ރާއްޖޭގައި ހުންނަ ޗައިނާގެ އެމްބަސީގެ ބޭރު ފާރުގައި 'އިންޑިއާ އައުޓް' ޖެހި މީހަކު ހައްޔަރުކޮށް، އޭނާގެ ބަންދަށް ފަސް ދުވަސް ޖަހައިފިއެވެ.
މި މައްސަލައާއި ގުޅިގެން ހައްޔަރު ކޮށްފައި ވަނީ ށ. ފޭދޫ، މިިނިވަން އައްސޭރި މުހައްމަދު އަނީލް (40އ) އެވެ.
އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން، ޗައިނާ އެމްބަސީ ފާރުގައި 'އިންޑިއާ އައުޓް' ލިޔުނު ކަމަށް އެއްބަސްވެ އޭނާ ވަނީ އެކަން ހިނގައި ދިޔަ ގޮތުގެ ތަފްސީލް ކިޔައިދީފައެވެ.
މި ގޮތުން ޝަރީއަތުގެ މަޖިލީހުގައި އަނީލް ބުނީ އޭނާ އެކަން ކުރީ މުޒާހަރާ ތެރެއިން ދިމާވި މީހަކު އޭނާއަށް 10،000 ރުފިޔާ ދޭން ބުނުމުން ކަމަށެވެ. އަދި އޭނާ އާ ހަވާލުކުރި މަސައްކަތް ފުރިހަމަކޮށްފައި ނުވާތީ ފައިސާ ނުލިބޭކަމަށްވެސް އަނިލް ވަނީ ބުނެފައެވެ.
އެމްބަސީ ފާރުގައި ސްޕްރޭ ކުރަން ހުއްޓާ ފުލުހުން އޭނާ ހައްޔަރު ކުރި އިރު ހުރީ މަސްތުގެ ހާލަތުގައެވެ. އަނީލް ބަންދުގައި ބެހެއްޓުމަށް ކޯޓުން ނިންމީ އޭނާގެ މައްޗަށް ކުށްކުރި ކަމަށް ތުހުމަތުކުރެވޭ މިންވަރަށް ހެކި ލިބިފައި ވުމުންނެވެ.
