އާ ސަރުކާރުގެ އިސް މަގާމަކަށް ވަޑައިގަންނަވާތީ އިސްލާމިކް އޮގަނައިޒޭޝަން ފޯ ކަލްޗަރަލް އެންޑް ސިވިލައިޒޭޝަން (އައިއޯސީސީ)ގެ ރައީސްގެ މަގާމުން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިސްތިއުފާ ދެއްވައިފިއެވެ.
ޝަހީމް އެކަން ހާމަކުރެއްވީ އޭނާގެ އާ ފޮތް "އިސްލާމީ ނަޒަރިއްޔާތު" ރޭ ނެރެން ބޭއްވި ހަފުލާގައި ވާހަކަ ދައްކަވަމުންނެވެ.
މި މަހުގެ 17 ގައި ރައީސްކަމުގެ ހުވާކުރައްވާ ޑރ. މުހައްމަދު މުއިއްޒުގެ ސަރުކާރުގެ އިސް މަގާމަށް ވަޑައިގަންނަވާނެ ކަމަށް ޝަހީމް ވިދާޅުވިނަމަވެސް އެކަމާ ގުޅޭ އިތުރު ތަފުސީލެއް ޝަހީމް ދެއްވާފައެއް ނުވެއެވެ.
މައުލޫމާތު ލިބިފައިވާ ގޮތުގައި ޝަހީމް އައްޔަން ކުރައްވަނީ އާ ރައީސް ޑރ. މުހައްމަދު މުއިއްޒުގެ ސަރުކާރުގެ އިސްލާމިކް މިނިސްޓަރުގެ މަގާމަށެވެ.
ޝަހީމް ވަނީ މީގެ ކުރިން ވެސް އިސްލާމިކް މިނިސްޓަރުކަން ކުރައްވައިފައެވެ. މީގެ އިތުރުން ރައީސް ޑރ. މުހައްމަދު ވަހީދު ހަސަން މަނިކުގެ ކެބިނެޓުގައި ވެސް ޝަހީމް ވަނީ އިސްލާމިކް މިނިސްޓަރުގެ މަގާމު ފުރުއްވާފައެވެ.
އޭނާ އަކީ ކުރިން އިސްލާމިކް ޔުނިވަސިޓީގެ ޗާންސެލަރު ކަން ވެސް ކުރައްވާފައިވާ ބޭފުޅެކެވެ.
