ބްރެޒިލްގެ ރިއޯ ޑި ޖެނޭރޯ ފަދަ މަޝްހޫރު ސިޓީތަކަށް އާންމުކޮށް ދަތުރުކުރާ ފްލައިޓް އެޓެންޑެންޓަކަށް، ކޮވިޑްގެ ސަބަބުން ވަޒީފާ ދޫކޮށްލަން މަޖުބޫރުވެއްޖެއެވެ.
ދެހާސް ބާރަ ވަނަ އަހަރުން ފެށިގެން ކެތެރިން ފްރާންސިސް ކެބިން ކްރޫގެ ވަޒީފާގައި ހަރަކާތްތެރިވަމުން އައި ނަމަވެސް 2020 ވަނަ އަހަރު ދުނިޔެއަށް ކުރިމަތިވި ބޮޑު ބަލިމަޑުކަން، ކޮވިޑްގެ ސަބަބުން އޭނާގެ ހަށިގަނޑު ވަނީ ވަރަށް ބޮޑަށް ނިކަމެތިވެފައެވެ. އެންމެ ފުރަތަމަ ކޮވިޑު ޖެހުނު އިރު، ދުވަސްކޮޅެއް ފަހުން ރަނގަޅުވާނެކަމަށް ގަބޫލުކޮށްގެން އޭނާ ހުރި އިރު އޭނާއަށް ވަނީ ދިގު މުއްދަތަކަށް ކޮވިޑްގެ ބަލިމަޑުކަމާ ކުރިމަތިލާން ޖެހިފައެވެ. ޔޫކޭ އަށް އުފަން ކެތެއިން ބުނީ ޔޫކޭ ގައި ދިގު މުއްތަކަށް ކޮވިޑަށް ފަރުވާކުރާ 1.8 ބިލިއަން މީހުންގެ ތެރޭގައި އޭނާ ހިމެނިފައި ކަމަށެވެ.
އޭނާ ބުނީ މިދިޔަ މާޗު މަހު ވަޒީފާ އިން ވަކިވި އިރު ވަޒީފާއިން ވަކިވާން ނިންމި ނިންމުމަކީ ހަޔާތުގައި ނަގަން ޖެހުނު އެންމެ އުނދަގޫ ނިންމުން ކަމަށެވެ. އަބަދުވެސް ދަތުރުކުރުމަށް ޝައުގުވެރިކަން ހުންނަ އެ އަންހެން މީހާ ބުނީ ވަޒީފާ އިން ވަކިވުމުގެ ސަބަބުން އޭނާ މުޅިން މާޔޫސްވެފައިވާ ކަމަށެވެ.
"އުމުރުން 29 އަހަރު ވާއިރަށް އަހަރެން ހީކުރީ އަހަރެން ހުންނާނީ މީހަކާ ވެސް ކައިވެނިކޮށް ދަރިން ލިބިގެން އާއިލާ އާއެކީ ދަތުރުކުރަން ކަމަށް. އެކަމަކު އެކަން ވެސް ފުރިހަމަ އެއް ނުވި. އަހަރެންގެ ހުވަފެންތަކެއް ހުރޭ. އަހަރެންނަކީ އަބަދުވެސް ދަތުރުކުރުމަށް ވަރަށް ޝައުގުވެރިކަން ހުންނަ މީހެއް. ނަމަވެސް ކޮވިޑާ ހެދި އަހަރެންގެ މުޅި ދިރިއުޅުން ބަނަވެއްޖެ،" ކެތެރިން ބުންޏެވެ.
ކެތެރިން ބުނީ އޭނާގެ އުންމީދަކީ އަލުން ދަތުރުކުރަން ފެއްޓުން ކަމަށާއި ދިގު މުއްދަތަކަށް ކޮވިޑުގެ ބަލިމަޑުކަމާ ކުރިމަތިލާން ޖެހިފައި ތިބި އެންމެނަށް ވެސް ދެވަނަ ފުރުސަތެއް އޮންނަންވާނެ ކަމަށެވެ.
