުރެއެވެ. އެހެންކަމުން މިފަދަ ކަންކަން ސިއްހީ ގޮތުން ދިމާވާނަމަ ޑޮކްޓަރެއްގެ ލަފައާއި އިރުޝާދު ހޯދުމަކީ މުހިންމު ކަމެކެވެ.
ޕީސީއޯއެސް އާއި ބަރުދަން، ވިސްނާލުން މުހިންމު ކަމެއް
ޕީސީއޯއެސްއަކީ ދާއިމީ ފަރުވާއެއް ހޯދިފައިނުވާ ބައްޔަކަށް ވާއިރު، އެންމެ ގިނައިން އަޑުއިވޭ އެއް ވާހަކައަކީ މި ބަލި ހުންނަ ފަރާތްތަކުން ވަރަށް ބޮޑަށް ބަރުދަނަށް ބަލައިގެން އުޅެންޖެހޭ ވާހަކަ އެވެ. ޕީސީއޯއެސް ހުރެފައި ބަރުދަން އިތުރުނަމަ ގާތްގަނޑަކަށް 5-10 އިންސައްތަ ބަރުދަން ލުއިކުރުމުންވެސް މި ބަލީގެ އަލާމާތްތައް ބޮޑުތަނުން ކުޑަ ކޮށްދެ އެވެ.
ޕީސީއޯއެސް ހުންނަ ކޮންމެ މީހަކީ ކޮންމެހެން މިފަދައިން ބަރުދަން އިތުރު މީހެއްވެސް ނޫނެވެ. ހިކިކޮށް ތިބޭ ބައެއް އަންހެނުންނަށްވެސް މިއީ ކުރިމަތިވާ މައްސަލަ އެކެވެ.
ޕީސީއޯއެސް ހުރޭތަ؟ އެހެން ކަމަށްވާނަމަ މި ކާނާތަކާ ދުރުވޭ
1. ރިފައިންޑް ކާނާ - ރިފައިންޑް ކާނާގައި ފައިބަރާއި ނިއުޓްރިއެންޓްސް ނުހުރެއެވެ. މީގެ ސަބަބުން އިންސިއުލިން ރެސިސްޓެންސް މައްސަލަޖެހި، ބަރުދަން އިތުރުވެ، އިންފްލަމޭޝަން އިތުރުވެއެވެ. މިއީ ޕީސީއޯއެސް ގައި އާންމު ކަމެކެވެ. އާދައިގެ ފުށް، ސާބޫދާނާ، ސޫޖީ، ޗިޕްސް، ވޭފާސް، ކުކީސް، ބިސްކޯދު، ބްރެޑް، ޓޯސްޓް، ޕާސްޓާ، ނޫޑުލްސް، މަފިންސް، ކޭކު ފަދަ ތަކެއްޗަކީ ރިފައިންޑް ކާނާގެ މިސާލުތަކެކެވެ. އެހެންކަމުން އެފަދަ ކާނާތަކާ ދުރުވާން ޖެހެއެވެ.
2. ގްލޫޓެން - އެއް ބަރުދަނެއްގެ ދެ އަންހެނުން އަޅާކިޔާއިރު، ޕީސީއޯއެސް ހުންނަ އަންހެނުންގެ ހަށިގަނޑުގައި އިންފްލަމޭޝަން އިތުރުވެފައި ހުރެއެވެ. އަދި ގިނަ ދިރާސާތަކުން ދައްކާގޮތުގައި ކޮންމެ ދުވަހަކު ގޮދަން އަދި ގްލޫޓެން އެކުލެވޭ ކާނާ ކެއުމުން ދިގު މުއްދަތުގެ އިންފްލަމޭޝަން އިތުރުވެއެވެ. މީގެ މާނައަކީ ޕީސީއޯއެސް ހުންނަ އަންހެނުން އެއްކޮށް ގްލޫޓެން ދޫކޮށްލަންޖެހޭ ކަމެއް ނޫނެވެ. ދުވާލަކު އެއް ކެއުމަށް ގޮދަން މަދުކުރުމުންވެސް އިންފްލަމޭޝަން މަދުކުރެވިދާނެއެވެ.
3. ލިކުއިޑް ކެލަރީސް - ޖޫހާއި ސްމޫތީއަކީ ސިއްޙީގޮތުން ރަނގަޅު އެއްޗެހިކަމަށް ހީވެދާނެއެވެ. ނަމަވެސް ބައެއް ފުޅިތަކުގައި ބަންދުކޮށްފައި ހުންނަ ބާވަތްތަކުގައި 15 ގްރާމަށްވުރެ ގިނަ ހަކުރު ހުރެދާނެއެވެ. އަދި ގިނަ ދިޔާ ބުއިންތަކުގައި ފައިބަރު ނުހުންނާތީ ލޭގައި ހުންނަ ހަކުރުގެ މިންވަރު އަވަހަށް މައްޗަށް ދެއެވެ. ލިކުއިޑް ކެލަރީސްއިން ދުވާލަކު 500 ކިލޯ ކެލަރީއަށްވުރެ ގިނައިން ނޭނގި ހަށިގަނޑަށް ވަދެދާނެއެވެ. މިފަދަ ބުއިންތަކުގެ ތެރޭގައި ހިމެނެނީ ސޯޑާ، ޖޫސް، އެނަރޖީ ޑްރިންކްސް، ހަކުރުލީ ސައި، އަދި ކެލަރީ ގިނަ ސްމޫތީތަކެވެ.
