ކޮންސްޓްރަކްޝަން މިނިސްޓްރީއާއި ހައުސިން މިނިސްޓްރީ އެއްކޮށްލާ ވަޒީރުންގެ މަޖިލީހަށް ބޮޑު ބަދަލެއް ރައީސް ޑރ. މުހައްމަދު މުއިއްޒު ގެންނަވައިފިއެވެ.
ރައީސް އޮފީހުން ބުނީ ވަޒީރުންގެ މަޖިލީހަށް ޢައްޔަންކުރެއްވި ބޭފުޅުންނަށް މަގާމުގެ ފަތްކޮޅު ދެއްވުމަށް މިއަދު ހެނދުނު ރައީސް އޮފީހުގައި ރަސްމިއްޔާތެއް ބާއްވާފައިވާކަމަށެވެ. އަދި މި ފަރާތްތަކަށް ވަޒީރުންގެ މަޖިލީހުގެ މެންބަރުކަމުގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އަލީ ރަޝީދު ހުސައިން ކަމަށްވެސް ރައީސް އޮފީހުން ވަނީ ބުނެފައެވެ.
ވަޒީރުންގެ މަޖިލީހަށް ގެނައި ބަދަލުތަކުގެ ތެރޭގައި ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީ އެއްކޮށްލާފައިވާއިރު މި މިނިސްޓްރީގެ ހިންގުން ހަވާލުކުރެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އާއެވެ.
މީގެއިތުރުން ފިނޭންސް މިނިސްޓްރީ އާއި ޕްލޭނިން މިނިސްޓްރީން އެއްކޮށްލާ މިނިސްޓްރީ އޮފް ފިނޭންސް އެންޑް ޕްލޭނިން އަށް ވަނީ ބަދަލުކޮށްފައެވެ. މި މިނިސްޓްރީ ހިންގަވަން ހަވާލުކޮށްފައިވަނީ މިނިސްޓަރު މޫސާ ޒަމީރު އާއެވެ.
ރައީސް ގެންނެވި ބަދަލުތަކުގެ ތެރޭގައި ހައުސިން މިނިސްޓަރުކަމުގައި ހުންނެވި ޑރ. އަލީ ހައިދަރު، ހަޔާ އެޑިއުކޭޝަން މިނިސްޓަރުކަމަށް ބަދަލުކުރެއްވުމާއި އަދި ހަޔާ އެޑިއުކޭޝަން މިނިސްޓަރުކަމުގައި ހުންނެވި ޑރ. މަރިޔަމް މާރިޔާ، އެގްރިކަލްޗާ މިނިސްޓަރުކަމަށް ބަދަލުކުރެއްވުން ވެސް ހިމެނެއެވެ.
ފާހަގަކޮށްލެވޭ ގޮތުގައި ރައީސް ޑރ. މުއިއްޒު ވަނީ މީގެ ކުރިންވެސް ވަޒީރުންގެ މަޖިލީހަށް ބަދަލު ގެންނަވާފައެވެ. އެގޮތުން މި ސަރުކާރުގައި ފުރަތަމަ ފޮރިން މިނިސްޓަރަކަށް ހުންނެވި މޫސާ ޒަމީރު ފިނޭންސް މިނިސްޓަރަކަށް ވަނީ ބަދަލު ކުރައްވާފައެވެ. މިހާރު ފޮރިން މިނިސްޓަރުކަމުގައި ހުންނެވި ޑރ. އަބްދުﷲ ހަލީލް ވެސް ފުރަތަމަ އައްޔަންކުރެއްވީ ހެލްތު މިނިސްޓްރީއަށެވެ. ފަހުން ހެލްތު މިނިސްޓަރަކަށް އައްޔަންކުރެއްވީ ކުރިން ރައީސް އޮފީހުގައި ހުންނެވި ކުރިން ވެސް ހެލްތު މިނިސްޓަރުކަން ކުރެއްވި އަބްދުﷲ ނާޒިމެވެ.
