ހަށިވިއްކަމުންދާ ކަމަށް ލިބުނު މައުލޫމާތަކާ ގުޅިގެން، މާލޭގައި ހިންގާ އަލޯރާ ސްޕާ އެންޑް ސެލޫން ރެއިޑްކޮށް ހައްޔަރުކުރި ފަސް މީހުންގެ ބަންދަށް އިތުރު ފަނަރަ ދުވަސް ޖަހައިފިއެވެ.
މި އޮޕަރޭޝަނަކީ އަލޯރާ ސްޕާ އެންޑް ސެލޫންގައި ހަށިވިއްކަމުންދާ ކަމުގެ މައުލޫމާތު އިންޓެލިޖެންސަށް ލިބުމާ ގުޅިގެން އެންޓި ޓްރެފިކިން ޑިޕާޓްމަންޓާއި އިންޓެލިޖެންސް އަދި އިމިގްރޭޝަން ގުޅިގެން މިދިޔަ ޖުލައި މަހުގެ 20 ވަނަ ދުވަހުގެ ރޭ ހިންގި އޮޕަރޭޝަނެކެވެ.
އެ އޮޕަރޭޝަންގައި 34 އަހަރުގެ ބިދޭސީ ދެ އަންހެނުންނާ 43 އަހަރުގެ ބިދޭސީ އަންހެނަކާ އަދި 38 އަހަރާއި 39 އަހަރުގެ ދިވެހި ދެ ފިރިހެނުންވަނީ ހައްޔަރުކޮށްފައެވެ. ފުލުހުން ބުނީ އެ އޮޕަރޭޝަންގެ ތެރެއިން ބައެއް މީހުން ހައްޔަރު ކޮށްފައި ވަނީ ނިވާކަން ކުޑަކޮށް ތިއްބައި ކަމަށެވެ.
ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.
ފަހަކަށް އައިސް ރާއްޖެއިން ބޭރުން މީހުން ގެެނެސްގެން ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުން އަންނައިރު މިފަދަ ވިޔަފާރިތައް ހިންގަނީ ސެލޫން އާއި ސްޕާ ހިންގުމަށް ރަޖިސްޓްރީކޮށްފައިވާ ތަންތަނުގައިކަން ފާހަގަކުރެވެއެވެ.
