އައްޑޫ ސިޓީގައި ތަރައްގީކުރަން ހަމަޖެހިފައިވާ "އަމާން ހިޔާ" މަޝްރޫއުގެ މަސައްކަތް ކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން އިއުލާން ކޮށްފިއެވެ.
އައްޑޫ ސިޓީގައި ތަރައްގީކުރަން ހަމަޖެހިފައިވާ "ސޭފް ހޯމް" މަޝްރޫއުއަކީ އޭޝިއަން ޑިވެލޮޕްމަންޓް ބޭންކްގެ ހިލޭ އެހީގައި ކުރިއަށް ގެންދާ "ސްޓްރެންތެނިން ޖެންޑާ އިންކްލޫސިވް އިނީޝިއޭޓިވް" ޕްރޮޖެކްޓްގެ މަޝްރޫއެކެވެ. ދިވެހިރާއްޖެއާއި އޭޑީބީ އާއި ދެމެދު 2022 ވަނަ އަހަރު ވެފައިވާ އެއްބަސްވުމެއްގެ ދަށުން ދޭ އެހީގައި ހުޅުމާލެ، އައްޑޫ ސިޓީ އަދި ރ. އަތޮޅުގައި އަމާން ހިޔާ ގާއިމުކުރުމަށް ވަނީ ހަމަޖެހިފައެވެ.
ފިނޭންސް މިނިސްޓްރީން ކުރި އިއުލާނުގައި ބުނީ އައްޑޫ ސިޓީގައި ގާއިމުކުރާ އަމާން ހިޔާގެ މަސައްކަތް ކޮށްދިނުމަށް ޝައުގުވެރިވާ ފަރާތްތަކުން ބީލަމުގައި ބައިވެރިވުމަށް ރަޖިސްޓްރީ ކުރުމަށްޓަކައި އެއްހާސް ފަސްސަތޭކަ ރުފިޔާގެ ނޮންރިފަންޑަބަލް ފީއެއް ހުށަހަޅަންޖެހޭނެ ކަމަށެވެ. މި ޕްރޮޖެކްޓް ބީލަން ހުޅުވުން އޮންނާނީ އަންނަ ސެޕްޓެމްބަރު މަހުގެ 19ވަނަ ދުވަހުއެވެ.
މި މަޝްރޫއުއަށް އޭޑީބީން 7.5 މިލިއަން ޑޮލަރުގެ ހިލޭ އެހީ ރާއްޖެއަށް ވަނީ ފޯރުކޮށްދީފައެވެ.
