އިންތިހާބީ ރައީސް ޑރ.މުހައްމަދު މުއިއްޒުގެ ސަރުކާރެއްގައި ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރަން ނިންމާފައިވާކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ 700 ސިޔާސީ މުވައްޒަފުންނަކީ ރައީސުލްޖުމްހޫރިއްޔާގެ އޮފީހާއި، ގެކޮޅާއި، ނައިބު ރައީސްގެ ގެކޮޅާއި، ވަޒީރުންނާއި ކުންފުނިތައް ހިމެނޭހެން އެތަންތަނަށް އައްޔަން ކުރާ ސިޔަސީ ބޭފުޅުންގެ އަދަދު ކަމަށެވެ.
ރައީސް އިބްރާހީމް މުހައްމަދު ސޯލިހްގެ ސަރުކާރުގައި 1063 ސިޔާސީ މުވައްޒަފުން ތިއްބެވިއިރު، ސިޔާސީ މުވައްޒަފުންގެ އަދަދު އިތުރުވުމާ ގުޅިގެން ސަރުކާރުގެ ހަރަދުތައް އިންތިހާއަށް ބޮޑުވެގެންދާ މައްސަލައިގައި ގިނަ ބައެއްގެ ފާޑުކިޔުންތައް ވަނީ މި ސަރުކާރަށް އަމާޒުވެފައެވެ، ރައީސް އަބްދުﷲ ޔާމީންގެ ސަރުކާރުގައިވެސް 808 ސިޔާސީ މުވައްޒަފުން ތިއްބެވިއެވެ.
ވެރިކަން ބަދަލުވުމުގެ މަރުހަލާގެ ކަންތައްތައް ކުރިއަށް ދާ މި ދަނޑިވަޅު ފިރުޒުލް އިތުރަށް ވިދާޅުވީ ޑރ. މުއިއްޒުގެ ވެރިކަމެއްގައި އިސްކަން ދެއްވާނީ ޝާމިލް ސަރުކާރެއް އެކުލަވާލައްވަން ކަމަށާއި ކެބިނެޓާ ސިޔާސީ މަގާމުތަކަށް ވެސް ފުރުސަތު ދެއްވާނީ ޕާޓީގެ ފިކުރަށް ބެލުމެއް ނެތި ގާބިލް، އިލްމީ ބޭފުޅުންނަށް ކަމަށެވެ.
