އިިންތިހާބުތަކާ ދިމާކޮށް ކަޑަޖަހާ ވޯޓު ހޯދަން ދަޅަދައްކާ އުސޫލުން، އުމްރާނީ ތަރައްގީގެ މަސައްކަތްތަކެއް ރަށްރަށުގައި ފަށާފައިވާކަމަށާއި އެފަދަ ގިނަ މަސައްކަތްތައް ވަކި ހިސާބަކުން ހުއްޓިފައިވާކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު ރައްޔިތުން މަޖިލީހުގައި ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ މަގުހަދަން ނޫނީ ނަރުދަމާގެ ހިދުމަތްދޭން ކޮނުނު ތަންތަން އެގޮތަށް ހުންނަތާ އެތައް އަހަރެއްވެ، މަސައްކަތަށް ގެނައި އާލާތްތަކާ ތަކެތި ހަލާކުވެ، މުޅި ދައުލަތަށާ ރައްޔިތުންނަށް އެކަމުގެ ގެއްލުމާ ތުރާ ލިބެމުންދާ މަޝްރޫއުތައް ގިނަކަމަށެވެ. އަދި ރާއްޖޭގެ ހުރިހާ ރަށެއްގައި މި ގޮތަށް ގާވެފައި ހުރި މަޝްރޫއުތައް ބަލައި، ރައްޔިތުން އެދޭގޮތަށް އެ މަޝްރޫއުތައް އަލުން ހިންގައިދޭން މަސައްކަތް ކުރަމުން އަންނަކަމަށް ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ފެނުގެ ހިދުމަތް ރަނގަޅަށް ދެވޭ އޮތީ އެންމެ 66 ރަށްކަމަށާއި ނަރުދަމާގެ ހިދުމަތް ރަނގަޅަށް ގާއިމުވެފައި އޮތީ 101 ރަށުގައިކަމަށެވެ. ބާކީ ހުރި ހުރިހާ ރަށެއްގައި ފެނާ ނަރުދަމާގެ ހިދުމަތް މި ދައުރުގައި ނިންމައިދޭނެކަން ފާހަގަކުރައްވަމުން ރައީސް ވިދާޅުވީހުރިހާ ރަށެއްގައި ބަނދަރު ހަދައި ނިންމައިދޭނެކަމަށެވެ.
ކައުންސިލްތަކުން ހިންގާ ހާއްސަ މަޝްރޫއުތަކެއްގެ ގޮތުގައި ކުނި ނައްތައިލުމާ، ގޮނޑުދޮށް ހިމާޔަތްކުރުމުގެ މަސައްކަތްތައް ކުރިއަށް ގެންދެވޭނެ މަގު ފަހިކޮށްދެއްވާނެކަމަށް ރައީސް ވިދާޅުވިއެވެ. މި ގޮތުން މި އަހަރު 56 ރަށެއްގައި އާ ކުނިކޮށި އަޅައި ނިންމުމާއެކު 16 ރަށެއްގެ ކުނިކޮށި އަޕްގްރޭޑްކޮށް ދެއްވާނެކަމަށް ރައީސް ވިދާޅުވިއެވެ. އަދި 93 ރަށަކަށް ކަލެކްޝަން ވެހިކަލް ހޯދައި ދިނުމާއެކު މެޝިނަރީ އާއި އިކްއިޕްމަންޓް 71 ރަށަކަށް ހޯދައިދެއްވާނެކަމަށް ރައީސް ވިދާޅުވިއެވެ.
"އަޅުގަނޑުމެން ވައުދުވީ ފަދައިން އިރާދަކުރެއްވިއްޔާ ހުރިހާ ސިޓީތަކެއްގެ ހުރިހާ މަގެއް ރަނގަޅު ފެންވަރަށް ހަދާނަން. އެނޫން ރަށްރަށުގެ ބޮޑެތި މަގުތައް ހަދާނަން. މާލޭގެ މަގުތައް ރަނގަޅު ފެންވަރުގައި ހެދުމުގެ މަސައްކަތް މި އަހަރު އިރާދަކުރެއްވިއްޔާ ފެށިގެންދާނެ. މި މަޝްރޫޢަށް ހިނގާނެ ހަރަދުގެ ބޮޑުބައި ޗައިނާގެ ހިލޭއެހީގެ ދަށުން ހަމަޖެހިގެންދާނެ. " ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ހުރިހާ ރަށެއްގެ ކަރަންޓު ހިދުމަތުގެ ފެންވަރު ރަނގަޅުކޮށްދިނުމުގެ އިތުރުން ގޭބިސީތަކުން ކަރަންޓު ބިލަށްކުރާ ހަރަދު ކުޑަކޮށް، އިއާދަކުރަނިވި ވަސީލަތްތައް ބޭނުންކޮށްގެން ކަރަންޓު އުފެއްދުމުގައި ރައްޔިތުންގެ ބައިވެރިވުން އިތުރުކޮށް، އޭގެ އިޖުތިމާއީ އަދި އިގްތިސާދީ މަންފާ އެންމެހައި ރައްޔިތުންނަށް ފަހިކޮށްދޭނެކަމަށެވެ. އަދި މި އަމާޒާއެކު ފަށާފައިވާ "މަގޭ ސޯލާ" ގެ ނަމުގައި ޕްރޮގްރާމެއް ހަފުތާ 14ގެ ތެރެއިން ފަށާފައިވާކަމަށާ މި ޕްރޮގްރާމުގެ ފުރަތަމަ ފިޔަވަހީގެ ދަށުން 3 ކިލޯވޮޓު އަދި 5 ކިލޯވޮޓު ހިމެނޭހެން ޖުމްލަ 3 މެގަވޮޓުގެ ސޯލާ ޕީވީ ސިސްޓަމް ގަތުމަށް ބީލަމަށް ހުޅުވާލާފައިވާކަމަށް ރައީސް ވިދާޅުވިއެވެ.
އިތުރަށް ރައީސް ވިދާޅުވީ ކޮންމެ ރަށެއްގައި އެ ރަށަކާ އެކަށޭނަ ކަސްރަތުކުރާ ތަނަކާ، ޕާކުތަކާ، ކުޅިވަރު ކުޅޭ ތަންތަނާ، ޒުވާނުންގެ މަރުކަޒުތައް ގާއުމުކުރާނެކަމަށެވެ. އަދި އިގްތިސާދު ރަނގަޅުވެ، ދައުލަތަށް އާމުދަނީ ވަންނަމުން، އިތުރުވަމުން ދިޔަ ވަރަކަށް، ކަނޑައެޅޭ ވަކި ތަރުތީބަކުން ތަރައްގީގެ މިހުރިހާ މަޝްރޫއެއްގެ ފޮނިމީރުކަން މީހުން ދިރިއުޅޭ ހުރިހާ ރަށަކާ ހަމަޔަށް ހަމަހަމަކަމާއެކު ގެނެސްދެއްވާނެކަމަށް ރައީސް ވިދާޅުވިއެވެ.
