ބޮލީވުޑްގެ ތަރި ސައިފް އަލީ ހާނަށް ވަޅިން ހަމަލާދީ ޒަހަމް ކޮށްލައިފިއެވެ.
އެކްޓަރު ސައިފަށް ހަމަލާދީފައި ވަނީ ރޭ ދަންވަރުގެ ވަގުތެއްގައި އޭނާ ދިރިއުޅެމުންދާ މުމްބާއީގެ ގެއަށް ވައްކަން ކުރަން ވަދެ އުޅުނު މީހެއް ކަމަށް ބޭރުގެ ނޫސްތަކުގައި ވަނީ ރިޕޯޓު ކޮށްފައެވެ. އޭނާ ސައިފަށް ވަޅިން ހަމަލާދީ ޒަހަމް ކޮށްލާފައި ވާއިރު ސައިފަށް ހަ ޒަހަމެއް ލިބިފައިވާ ކަމަށާއި އޭގެ ތެރެއިން ފުންކޮށް ދެ ޒަހަމެއް ލިބިފައިވާކަމަށް ހޮސްޕިޓަލާ ހަވާލާދީ ބޭރުގެ ނޫސްތަކުގައި ވަނީ ރިޕޯޓުކޮށްފައެވެ.
އެކްޓަރު ސައިފް ފަރުވާއަށް ގެންގޮސްފައިވަނީ މުމްބާއީގެ ލިލަވަތީ ހޮސްޕިޓަލަށެވެ. ޒަހަމްތަކާއި ގުޅިގެން ސައިފް 2 ގަޑީރަށްވުރެ ދިގު ސާޖަރީއެއް ކުރަން ޖެހުނު ކަމަށާއި ސާޖަރީއަށް ފަހު ސައިފްގެ ހާލަތު ރަނގަޅު ވަމުން އަންނަ ކަމަށް ބީބީސީގައި ވަނީ ރިޕޯޓުކޮށްފައެވެ.
މި މައްސަލަ ފުލުހުން ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށާއި އަދި މިހާތަނަށް އެއްވެސް މީހަކު ހައްޔަރު ކޮށްފައި ނުވާކަމަށް ފުލުހުންނާ ހަވާލާދީ ވަނީ ރިޕޯޓުކޮށްފައެވެ.
ފާހަގަކޮށްލެވޭ ގޮތުގައި ސައިފް އަކީ ބޮލީވުޑްގެ މަޝްހޫރު ބަތަލާ ކަރީނާ ކަޕޫރުގެ ފިރިމީހާއެވެ. މި ކައިވެންޏަށް ދެ ދަރިންވެސް ވަނީ ލިބިފައެވެ. ސައިފް ބޮލީވުޑަށް ތައާރަފްވެފައިވަނީ 1993 ވަނަ އަހަރު ރިލީޒްކުރި "ޕަރަމްޕަރާ" ފިލްމުން ނެވެ.
ސައިފް އަށް ދިން މި ހަމަލާއާއި ގުޅިގެން އޭނާއަށް ތާއީދުކުރާ ގިނަ އަދަދެއްގެ ބަޔަކު އަންނަނީ ސޯޝަލް މީޑިއާގައި ކަންބޮޑުވުން ފާހަގަކުރަމުންނެވެ.
