މިހާރު ގާނޫނުއަސާސީއަށް ގެނެވިފައިވާ އިސްލާހުތަކާއެކު، ރައްޔިތުންގެ މަޖިލީސް ބޭނުންކޮށް ރައީސުލްޖުމްހޫރިއްޔާ ބޭނުންފުޅުވާނަމަ ވެރިކަމުގެ ދެން ތިބި ދެ ބާރުގެ ވެރިން މަގާމުން ދުރުކުރުވޭނެކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިއަދު އެމްޑީޕީއިން ބޭއްވި ނޫސްވެރިންގެ ބައްދަލުވުމުގައި ޝާހިދު ވަނީ ގާނޫނު އަސާސީއަށް އިއްޔެ ގެނައި އިސްލާހުތަކާއި ގުޅިގެން ކަންބޮޑުވުންފާޅުކޮށްފައެވެ. އަދި އެއީ ރާއްޖޭގައި ޑިމޮކްރަސީގެ 'އިރުއޮއްސިގެން' ދިއުންކަމުގައި ސިފަކުރައްވަމުން ޝާހިދު ވިދާޅުވީ މަޖިލީހުން ފާސްކުރި އިސްލާހުތަކަކީ ޑިމޮކްރަޓިކް ހަމަތަކަކުން ކުރިއަށް ދިޔަ ކަންކަމެއް ނޫން ކަމަށެވެ. ގާނޫނު އަސާސީގެ މުޅި މަފްހޫމަކީ ރައްޔިތުންނާއި މަޝްވަރާކޮށްގެން ކަންކަން ނިންމުން ކަމަށާއި އިއްޔެ ގަނައި ބަދަލުތަކާ މެދު ރައްޔިތުން ދެކޭ ގޮތް ހާމަކުރުމުގެ ފުރުސަތު ދޭންޖެހޭކަމަށް ޝާހިދު ވިދާޅުވިއެވެ.
ރާއްޖޭގައި މަޝްވަރާގެ އުސޫލުން ކަންކަން ކުރުމުގެ ވައްޓަފާޅިިއެއް ހިންގަން ފެށީ 2009 ވަނަ އަހަރުގެ ރައްޔިތުންގެ މަޖިލީހާއި ހަމައިންކަން ފާހަގަކުރައްވަމުން ޝާހިދު ވިދާޅުވީ މިހާރު ގާނޫނުއަސާސީއަށް ގެނަައި ބަދަލުތަކަކީ އެ މަގުން ދިޔަ ކަންކަމެއް ނޫންކަމަށާއި ބޭނުންވާ ހުރިހާ ގޮތަކަށް ކަންކަން ކުުރުމަކީ ޑިމޮކްރަސީއެއް ނޫންކަމަށެވެ.
މީގެ އިތުރުން ޝާހިދު ވިދާޅުވީ މިހާރު ގާނޫނުއަސާސީއަށް ގެނެވިފައިވާ އިސްލާހުތަކާއެކު، ރައީސުލްޖުމްހޫރިއްޔާ ބޭނުންފުޅުވާއިރެއްގައި މަޖިލީހުގެ ރައީސާއި އުއްތަމަފަނޑިޔާރު ވަކި ކުރެވޭނެކަމަށެވެ. އެހެންކަމުން މިހާރު އެ ދެ ބާރުގެ ވެރިން ތިއްބަވަން ޖެހޭނީ ރައީސްގެ މުށުތެރޭގައިކަމަށް ޝާހިދު ވަނީ ސިފަކުރައްވާފައެވެ.
