އޭޕްރީލް މަހު ޑެންގީ ހުމުގެ 244 ކޭސް ރިޕޯޓުކޮށްފައިވާ ކަމަށާއި އެހެންކަމުން މިކަމަށް އިތުރަށް ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭއިން) އިލްތިމާސްކޮށްފިއެވެ.
އެޗްޕީއޭއިން ބުނީ މިއަހަރުގެ މާޗު މަހު ޑެންގީ ހުން ޖެހިގެން ރިޕޯޓުކޮށްފައިވަނީ 119 މީހުން ކަމަށާއި މި އަދަދު އޭޕްރީލް މަހު 244 އަށް އިތުރުވެފައިވާ ކަމަށެވެ. އެޗްޕީއޭގެ ތަފާސްހިސާބުތަކުން ދައްކާ ގޮތުގައި މި އަހަރުގެ މާޗު މަހާ އަޅާބަލާއިރު އޭޕްރީލް މަހު އަރިދަފުސް ރޯގާ އަދި އިންފްލުއެންޒާ ޖެހިގެން ރިޕޯޓު ކުރެވުނު އަދަދު ވަނީ ދަށްވެފައެވެ. އެގޮތުން:
އަރިދަފުސް ރޯގާ:
- މާޗު މަހު - 33637 ކޭސް
- އޭޕްރީލް މަހު - 22739 ކޭސް އަދި
އިންފްލުއެންޒާ:
- މާޗު މަހު - 27 ކޭސް
- އޭޕްރީލް މަހު - 9 ކޭސް
އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރު، ޑރ. އަހްމަދު ފައިސަލް ވިދާޅުވީ ޑެންގީ ހުމަކީ ފުރާނައަށް ނުރައްކާވާ ބައްޔެއް ކަން ހަނދާން ނައްތާނުލުމަށާއި މަދިރިން ރައްކާތެރިވުމަށް އިތުރަށް ސަމާލުކަން ދިނުމަކީ މުހިންމު ކަމެއް ކަމަށެވެ. ފައިސަލް ވިދާޅުވީ މެއި މަހުގެ ތެރޭގައި މިހާރު ވެސް 6 ތުއްތު ކުދިން ޑެންގީ ހުން ޖެހިގެން އެޑްމިޓްކޮށްފައި އެބަ ތިބި ކަމަށާއި، އޭގެ ތެރެއިން ބައެއް ކުދިންގެ ހާލު ސީރިއަސްވެ ލޭ ވެސް އަޅަން ޖެހޭ ކަމަށެވެ.
މަދިރީގެ ޒަރިއްޔާއިން ޖެހޭ ބަލިތައް ފެތުރުން އިތުރުވަމުން އަންނަ މި ދަނޑިވަޅުގައި އެޗްޕީއޭއިން ވަނީ ބަލި ފެތުރުން މަދު ކުރުމަށް ބަލި ފަތުރާ މަދިރި ނައްތާލުމާއި މަދިރި ހެފުމުން ރައްކާތެރިވުމަށް ފިޔަވަޅުތައް އެޅުމަށް އިލްތިމާސް ކޮށްފައެވެ. މަދިރި އުފެދި އާލާވާގޮތަށް ހުންނަ ތަންތަން ނައްތާލުން އަދި މަދިރި ހެފުމުން ރައްކާތެރިވުމަށް މަދިރި ލޯޝަން ފަދަ ތަކެތި ބޭނުން ކުރުމަށް ވެސް ވަނީ އިލްތިމާސް ކޮށްފައެވެ.
މިހާރު ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައާ ގުޅިގެން މަދިރި އަލާވާ ފަދަ ތަންތަން އިތުރުވާނެ ކަމަށް ބެލެވޭތީ، މަދިރީގެ ޒަރީއާއިން ފެތުރޭ ޑެންގީ އަދި ޗިކުންގުންޔާ ފަދަ ބަލިތަށް ދުވަސްތަކުގައި އިތުރުވެގެން ދިޔުމުގެ ފުރުސަތު ބޮޑުވުމުން، ދުރާލައި ބަލިން ރައްކާތެރިވުމުގެ ފިޔަވަޅުތައް އެޅުމަށް ވެސް އެޗްޕީއޭ އިން ވަނީ އިލްތިމާސް ކޮށްފައެވެ.
