އިދިކޮޅު ކޯލިޝަނުން 'ތިޔަހެން ނުވިއްކޭނެ' ނަމުގައި މާދަމާ ބާއްވަން އުޅުނު ހިނގާލުން ފަސްކޮށްފިއެވެ.
ޕީޕީއެމް/ޕީއެންސީ ކޯލިޝަނުން ބާއްވަން ނިންމި ހިނގާލުން ފަސްކޮށްފައި ވަނީ އެ ޕާޓީގެ މެމްބަރު އަދި ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރު އިބްރާހީމް ރިޒާ އަވަހާރަވުމާ ގުޅިގެންނެވެ.
ތިލަފުށިން ބޭރު ކުންފުނިތަކަށް 99 އަހަރަށް ބިން ވިއްކަން ނިންމުމާ ގުޅިގެން އެކަމާ ދެކޮޅަށް އަޑުއުފުލުމަށް މާލޭގައި ބާއްވަން އުޅުނު ހިނގާލުން ދެން ބާއްވާނެ ތާރީހެއް އިދިކޮޅު ކޯލިޝަނުން އިއުލާން ކޮށްފައެއް ނުވެއެވެ.
މެލޭޝިއާގައި ކެންސަރު ބައްޔަށް ފަރުވާ ހޯއްދަވަމުން ދަނިކޮށް ރިޒާ އަވަހާރަވުމާ ގުޅިގެން އިދިކޮޅު ކޯލިޝަނުން ނެރުނު ބަޔާނުގައި ބުނީ ރިޒާއަކީ ރައްޔިތުންގެ މަޖިލީހުގެ މެންބަރެއްގެ ގޮތުގައި ވަރަށް ދިގު މުއްދަތަކަށް ހުންނަވައިގެން އަދި ގާނޫނީ ވަކީލެއްގެ ގޮތުގައި ވެސް ދިވެހި ދައުލަތަށް ގިނަ ހިދުމަތްތަކެއް ކުރެއްވި ބޭފުޅެއްކަމަށެވެ.
މީގެ އިތުރުން ކޯލިޝަނުން ބުނީ އެ ޕާޓީ އުފެދުނީއްސުރެ ރިޒާއަކީ އެޕާޓީއަށް ވަރަށް އަގުހުރި ހިދުމަތްތަކެއް އެންމެ ފަހު ވަގުތާ ޖެހެން ދެން ވެސް ކުރައްވަމުން ގެންދެވި ބޭފުޅެއް ކަމަށެވެ.
މަދަމާ ރިޒާގެ ޖަނާޒާ މެލޭޝީއާގައި ބޭއްވުމަށް ނިންމާފައިވާއިރު މި ޖަނާޒައިގައި ޕީއެންސީގެ ރައީސް އަބްދުއްރަހީމް އާއި މެމްބަރު ތާރިގް އާއި ގުރައިދޫ ކައުންސިލްގެ ރައީސް ޔާމީން އަދި ޕީޕީއެމް މެމްބަރު ޒާހިދް ރަމީޒް ބައިވެރިވެ ވަޑައިގަންނަވާނެއެވެ.
