ބަންގްލަދޭޝްގައި ސަރުކާރުގެ ވަޒީފާތައް ދިނުމުގައި މިނިވަންކަން ހޯދުމަށް 1971 ގައި އެ ގައުމުން ޕާކިސްތާނާ އެކު ކުރި ހަނގުރާމައިގައި ބައިވެރިވި ފަރާތްތަކުގެ އާއިލާތަކަށް ވަކި މިންވަރެއް ކަނޑައަޅާފައި އޮތް މައްސަލައާ ހުރެ ފެށި މުޒާހަރާ މެދުކެނޑުމަކަށް ފަހު އަލުން އާ ކޮށް ބޮޑުވަޒީރު ހަސީނާގެ އިސްތިއުފާއަށް ގޮވަން ފަށައިފިއެވެ.
އާންމުންގެ އެތައްހާސް ބަޔަކު މަގުތަކަށް ނިކުމެ ސަރުކާރާ ދެކޮޅަށް ފަށާފައި ވާ މުޒާހަރާގައި ފުލުހުންނާ ދެމެދު ހިނގަމުންދާ ކުރިމަތިލުންތަކުގައި މިހާތަނަށް 90 މީހަކު މަރުވެ, އެތައް ސަތޭކަ ބަޔަކު ޒަހަމް ވެއްޖެއެވެ. މަރުވި މީހުންގެ ތެރޭގައި ފުލުހުންގެ 13 މީހަކުވެސް ހިމެނެއެވެ.
ބަންގްލަދޭޝްގައި މިހާރު ކުރިއަށްދާ މުޒާހަރާ ކޮންޓްރޯލުން ނައްޓާފައި ވާ އިރު, ފުލުހުން ގެންދަނީ އާންމުން މައިތިރި ކުރަން ކަރުނަގޭހާއި ސްޓަން ގްރެނޭޑް ބޭނުން ކުރަމުންނެވެ.
ހަމަނުޖެހުން އެންމެ ބޮޑު ސަރަހައްދުތަކުގެ ތެރޭގައި ވެރިރަށް ޑާކާ އާއި އުތުރުން ބޮގްރާ, ޕަބްނާ, ރަންގްޕޫރު ހިމެނެއެވެ. އަދި ހުޅަނގުން މަގުރާ ހިމެނޭ އިރު އިތުމަތި ބިތުން ކޮމިލާ އާއި ދެކުނު ބިތުން ފެނީ ހިމެނެއެވެ.
މި ހަމަނުޖެހުންތަކުގައި އާންމުން ވަނީ, ބައެއް މީހުންގެ މުދަލާއި ތަކެއްޗަށް ގެއްލުން ދީ އަލިފާން ޖަހާ ރޯކޮށްފައެވެ. އަދި ވެހިކަލްތަކާއި އެނޫންވެސް ތަކެއްޗަށް ގެއްލުން ދެމުން ގެންދާ އިރު މުޒާހަރާ ކުރަމުން ދާ ފަރާތްތަކުން ބުނަނީ, ވަޒީފާ ކޯޓާގެ މައްސަލައިގައި ފެށި އިހުތިޖާޖުގެ ބައިވެރިންނަށް ސަރުކާރުގެ ފަރާތުން ފުލުހުން ނެރެ އަނިޔާ ކޮށް ހަމަލާ ދީ ގަސްދުގައި އާންމުންގެ ގަޔަށް ބަޑިޖަހާ މަރާފައި ވާކަމަށެވެ. އެހެން ކަމުން ދެން އޮތް ހަމައެކަނި ގޮތަކީ ބޮޑުވަޒީރު ޝައިހު ހަސީނާ އިސްތިއުފާ ދެއްވުން ކަމަށެވެ.
ބަންގްލަދޭޝްގައި ވަޒީފާގެ ކޯޓާ ކުރިން ހަމަޖައްސާފައި އޮންނަނީ, ހަނގުރާމައިގައި ބައިވެރިވި އާއިލާތަކަށް 26 ޕަސެންޓް ލިބޭގޮތަށެވެ. އެ މުޒާހަރާތަކާ ހެދި އެގައުމުގެ ސްޕްރީމް ކޯޓުން ކޯޓާ ސިސްޓަމް ސަސްޕެންޑްކޮށް ގެނައި ބަދަލަކީ, 93 ޕަސެންޓް, ތައުލީމީ ސަނަދުތަކާއި ހުނަރަށް ބަލައި ދިނުމަށެވެ. ބާކީ 7 ޕަސެންޓް ހަނގުރާމައިގައި ބައިވެރިވި އާއިލާތަކަށް ހާއްސަ ކުރުމަށެވެ. މި ބަދަލާއެކު އޭރު ކުރި މުޒާހަރާ ބެދުކަނޑާލި ނަމަވެސް އާންމުން ބުނަމުން ދަނީ, އެ މުޒާހަރާގައި އާންމުން މަރުވި ކަމަށާއި, އެއީ ބަލައިގަނެވޭނެ ކަމެއް ނޫން ކަމަށެވެ. އެހެން ކަމުން ހަސީނާ އިސްތިއުފާ ދެއްވުން ނޫން ގޮތެއް ގަބޫލު ނުކުރާނެ ކަމަށް ބުނަމުން ދެއެވެ.
