ސިޔާސީ ޕާޓީން ވަކިކުރުމުން އެ ޕާޓީއެއްގެ ސްލޮޓެއްގައި ރައްޔިތުންގެ މަޖިލީހުގެ މެންބަރުކަން ކުރަމުންދާ މެންބަރުގެ ގޮނޑި ގެއްލޭގޮތަށް ފާސްކުރި އިސްލާހު ހިމެނޭހެން، ގާނޫނުއަސާސީ އަށް އިސްލާހުތައް ބާތިލްކުރުމަށް އެދި ސުޕްރީމް ކޯޓަށް ހުށަހެޅި މައްސަލައިގެ އަޑުއެހުންތައް އަންނަ މަހު ފަށަން ތާވަލުކޮށްފިއެވެ.
ވެރިކަންކުރާ ޕީއެންސީގެ ފަރާތުން ހުށަހަޅައި ރައްޔިތުންގެ މަޖިލީހުން ފާސްކުރި އިސްލާހުތައް ބާތިލްކުރުމަށް އެދި ސުޕްރީމް ކޯޓަށް ހުށަހެޅުއްވީ ގާނޫނީ ވަކީލު އަދި ކެންދޫ ދާއިރާގެ މެންބަރު އަލީ ހުސައިނެވެ.
މި މައްސަލައިގެ ފުރަތަމަ އަޑުއެހުން ތާވަލުކޮށްފައި ވަނީ އަންނަ މަހުގެ 17 ވަނަ ދުވަހަށެވެ. ފާހަގަކުރެވޭ ގޮތުގައި މި މައްސަލައިގެ ތެރެޔަށް ޑިމޮކްރެޓުންނާއި މައި އިދިކޮޅު ޕާޓީ އެމްޑީޕީން ވެސް ވަނީ ތަދައްހުލުވެފައެވެ.
ޕީއެންސީގެ ފަރާތުން މަޖިލީހަށް ހުށަހަޅައި ފާސްކޮށް މިހާރު އަމަލުކުރަމުންދާ އިސްލާހުގައިވާ ގޮތުން ތިރީގައިވާ ތިން ހާލަތަކުން ކުރެ އެއް ހާލަތެއް މެދުވެރިވެއްޖެ ނަމަ މަޖިލީހަށް އިންތިހާބުވާ މެންބަރުން ވަކިވާނެއެވެ. އެއީ:
- ވަކި ޕާޓީއަކުން ވާދަކޮށް މެންބަރުކަމަށް އިންތިހާބުވާ ފަހުން އެ މެންބަރަކު އެ ޕާޓީއަކުން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އެ މެންބަރަކު މިހާރު ތަމްސީލުކުރާ ޕާޓީން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އަމިއްލަގޮތުން ވާދަކޮށް އިންތިހާބުވާ މެންބަރުން ސިޔާސީ ޕާޓީއަކާ ގުޅުމުން
މީގެ އިތުރުން ވެސް ޕީއެންސީން ހުށަހަޅައި ފާސްކޮށް އަމަލުކުރަމުންދާ އިސްލާހުތަކަކީ:
- ގައުމީ ތަރައްގީގެ ޕްލޭންތަކާއި ތަސައްވުރުތައް އެކުލަވާލުމުގެ ބާރުތައް ރައީސުލްޖުމްހޫރިއްޔާ އަށް ލިބޭ ގޮތަށް ހެދުން
- މަޖިލީހުގެ ފުރިހަމަ އަޣުލަބިއްޔަތުން ފާސްވެގެން ނޫނީ އަސްކަރީ ބޭނުމަކަށް ރާއްޖޭގައި އެއްވެސް ސަރަހައްދެއްގައި ބޭރުގެ ސިފައިންނަށް ހަރަކާތްތެރިވެވޭނެ ގޮތް ހެދުން
