ގާޒާގެ އުތުރުގެ އަވަށެއް ކަމަށްވާ ބެއިތުލަހިޔާގައި އާންމުން ދިރިއުޅޭ އިމާރާތްތަކަކަށް އިޒްރޭލުން ދިން ވައިގެ ހަމަލާތަކުގައި ފަލަސްތީނުގެ 93 މީހުން ޝަހީދު ވެއްޖެއެވެ.
އިޒްރޭލުގެ އަސްކަރިއްޔާ އިން މިއަދު ހެނދުނު ދިން ގިނަ ވައިގެ ހަމަލާތަކުން ގިނަ ބަޔަކު ދިރިއުޅެމުން ދިޔަ އިމާރާތްތަކެއް ވަނީ ފުނޑުފުނޑު ކޮށްލާފައެވެ. ކުޑަކުދިންނާއެކު 200 އެއްހާ މީހުން އެ އިމާރާތްތަކުގެ ތެރޭގައި ދިރިއުޅޭނެ ކަމަށް ރިޕޯޓްތަކުން ބުނެއެވެ. އެ ސަރަހައްދުގައި ތިބި މީހުންގެ ތެރޭގައި ގެދޮރު ގެއްލިގެން އެ ސަރަހައްދަށް ދިޔަ އެތައް ބަޔަކު ހިމެނޭ އިރު، މިއަދު ހެނދުނު ދިން ހަމަލާގައި މަރުވި ބައެއް މީހުންނަކީ އެތަނަށް އިއްޔެ ހިޖުރަކުރި ބައެއް ކަމަށް ވެސް ރިޕޯޓްތައް ބުނެއެވެ.
ގާޒާގެ އުތުރުގެ އެކި ސަރަހައްދުތަކަށް ދިން ހަމަލާގައި މިއަދު ޝަހީދުވި މީހުންގެ އަދަދު 109 އަށް އަރާފައިވާ ކަމަށް އަލްޖަޒީރާ ނޫހުން ރިޕޯޓް ކޮށްފައިވާ އިރު، މީގެ 4 ގަޑިއިރު ކުރިން ގާޒާގެ ހެލްތް މިނިސްޓްރީން އާންމުކުރި މައުލޫމާތުގައި ބުނެފައި ވަނީ ބެއިތުލަހިޔާއިން ޝަހީދުވި މީހުންގެ އަދަދަކީ 93 ކަމަށާއި އޭގެތެރޭގައި ގިނަ އަދަދެއްގެ ކުޑަކުދިން ހިމެނޭ ކަމަށް ބުނެފައި ވެއެވެ.
ރޮއިޓާސް އިން އާންމުކޮށްފައި ވީޑިއޯ ފުޓޭޖުން ފެންނަ ގޮތުގައި، ބޮން ގޮއްވާލި ހަތަރު ބުރީގެ އިމާރާތެއްގެ ބޭރުގައި ބިންމަތީގައި އެތައް ހަށިގަނޑެއް ބްލޭންކެޓް އޮޅާލާފައި ހުއްޓެވެ. ޒަހަމްވެފައިވާ މީހުންނަށް އެހީތެރިކަން ފޯރުކޮށް ދިނުމަށް އާންމުން އުޅޭ އިރު، ގާކުނޑިތަކުގެ ދަށުން އިތުރު ހަށިތަކާއި ސަލާމަތްވި މީހުން ހޯދުމުގެ މަސައްކަތް ދަނީ ކުރަމުންނެވެ.
މި ހާދިސާއާ ގުޅިގެން ގާޒާގެ ހެލްތް މިނިސްޓްރީން ބުނެފައި ވަނީ، މި ހާދިސާގައި ޒަހަމްވި މީހުންނަށް ފަރުވާ ނުދެވުނީ ކައިރީގައި ހުރި ކަމަލް އަދްވާން ހޮސްޕިޓަލް ހުސްކުރަން ޑޮކްޓަރުންނަށް މަޖުބޫރު ވެފައިވާތީ ކަމަށެވެ.
ގާޒާގެ ފީލްޑް ހޮސްޕިޓަލްތަކުގެ ޑިރެކްޓަރު މަރުވާން އަލް ހަމްސް ވިދާޅުވި ގޮތުގައި، ގާޒާގެ އުތުރުގައި ހުންނަ ކަމާލް އަދްވާން ހޮސްޕިޓަލުގައި ތިބީ ހަމައެކަނި ކުޑަކުދިންގެ ދެ ޑޮކްޓަރުން ކަމަށެވެ. އެއްވެސް ސާޖަނެއް އެ ހޮސްޕިޓަލުގައި ނެތް ކަމަށާއި މެޑިކަލް ސާމާނު ވެސް ނެތް ކަމަށެވެ.
އިޒްރޭލުން ގާޒާގެ އުތުރުގެ ސަރަހައްދު ވަށާލައި ބޮން އަޅާތާ މިއަދަށް 25 ދުވަސް ވެފައިވާ އިރު، ބައިތުލަހިޔާއަށް މިއަދު ހެނދުނު އިޒްރޭލުން ހަމަލާ ދީފައި މި ވަނީ އިޒްރޭލުން ވަށާލާފައިވާ ގާޒާގެ އުތުރުގެ ސަރަހައްދު ޖަބަލިއާ، ބެއިތުލަހިޔާ އަދި ބެއިތުހަނޫންގައި ގާތްގަނޑަކަށް ލައްކައެއްހާ މީހުން ތާށިވެފައި ތިއްބައެވެ. މެޑިކަލް ނުވަތަ ކާބޯތަކެތީގެ ސާމާނު އެ ސަރަހައްދުގައި ނެތް އިރު އެ ސަރަހައްދަށް އެހީގެ ތަކެތި ގެނައުމަށް އިޒްރޭލު ސިފައިން ދެކޮޅު ހަދަމުން އަންނަތާ ހަފްތާތަކެއް ވެއްޖެއެވެ.
ހުއްޓުމެއް ނެތި މި ވޭތުވެ ދިޔަ އަހަރު ދުވަހު ގާޒާއަށް ހަމަލާ ދެމުން އަންނަ އިރު، މިހާތަނަށް ގާޒާއިން ޝަހީދުވި މީހުންގެ ޖުމްލަ އަދަދު ވަނީ 43،020 އަށް އަރާފައެވެ. އޭގެތެރެއިން ޝަހީދުވި ކުޑަކުދިންގެ އަދަދަކީ 16750 ކަމަށް ރިޕޯޓް ތަކުން ބުނާ އިރު، 10،000 އަށް ވުރެ ގިނަ މީހުން ގެއްލިގެން ވަނީ ރިޕޯޓް ކޮށްފައެވެ. މި ވޭތުވެ ދިޔަ އަހަރު ދުވަހުގެ ތެރޭގައި ގާޒާއިން ޒަހަމްވި މީހުންގެ އަދަދު ވެސް މި ވަނީ 101،110 އަށް އަރާފައެވެ.
ހަމައެއާއެކު އިޒްރޭލުން ހިފާފައިވާ ވެސްޓް ބޭންކުން މިހާތަނަށް 763 މީހަކު ޝަހީދުވެފައިވާ އިރު، އޭގެތެރޭގައި 166 ކުޑަކުދިން ހިމެނެއެވެ. އެ ސަރަހައްދުން ޒަހަމްވި މީހުންގެ އަދަދު ވަނީ 6250 އަށް އަރާފައެވެ.
