ސަބްސިޑީ އަށް ގެންނަ ރިފޯމުތަކާއެކު 70 އިންސައްތަ ގޭބިސީތަކަށް ސަބްސިޑީގެ އެހީތެރިކަން ފޯރުކޮށްދެވިގެންދާނެ ކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
ހީނާ ވިދާޅުވީ ފޯރުންތެރިކަން ހުރި މިންވަރަށް ބަލާ 2025 ވަނަ އަހަރުގެ އޭޕްރީލް މަހުން ފެށިގެން ސަބްސިޑީ ދޭން ފަށާނެ ކަމަށާއި، އާމްދަނީ އާއި ދިރިއުޅުމުގެ ހާލަތުގެ މައުލޫމާތު ހޯދަން އޭގެ ކުރިން ހުޅުވާލާނެ ކަމަށެވެ. އަދި ސަބްސިޑީ ދޭނީ އެ މައުލޫމާތުތަކަށް ބަލާ ވަކި ވަރަކަށް މަތިން ސްކޯ ލިބޭ ގޭބިސީތަކަށް ކަމަށްވެސް ހީނާ ވަނީ ވިދާޅުވެފައެވެ.
މީގެއިތުރުން ހީނާ ވިދާޅުވީ ސަބްސިޑީ އަށް ގެންނަ މި ރިފޯމުތަކާއެކު އާބާދީގެ 60-70 އިންސައްތަ ގޭބިސީތަކަށް ސަބްސިޑީގެ އެހީތެރިކަން ލިބިގެންދާނެ ކަމަށެވެ.
ފިނޭންސް މިނިސްޓްރީ އިން ބުނީ ސަބްސިޑީ އަށް ގެންނަ ރިފޯމުތަކާއެކު ރާއްޖޭގެ އާބާދީގެ އެންމެ ފަގީރު 20 އިންސައްތަ ގޭބީސީތަކުގެ މަހެއްގެ ހަރަދަށް 1،770ރ އިތުރުވާނެ ކަމަށް ލަފާ ކުރެވޭ ކަމަށެވެ. ފިނޭންސް މިނިސްޓްރީގެ ހިސާބުތައް ދައްކާގޮތުން، އެންމެންނަށް އެއް ހަމައެއްގައި މިހާރު ސަބްސިޑީ ދޭއިރު 43 ޕަސެންޓު ބެހިފައިވަނީ އެންމެ މުއްސަނދި އާބާދީގެ 40 ޕަސެންޓަށެވެ.
ފާހަގަކޮށްލެވޭ ގޮތުގައި އެންމެ ބޭނުން ޖެހިފައިވާ މީހުންނަށް އެ އެހީ ދޭން ދައުލަތުގެ އަންނަ އަހަރުގެ ބަޖެޓުގައި ވަނީ 900 މިލިއަން ރުފިޔާ ކަނޑައަޅާފައެވެ. އެގޮތުން ސަރުކާރުން ވަނީ ސަބްސިޑީގެ އެހީ ބޭނުންވާ ފަރާތްތަކަށް ސީދާ ގޮތެއްގައި ސަބްސިޑީ ފޯރުކޮށްދޭ ނިޒާމަކަށް ބަދަލުކުރަން ނިންމާފައެވެ.
