ރާއްޖޭގެ ޒަކާތު ފަންޑުން ގާޒާގެ ރައްޔިތުންނަށް ހަދިޔާކުރަން ނިންމާފައިވާ 100،000 ޑޮލަރު، ގަތަރު ރެޑް ކްރެސެންޓް ސޮސައިޓީ އާއި ހަވާލުކުރުމަށް އިސްލާމީ ކަންތައްތަކާ ބެހޭ ވުޒާރާއާއި ގަތަރު ރެޑް ކްރެސެންޓް ސޮސައިޓީ އާއި ދެމެދު އެއްބަސްވުމުގައި ސޮއިކުރައްވައިފިއެވެ.
އޮންލައިންކޮށް ކުރިއަށް ގެންދިޔަ ސޮއިކުރުމުގެ ހާއްސަ ރަސްމިއްޔާތުގައި ވުޒާރާގެ ފަރާތުން ސޮއިކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދުއެވެ. އަދި ގަތަރު ރެޑްކްރެސެންޓް ސޮސައިޓީގެ ފަރާތުން ސޮއިކުރެއްވީ ސެކްރެޓަރީ ޖެނެރަލް ފައިސަލް މުހައްމަދު އަލްއެމަދީއެވެ.
މި ފައިސާ ގަތަރު ރެޑް ކްރެސެންޓް ސޮސައިޓީއާއި ހަވާލުކުރުމަށް ހަމަޖެހިފައިވަނީ ދެ ފިޔަވައްސަކަށް ބަހާލައިގެންނެވެ.
ޒަކާތު ހައުސްގެ ފަރާތުން ފޮނުވާ އެއް ލައްކަ ޑޮލަރު ހަރަދުކުރުމަށް ހަމަޖެހިފައިވަނީ ގާޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ގަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއުއަށެވެ. މިއީ ޒަކާތު ފަންޑުން ރާއްޖޭން ބޭރުގެ ފަރާތަށް އެހީތެރިކަން ފޯރުކޮށްދޭ ފުރަތަމަ ފަހަރުކަން ފާހަގަކޮށްލެވެއެވެ.
ގާޒާގެ ރައްޔިތުންނަށް އެހީވުމުގެ ގޮތުން ރައީސްގެ އިސްނެންގެވުމުގެ މަތިން މިދިޔަ ޖޫން މަހު ވަނީ "ފަލަސްތީނާއެކު ދިވެހިން" ގެ ނަމުގައި ޓެލެތޯންއެއްވެސް ކުރިއަށް ގެންގޮސްފައެވެ. ޕީއެސްއެމްގައި ކުރިއަށް ގެންދިޔަ މި ޓެލެތޯން ކުރިއަށް ގެންގޮސްފައި ވަނީ ފަންޑު ފޮށީގެ އިތުރުން އޮންލައިން ޓްރާންސްފާވެސް ކުރެވޭ ގޮތަށެވެ.
އެ ޓެލެތޯންގައި ލިބުނު 19 މިލިއަނަށް ވުރެ ގިނަ ރުފިޔާ މިހާރު ފަލަސްތީން ރައްޔިތުންނަށް ހަދިޔާކޮށްފައިވާއިރު ފަލަސްތީނަށް އެހީވުމަށް ހާއްސަކޮށްފައިވާ އދ ގެ ރިލީފް ފަންޑަށް ދިވެހި ސަރުކާރުން ކޮންމެ އަހަރަކު ދެމުން އަންނަ ފައިސާގެ އެހީ ދިހަ ގުނަ އިތުރުކޮށް، މިއަހަރުން ފެށިގެން 50 ހާސް ޑޮލަރު ހަދިޔާ ކުރުމަށް އެ ދުވަހު ކުރިއަށް ގެންދިޔަ ޓެލެތޯންގައި ރައީސް ވަނީ ނިންމަވާފައެވެ.
