އޭގެ އެންމެ ފުރިހަމަ ގޮތުގައި ހިނގާ، އޮޕަރޭޝަނަލް ވިޔަފާރި ބަނދަރެއްގެ ގޮތުގައި ދ. ކުޑަހުވަދޫ ވިޔަފާރި ބަނދަރު، އެ މަނިކުފާނުގެ ވެރިކަމުގެ މި ދައުރު ތެރޭގައި ހައްދަވައިދެއްވާނެ ކަމުގެ ޔަގީންކަން، ރައީސް ޑރ. މުހައްމަދު މުއިއްޒު ދެއްވައިފިއެވެ.
ދ. ކުޑަހުވަދޫގައި ކޮމާޝަލް ޕޯޓެއް ނުވަތަ ވިޔަފާރި ބަނދަރެއް ތަރައްގީ ކުރުމުގެ އެއްބަސްވުމުގައި ރޭ ވަނީ ސޮއިކޮށްފައެވެ. މި އެއްބަސްވުމުގައި ސޮއި ކުރެއްވީ، މިނިސްޓަރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު އަދި މޯލްޑިވްސް ޕޯޓްސް ލިމިޓެޑްގެ ޗީފް އެގްޒެކެޓިވް އޮފިސަރު އަދި މެނޭޖިންގް ޑައިރެކްޓަރު، މުހައްމަދު ރިޝްވާންއެވެ.
މި މަޝްރޫއަށް އިޝާރާތް ކުރައްވާ، ވާހަކަފުޅު ކުރިއަށް ގެންދަވަމުން ރައީސް ވަނީ ދ. ކުޑަހުވަދޫ ވިޔަފާރި ބަނދަރުގެ މަޝްރޫއަކީ ސަރަހައްދީ ގޮތުން ބަލާއިރު ވަރަށް އެކަށޭނަ، މައުގޫލު މަޝްރޫއެއް ކަމުގައި ސިފަ ކުރައްވާފައިއެވެ. އަދި ސޮއި ކުރެވުނު އެއްބަސްވުމާއެކު ދެންވެސް ހުރި ހުރިހާ ކަމެއް ކުރިއަށް ގެންދެވި، އޭގެ އެންމެ ފުރިހަމަ ގޮތުގައި ހިނގާ، އޮޕަރޭޝަނަލް ބަނދަރެއްގެ ގޮތުގައި މި ވިޔަފާރި ބަނދަރު، މި ދައުރުގެ ތެރޭގައި ހައްދަވައި، ރައްޔިތުންނަށް ދައްކަވާނެކަމުގެ ޔަގީންކަން ރައީސް ދެއްވިއެވެ.
ދ. ކުޑަހުވަދޫގެ ތަރައްގީއަށްޓަކައި އަދުގެ ސަރުކާރުން ކުރަމުން ގެންދާ މަސައްކަތްތަކުގެ މައްޗަށް އަލިއަޅުއްވަމުން ރައީސް ވިދާޅުވީ ރައްޔިތުންނާ ގާތަށް ބޭންކުގެ ހިދުމަތްތައް ގެންދެވުމުގެ ސިޔާސަތު ހަގީގަތަކަށް ހެދެމުގައި ބޭންކް އޮފް މޯލްޑިވްސްގެ ފަރާތުން ވަރަށް ބޮޑު އެއްބާރުލުމެއް ސަރުކާރަށް ލިބެމުން ދާ ކަމުގައެވެ. ދ. ކުޑަހުވަދޫގައި ހިންގާ ބީއެމްއެލް ބްރާންޗްގެ އައު އިމާރާތުގެ ބިންގާ އަޅާފައިވާ އިރު، އެކަމުގެ ސަބަބުން ހިދުމަތް އިތުރަށް ރަނގަޅުވާނެކަން ފާހަގަކުރައްވަމުން ރައީސް ވިދާޅުވީ ރައްޔިތުންގެ އުންމީދުތަކާ ގުޅިފައިވާ ފަދައިން، މި ހިނގާ 2025 ވަނަ އަހަރު ނިމުމުގެ ކުރިން ދ. ކުޑަހުވަދޫއިން ޑޮލަރު އޭޓީއެމްގެ ހިދުމަތް ލިބޭނެ ކަމުގައެވެ.
