އިޒްރޭލުގެ ޓޭންކަރުތައް ގާޒާގެ އުތުރުގެ ދެ އަވަށަކާއި ރެފިއުޖީ ކޭމްޕަކަށް ވަދެފައިވާ އިރު، އެ ސަރަހައްދުގައި އާންމުންގެ 100،000 އެއްހާ މީހުން ތާށިވެފައިވާ ކަމަށް ފަލަސްތީނުގެ ސިވިލް އިމަޖެންސީ ސާވިސް އިން ބުނެފިއެވެ.
އިޒްރޭލުން ވަށާލާފައިވާ ސަރަހައްދު ޖަބަލިއާ، ބެއިޓް ލަހިޔާ އަދި ބެއިޓް ހަނޫންގައި ގާތްގަނޑަކަށް ލައްކައެއްހާ މީހުން ތާށިވެފައިވާ އިރު މެޑިކަލް ނުވަތަ ކާބޯތަކެތީގެ ސާމާނު އެ ސަރަހައްދުގައި ނެތް ކަމަށް އެފަރާތުން ބުނެއެވެ. އެ ސަރަހައްދަށް އެހީގެ ތަކެތި ގެނައުމަށް އިޒްރޭލު ސިފައިން ދެކޮޅު ހަދަމުން އަންނަތާ ހަފްތާތަކެއް ވެއްޖެ ކަމަށާއި ގާޒާގެ އުތުރުގެ ސަރަހައްދަށް ތިން ހަފުތާ ވަންދެން ދިން ހަމަލާގެ ސަބަބުން އެ ކުންފުނީގެ އަމިއްލަ އޮޕަރޭޝަންތައް ހުއްޓުމަކަށް އައިސްފައިވާ ކަމަށް ވެސް ބުނެއެވެ.
ގާޒާގެ ސިއްހަތާ ބެހޭ ވުޒާރާ އިން ބުނީ، މިއަދު އިޒްރޭލުން ދިން ވައިގެ ހަމަލާތަކާއި ބޮމުގެ ހަމަލާތަކުގައި 19 މީހުން ޝަހީދުވެފައިވާ ކަމަށެވެ.
އިޒްރޭލުން ގާޒާގެ އުތުރުގެ ސަރަހައްދު ވަށާލައި ބޮން އަޅާތާ މިއަދަށް 24 ދުވަސް ވަނީ ވެފައެވެ. ދުނިޔެއިން ފަގީރުކަމާއި ބޭއިންސާފް ނައްތާލުމަށް މަސައްކަތް ކުރާ ޖަމިއްޔާއެއް ކަމަށް ވާ އޮކްސްފާމް އިން ބުނާ ގޮތުގައި އެ ސަރަހައްދަށް އެހީގެ އެއްވެސް ތަކެއްޗެއް ނުލިބޭ ކަމަށާއި އެކަން އެހީ އެތެރެ ކުރުން އިޒރޭލުން ހުއްޓުވާފައިވާ ކަމަށެވެ. ފަލަސްތީނުގެ ބައެއް މީހުން ގާޒާގެ އުތުރުގައި ބަނޑުހައިހޫނުކަމުގެ ސަބަބުން މަރުވަމުންދާ ކަމަށާއި ކުރިއަށް އޮތް ދުވަސްތަކުގައި އިތުރު ބަޔަކު މަރުވާނެ ކަމުގެ އިންޒާރު ވެސް ވަނީ ދީފައެވެ.
ހަނގުރާމަ ފެށިތާ އަހަރު ދުވަސް ވެފައިވާ އިރު މި މަހުގެ 5 ވަނަ ދުވަހުން ފެށިގެން އިޒްރޭލުގެ ބާރުތަކުން އުތުރު ގާޒާގެ އެކި ސަރަހައްދުތަކަށް އެއްގަމު މަގުން ދޭ ހަމަލާތަކާއި ވައިގެ މަގުން ބޮން އެޅުން އެތައް ގުނައެއް ވަނީ އިތުރު ކޮށްފައެވެ. އެގޮތުން މިދިޔަ އާދިއްތަ ވިލޭރޭ އިޒްރޭލުގެ ބާރުތަކުން ގާޒާގެ އުތުރުގައިވާ ބައިތުލް ލަހިޔާގައި 6 އިމާރާތަކަށް ބޮން އަޅާ، 45 މީހުން ވަނީ ޝަހީދުކޮށްލާފައެވެ. މި ހަމަލާތަކުގެ މަގްސަދަކީ އެ ސަރަހައްދުތަކުގެ ރައްޔިތުން ސަރަހައްދު ދޫކޮށް ދިއުން މަޖުބޫރު ކުރުވުން ކަމަށް ރިޕޯޓްތައް ބުނެއެވެ.
ހުއްޓުމެއް ނެތި މި ވޭތުވެ ދިޔަ އަހަރު ދުވަހު ގާޒާއަށް ހަމަލާ ދެމުން އަންނަ އިރު، މިހާތަނަށް ޝަހީދުވި މީހުންގެ ޖުމްލަ އަދަދު ވަނީ 43،686 އަށް އަރާފައެވެ، އޭގެތެރެއިން ޝަހީދުވި ކުޑަކުދިންގެ އަދަދަކީ 16950 ކަމަށް ރިޕޯޓްތަކުން ބުނެއެވެ. އަދި މި ވޭތުވެ ދިޔަ އަހަރު ދުވަހުގެ ތެރޭގައި ގާޒާއިން ޒަހަމްވި މީހުންގެ އަދަދު ވެސް މި ވަނީ 101،000 އިން މައްޗަށް އަރާފައެވެ.
