ތިންވަނަ ދައުރަކަށް އިންތިޚާބުވެވަޑައިގެންނެވި އިންޑިއާގެ ބޮޑުވަޒީރު ނަރެންދްރާ މޯދީ ހުވާކުރައްވާ ރަސްމިއްޔާތަށް ރައީސް ޑރ. މުހައްމަދު މުއިއްޒަށް ދައުވަތު އަރުވައިފިއެވެ.
މޯދީ ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ.
ރާއްޖޭގެ އިތުރުން، ބޫޓާނާއި ނޭޕާލާއި ބަންގްލަދޭޝާއި މޮރިޝަސްގެ ވެރިންނަށް އިންޑިއާ އިން ވަނީ ދައުވަތު ފޮނުވާފައެވެ.
ރައީސަށް އިންޑިއާއިން ދައުވަތު އެރުވި ނަމަވެސް، އެ ދައުވަތު ގަބޫލުކުރެއްވިކަން ނުވަތަ ނޫންކަން ސާފެއް ނޫނެވެ. މިކަމާ ގުޅިގެން ރައީސް އޮފީހުގެ އިސް ތަރުޖަމާނު ހީނާ ވަލީދަށާއި އެ އޮފީހުގެ ކޮމިއުނިކޭޝަންސް ވަޒީރު އިބްރާހީމް ޚަލީލަށް ގުޅުމުން ފޯނަށް ޖަވާބު ދެއްވާފައެއް ނުވެއެވެ.
މި ރަސްމިއްޔާތުގައި ބައިވެރިވެވަޑައިގަންނަވާނެ ކަމަށް ބަންގްލަދޭޝްގެ ބޮޑުވަޒީރު ޝައިހް ހަސީނާ އާއި ސްރީލަންކާގެ ރައީސް ރަނިލް ވިކްރަމަސިންހައިގެ އިތުރުން އެހެން ބައެއް ގައުމުތަކުގެ ލީޑަރުން ވަނީ އިންޑިއާ އަށް ރަސްމީކޮށް އަންގަވާފައެވެ.
އިންޑިއާގެ އާންމު އިންތިހާބުގައި 640 މިލިއަން މީހުން ވޯޓުލާފައި ވެއެވެ. އެ ގައުމުގެ ގާނޫނު ހަދާ މަޖިލީހުގެ ތިރިގެ، ނުވަތަ ލޮސްސަބާގެ އަޣުލަބިއްޔަތު ހޯދުމަށްޓަކައި ތިރިގޭގެ 543 ގޮނޑީގެ ތެރެއިން 272 ގޮނޑި ކަށަވަރުކުރަން ޖެހޭނެއެވެ. އޭގެ ތެރެއިން މޯދީގެ ބީޖޭޕީއަށް ކަށަވަރުކުރެވުނީ 240 ގޮނޑި ކަށަވަރުކުރެވުނު އިރު، އެންމެ ގާތުން ވާދަކުރި އިންޑިއާގެ ކޮންގްރެސް ޕާޓީން އިސްވެ އޮވެ ހެދި އިއްތިހާދަށް ލިބުނީ 222 ގޮނޑިއެވެ.
ނަމަވެސް ތަފާސްހިސާބުތަކުން ދައްކާ ގޮތުގައި މި އިންތިހާބުގައި ބީޖޭޕީ އަށް 63 ގޮނޑި ގެއްލިފައިވެއެވެ. އަދި ކޮންގްރެސް ޕާޓީއަށް 47 ގޮނޑި އިތުރުވެފައިވެއެވެ.
މޯދީ އިންޑިއާގެ ބޮޑުވަޒީރުކަމަށް އެންމެ ފުރަތަމަ އިންތިހާބުވެވަޑައިގަތީ 2014 ވަނަ އަހަރުގައެވެ. އެއަށްފަހު 2019 ވަނަ އަހަރުގައި ވެސް އޭނާ ވަނީ ބޮޑު އަޣުލަބިއްޔަތަކުން އިންޑިއާގެ ބޮޑުވަޒީރުކަމަށް އިންތިހާބުވެފައެވެ.