ދ. ކުޑަހުވަދޫގެ ޢުމްރާނީ ތަރައްގީއާއި ގުޅޭ ގޮތުން ރައީސް ވިދާޅުވީ އެ ރަށު ބަނދަރުގެ މަޝްރޫއަކީ އެންމެ މުހިންމު އެއް މަޝްރޫއު ކަމުގައެވެ. ބަނދަރުގެ ޖާގަ ބޮޑުވެގެން ދިއުމަކީ މަސްވެރިންނާއި ވިޔަފާރިވެރިންގެ އިތުރުން އާންމު ރައްޔިތުންނަށްވެސް މުހިންމު، ދެކޮޅުޖެހެނިވި މަޝްރޫއެއް ކަމުގައި ރައީސް ވިދާޅުވިއެވެ. މި މަސައްކަތްތައް ދާދި އަވަހަށް ފައްޓަވައި، މަޝްރޫއު ނިންމަވައިދެއްވާނީ ރައްޔިތުން އުންމީދުކުރާ ފެންވަރުގައި ކަމުގައިވެސް އެ މަނިކުފާނު ވިދާޅުވިއެވެ.
ދ. ކުޑަހުވަދޫއަކީ ރާއްޖޭގެ 7 ސަރަޙައްދެއްގައި ތަރައްގީކުރާ އއާބަން ސެންޓަރުތަކުގެ ތެރެއިން އެއް މަރުކަޒަށް ވާ ހިނދު، ރަށުގެ ކުނި މެނޭޖު ކުރުމުގެ ހިދުމަތްތައް، މި އަހަރުގެ ޖުލައި މަސް ނިމުމުގެ ކުރިން، ވެމްކޯއިން ފައްޓާނެކަމުގައި ރައީސް ވިދާޅުވިއެވެ.
މީގެ އިތުރުން، ތައުލީމާއި ކުޅިވަރުގެ ރޮނގުންވެސް ދ. ކުޑަހުވަދޫގެ ތަރައްގީއަށްޓަކައި ކުރަން ހުރި ގިނަ ކަންތައްތަކެއް އެބަހުރި ކަމުގައި ރައީސް ވިދާޅުވިއެވެ. އެގޮތުން އިންޑޯ ސްޕޯޓްސް ކޮމްޕްލެކްސްގެ އަމަލީ މަސައްކަތްތައް މި އަހަރު ތެރޭގައި ފަށާނެކަމުގައި ރައީސް ވިދާޅުވިއެވެ. މިކަންކަން ފެށިގެން ދިއުމާއެކު، ދ. ކުޑަހުވަދޫއަށް ކޮށްދެއްވާނެ ކަމަށް ވައުދުވެވަޑައިގެންނެވި ކަންކަން ފުރިހަމަވެގެން ދިޔައީ ކަމަށާ، ނަމަވެސް ވައުދުފުޅުތަކުގެ އިތުރުންވެސް، އާބަން ސެންޓަރެއްގެ ގޮތުގައި ރަށުގެ ތަރައްގީއަށް ބޭނުންވާ އެހެން ކަންކަންވެސް ކޮށްދެއްވާނެ ކަން ހާމަކުރައްވަމުން ރައީސް ވިދާޅުވީ ހޮސްޕިޓަލު މަޝްރޫއަކީވެސް އެފަދަ މަޝްރޫއެއް ކަމުގައެވެ.