ޕީސީއޯއެސް އާއި އިންސުލިން ރެސިސްޓަންސް
ޕީސީއޯއެސްއަކީ މުޅި ހަށިގަނޑުގެ މެޓަބޯލިޒަމް އަށް އަސަރުކުރާ ބައްޔެކެވެ. އޭގެ މައިގަނޑު ސަބަބަކީ އިންސުލިން ރެސިސްޓަންސް ކަމުގަ އެވެ. އިންސުލިން އަކީ ހަށިގަނޑުގައި ވަކިވަރަކަށް ހަކުރުގެ މިންވަރު ހިފެހެއްޓުމަށްޓަކައި އުފައްދާ ހޯމޯނަކަށްވާއިރު އިންސުލިން ރެސިސްޓަންޓް އޭ ބުނެވެނީ ހަށިގަނޑުގައި އާންމުކޮށް އިންސުލިން މަސައްކަތް ކުރާ ވަރަށްވުރެ އޭގެ ބާރު ކުޑަވުމުންނެވެ.
އެހެންކަމުން ހަށިގަނޑުގައި ހަކުރު ކޮންޓްރޯލްކުރުމަށް ވަރަށް ގިނަ އަދަދަކަށް އިންސުލިން އުފައްދަން ޖެހެ އެވެ. އަދި މިއީ މަސްކިއުލިން ހޯމޯންތައް އިތުރުވާ ސަބަބުވެސްމެ އެވެ. ޕީސީއޯއެސްއަކީ ހަކުރު ބައްޔާއި، މާ ބޮޑަށް ފަލަވުން ފަދަ އެތައް ބަލިތަކާއި ގުޅިފައިވާ އަދި އެ ބަލިތަކުގެ ސަބަބުން ދިމާވާ އެހެން މައްސަލަތައް ކަމުގައިވާ ސްލީޕް އެބްނިއާ، ކޮލެސްޓްރޯލް މައްޗަށް ދިއުން، ތައިރޮއިޑް އަދި ބައެއް ފަހަރު ހިތުގެ ބަލިތައްވެސް މެދުވެރިވާ ސަބަބެކެވެ.
މީގެ އިތުރުން ވެސް ޕީސީއޯއެސްގެ ސަބަބުން ލިބޭ ގެއްލުންތައް ވަރަށް ގިނައެވެ. ފަރުވާ ނުކޮށް ދޫކޮށްލުމުން، މި ބައްޔަކީ ދެމިހުންނަ ހާލަތަކަށް ވެގެންދެއެވެ. މާޔޫސްވުމުގެ އިތުރުން، ދޭތެރެ ދޭތެރެއިން މައްސަރު ދިމާނުވުމުގެ ސަބަބުން ރަހިމުގެ ކެންސަރު ޖެހުމުގެ ފުރުޞަތު އިތުރުވެއެވެ. އަދި ލޭ މައްޗަށް ދިއުން، ހަކުރުބަލި (ޓައިޕް 2 ޑައިބެޓީސް)، ކޮލެސްޓްރޯލް މަތިވުން، އަދި ނިދީގައި ނޭވާ ހިފެހެއްޓުން (ސްލީޕް އެޕްނިއާ) ފަދަ ޞިއްޙީ އެހެން މައްސަލަތައް ކުރިމަތިވުމުގެ ފުރުޞަތުވެސް ބޮޑެވެ.
މިކަމުގައި ސިއްހީ މާހިރުންގެ ލަފައާއި އިރުޝާދު ހޯދުމަކީ ވަރަށް މުހިންމު ކަމެކެވެ. ޖިނެކޮލޮޖިސްޓުންނާއި، އެންޑޮކްރިނޮލޮޖިސްޓުންނާއި، އަދި ނިއުޓްރިޝަނިސްޓުންގެ އެހީތެރިކަން ބޭނުންވެދާނެއެވެ. ޕީސީއޯއެސް އަށް ވަކި ފަރުވާއެއް ނެތް ނަމަވެސް، އޭގެ އަލާމާތްތައް ކޮންޓްރޯލްކޮށް، ގެއްލުންތައް ކުޑަކުރުމަށްޓަކައި ގިނަ ކަންތައްތަކެއް ކުރެވިދާނެއެވެ.
މި ބަލިން ރައްކާތެރިވެ ވޭންތައް ލުއިކުރުމަށް ކުރެވިދާނެ ކަންތައްތަކުގެ ތެރޭގައި ހެޔޮ ކާނާގެ އާދަތައް ހިފެހެއްޓުން، ގަވާއިދުން ކަސްރަތުކުރުން، ބަރުދަން ކޮންޓްރޯލްކުރުން، އަދި ދިރިއުޅުމުގެ ވައްޓަފާޅިއަށް ހެޔޮ ބަދަލުތައް ގެނައުން ހިމެނެއެވެ. ބަރުދަން ދަށްކުރުމަކީ ހޯމޯންތަކުގެ ހަމަޖެހުން އަލުން ގެނައުމަށް އެހީތެރިވެދޭ މުހިންމު ކަމެކެވެ. މީގެ އިތުރުން، ޑޮކްޓަރުގެ ލަފަޔާ އެއްގޮތަށް ބޭސް ބޭނުންކުރުން، އަދި ނަފްސާނީ ދުޅަހެޔޮކަން ހިފެހެއްޓުމަށްޓަކައި ޕްރޮފެޝަނަލް އެހީތެރިކަން ހޯދުންވެސް މުހިންމެވެ.
