އަވަށްޓެރި އިންޑިއާގައި ފެތުރެމުންދާ ނިޕާ ވައިރަހުގެ ނުރައްކާ ރާއްޖެއަށް ކުޑަ ނަމަވެސް ހާލަތު މޮނިޓާ ކުރަމުގައި ދެމިތިބޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އިންޑިއާގެ ވެސްޓް ބެންގާލް ސަރަހައްދުން ނުރައްކާތެރި ނިޕާ ވައިރަހުގެ ފަސް ކޭސް ފެނިފައިވާއިރު ރައްކާތެރިކަމުގެ ފިޔަވަޅުތައް ދަނީ ވަރުގަދަ ކުރަމުންނެވެ. އެގޮތުން ނޭޕާލް، ތައިލެންޑް، ޓައިވާން، ހޮންކޮން ފަދަ ބައެއް އެއާޕޯޓުތައް އެލާޓަށް ގެނެސް ޗެކް ކުރުމުގެ މަސައްކަތް ފަށާފައިވާ މި ދަނޑިވަޅުގައި އެޗްޕީއޭއިން މިރޭ މިވަނީ ބަޔާނެއް ނެރެފައެވެ.
ވެސްޓް ބެންގާލްއިން ނިޕާ ވައިރަހަށް ޕޮޒިޓިވްވި މީހުންނާ ކޮންޓެކްޓުވި 180އަށް ވުރެ ގިނަ މީހުން ދެނެގަނެވި އެ މީހުން މިހާރު ކަރަންޓުކޮށްފައިވާކަން ފާހަގަކޮށް އެޗްޕީއޭއިން ބުނީ، ކަރަންޓީނު ކޮށްފައިވާ މީހުންގެ ހާލަތު ދަނީ އެ ގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުންދާ ކަމަށެވެ.
ހަމަ އެހެންމެ ބަލި ޖެހިގެން އިތުރު ކޭސްއެއް މިއަދާ ހަމައަށް ފެނިފައިނުވާއިރު، މި ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން އެ ބަލި ފެނިފައިވާ ކަމުގެ ރިޕޯޓެއް ލިބިފައި ނުވާ ކަމަށް އެޗްޕީއޭއިން ބުނެފައި ވެއެވެ. އަދި މި ވަގުތު ރާއްޖެއަށް މި ބަލީގެ ނުރައްކާ އޮތް މިންވަރު ކުޑަ ނަމަވެސް، އެ އިދާރާއިން ހާލަތު މޮނިޓާ ކުރަމުންދާ ކަމަށް ބުނެފައި ވެއެވެ.
މީގެ އިތުރުން ވެސް ބަލި ފެނިފައިވާ ވެސްޓް ބެންގާލް ސަރަހައްދަށް ދަތުރުކުރާ ފަރާތްތަކުން އެކަމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައިވާއިރު އާންމު ސިއްހަތު ރައްކާތެރިކުރުމަށް އަޅަން ޖެހޭ ފިޔަވަޅުތައް، ކަމާ ގުޅޭ އިދާރާތަކާއި ސިއްހީ ހިދުމަތްދޭ ތަންތަނާ ގުޅިގެން އެ އޭޖެންސީން އަޅަމުންދާ ކަމަށް ވެއެވެ.
ނިޕާ ވައިރަސް އެންމެ ފުރަތަމަ ފެނިފައިވާކަމަށް ރެކޯޑްކުރެވިފައިވަނީ 1998 ވަނަ އަހަރު މެލޭޝިއާއިންނެވެ. ވައިރަސް ފެނިފައިވަނީ އޫރު ގެންގުޅޭ ބައެއްގެ ތެރެއިންނެވެ. މި ވައިރަސް އާއްމުކޮށް ވަރަށް މަދުން ދޭތެރެ ދޭތެރެ ދޭތެރެއިން ފެންނައިރު، މިއީ ބަލިމަޑުކަމަކަށް ގޮސްދާނެ ބައްޔަކަމަށް ދުނިޔޭގެ ސިއްހަތު ޖަމިއްޔާއިން ވަނީ ކަނޑައަޅާފައެވެ.
މި ވައިރަސް ފެތުރެނީ އެވައިރަސްގެ އަސަރު ކޮށްފައިވާ ޖަނަވާރާއި، ތަގައްޔަރުވެފައިވާ ކާބޯތަކެތިންނެވެ. ނިޕާ ވައިރަސް އިންސާނުންގެ ގަޔަށް އަރައިފިނަމަ، އަނެއް މީހާގެ ގަޔަށް ވައިރަސް އެރުމުގެ ފުރުސަތު އޮވެއެވެ. ބަލީގެ އަލާމާތްތަކުގެ ތެރޭގައި ވަރަށް ގަދައަށް ހުންއައުމާއި، ހޮޑުލުން ފާހަގަކޮށްލެވެއެވެ. ނިޕާ ވައިރަސްއަށް އަދި ހާއްސަ ވެކްސިނެއް އުފެއްދިފައެއް ނުވެއެވެ.