ރައީސް ވަނީ، ދ. ކުޑަހުވަދޫގެ ރައްޔިތުންނަށް ކުރިމަތިވެފައިވާ ގެދޮރުގެ މައްސަލައަށްވެސް ހައްލުތަކެއް ގެނެސްދެއްވާނެ ކަމުގައި އިޝާރާތްކުރައްވާފައެވެ. އެގޮތުން ރަށުގެ އެކި ހިސާބުތަކުން އާންމުންނަށް ލިބިފައިވާ ގޯތިތަކުގައި ގެދޮރު އެޅުމުގައި ދަތިތަކާ ކުރިމަތިލާންޖެހިފައި ވާ އިރު، ދ. ކުޑަހުވަދޫގައި ހިންގަން ކަނޑައަޅުއްވާފައިވާ 500 ހައުސިންގް ޔުނިޓް މަޝްރޫއުގެ ތެރެއިން، ރައްޔިތުންގެ އަމިއްލަ ގޯތީގައި 3 ކޮޓަރީގެ ގެއެއް އަޅައިދިނުމަށް އެދި ހުށަހެޅުމުގެ ފުރުސަތު ހުޅުވާލައްވާނެ ކަމަށާ، ފްލެޓް އެޅިގެންދާނީ އަމިއްލަ ގޯތީގައި ގެ އަޅާން އެދޭ ވަކި މިންވަރެއް ހަމަވުމަށް ފަހު ބާކީ އޮތް އަދަދަކަށް ކަމުގައި ރައީސް ވިދާޅުވިއެވެ.
ދ. ކުޑަހުވަދޫއަކީ އާބާދީއާއި ތަރައްގީ އެއްފަސްކުރުމުގައި ލާމަސީލު، ކާމިޔާބީތަކެއް ހޯދާފައިވާ ރަށެއްގެ ގޮތުގައި ރައީސް ފާހަގަކުރެއްވިއެވެ. އެހެން ނަމަވެސް، އާބާދީއާއި ތަރައްގީ އެއްފަސްކުރުމުގައި ކުދިކުދި މައްސަލަތަކެއް ފާހަގަކުރެއްވޭ ކަމަށާ، އެކަންކަމަށްވެސް ދާއިމީ އަވަސް ހައްލެއް ހޯއްދަވައިދެއްވާނެ ކަމުގައި އެ މަނިކުފާނު ވިދާޅުވިއެވެ.
ސަރަޙައްދީ ތަރައްގީގެ ވިސްނުންފުޅުގައި އެންމެ މަތީ ފެންވަރަށް، އާބަން ސެންޓަރުތަކެއްގެ ގޮތުގައި ދ. ކުޑަހުވަދޫވެސް ހިމެނޭނެހެން 7 ރަށެއް ތަރައްގީ ކުރައްވާން ވެވަޑައިގެންނެވި ވައުދުފުޅަށް އިޝާރާތްކުރައްވާ، ރައީސް ވަނީ، އެއީ ނަމެއްގައި ކުރެއްވި ކަމެއް ނޫން ކަމުގައެވެ. ހިތްޕުޅުގެ އެންމެ ފުން މިނުން، އެ ކަމެއް ކުރެއްވުމުގެ އަޒުމާއި، ނިޔަތާއި، އެކަމެއް ކުރެއްވޭނެ ކަމުގެ ފުރިހަމަ ޔަގީންކަމާއެކުގައި ނޫނީ ރައްޔިތުންނާ މުހާތަބު ނުކުރައްވާނެ ކަމުގައިވެސް ރައީސް ވިދާޅުވިއެވ.
ދ. ކުޑަހުވަދޫގެ ރައްޔިތުންނާ ބައްދަލުކުރައްވާ، ރައީސުލްޖުމްހޫރިއްޔާ ދެއްކެވި ވާހަކަފުޅު ނިންމަވާލައްވާފައި ވަނީ އުމްރާނީ އަދި މާއްދީ ތަރައްގީއާއެކު ފިކުރީ ތަރައްގީ ހާސިލު ކުރުމަށް މުހިންމު އިލްތިމާސެެއް ކުރައްވަމުންނެވެ.
