އިންޓަނޭޝަނަލް ޔޯގާ ދުވަސް ފާހަގަ ކުރުމަށް އަންގާރަ ދުވަހު ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގުމާ ގުޅިގެން ހައްޔަރުކުރި، ޕީޕީއެމްގެ ހަރަކާތް ކޮމިޓީގެ މުގައްރިރު މުހައްމަދު އިސްމާއީލާއި، އެ ޕާޓީގެ ކައުންސިލް މެންބަރު އިބްރާހީމް ރައްޒާން (ޓަކީ) ފަސް ދުވަހަށް ބަންދުކޮށްފިއެވެ.
ގަލޮޅު ދަނޑަށް ވަދެ، ހަމަނުޖެހުން ހިންގި މައްސަލައާ ގުޅިގެން މިހާތަނަށް 10 މީހަކު ހައްޔަރުކުރިއިރު، ހަތަރު މީހެއް ރޭ ހައްޔަރުކޮށްފައިވެއެވެ. އެ ހަތަރު މީހުންނަކީ:
- ހޯރަފުށި ދާއިރާގެ ކުރީގެ މެންބަރު މުހައްމަދު އިސްމާއީލް
- ޕީޕީއެމްގެ ކައުންސިލް މެންބަރު އިބްރާހީމް ރައްޒާން (ޓަކީ)
- ޝައިޚް ފަޒްލޫން ބިން މުހައްމަދު
- ޝައިޚް އާދަމް ނިޝާން ބިން އަލީ އާދަމް
އެ މައްސަލައިގައި ރޭ ޝައިޚް ނިޝާން ހައްޔަރުކޮށްފައި ވަނީ ދަރިފުޅު ގޮވައިގެން ނަމާދަށް ދިޔަ ވަގުތުގައި ފުލުހުންގެ އެސްއޯއިން ޝައިޚް ނިޝާން ވަށާލުމަށް ފަހު، ނަމާދު ކުރުމަށް ފުރުސަތު ނުދީއެވެ. ޝައިޚް ނިޝާން ހައްޔަރުކުރާ ވީޑިއޯ ސޯޝަލް މީޑިއާގައި އާންމުވުމާ ގުޅިގެން، އާންމުންގެ ގިނަ ބަޔަކު ފުލުހުންނަށް ފާޑު ކިޔާފައިވެސް ވެއެވެ.
ރޭ ހައްޔަރުކުރި މީހުންގެ ތެރެއިން، ޓަކީ އާއި މުހައްމަދު އިސްމާއީލްގެ ބަންދަށް ވަނީ ފަސް ދުވަހުގެ މުއްދަތެއް ޖަހައިފައެވެ. އަދި ޝައިޚް ނިޝާންގެ ބަންދަށް ހަތް ދުވަހުގެ މުއްދަތެއް ޖަހާފައިވާއިރު، ޝައިޚް ފަޒްލޫންގެ މައްޗަށް ބަންދުގެ މުއްދަތެއް ޖަހައިފައެއް ނުވެއެވެ.
އެކަމަކު ޝައިޚް ނިޝާނާއި ޝައިޚް ފަޒްލޫން ދީނީ ދަރުސް ދިނުމުގެ ހުއްދަ، އިސްލާމިކް މިނިސްޓްރީން ވަނީ ނަގައިފައެވެ. ސަބަބެއްގެ ގޮތުގައި އެ މިނިސްޓްރީން ބުނީ އެ ގޮތަށް ނިންމާފައި ވަނީ:
- ގަލޮޅު ދަނޑުގައި އޮތް ޔޯގާގެ ހަރަކާތް ކުރިއަށް ދަނިކޮށް އެތަނަށް ވަދެގަނެ ހަމަނުޖެހުން ހިންގައި، އެއްވުމަށް ހިތްވަރު ދީފައިވާތީ
- ދެ ފަރާތުގެ މައްޗަށް ޖިނާއީ ތަހުގީގެއް ހިންގާކަން ފުލުހުން އަންގާފައިވާތީ
ފުލުހުން ތުހުމަތު ކުރާ ގޮތުގައި، ޔޯގާ އާ ދެކޮޅަށް އަޑުއުފުލި މީހުންތަކަށް ދިދަ ދީ، އެ ސަރަހައްދަށް ފޮނުވީ ޕީޕީއެމުންނެވެ. އެ މައްސަލައާ ގުޅިގެން ސޯޝަލް މީޑިއާގައި އާންމުވި ފޮޓޯތަކުން ފެންނަ ގޮތުގައި، އެ ސަރަހައްދަށް ދިޔަ މީހުންނަށް ދިދަތައް ބެހުމުގައި މުހައްމަދު އިސްލާއީލްގެ އިތުރުން، ޕީޕީއެމްގެ އެކްޓިވިސްޓެއް ކަމަށްވާ އަލީ ނަސީމް (ތަކަނޭ) ހަރަކާތްތެރިވަމުން ގޮސްފައިވެއެވެ.
ނަމަވެސް، އަންގާރަ ދުވަހު ނޫސްވެރިންނަށް މައުލޫމާތު ދެއްވަމުން، ޕީޕީއެމާ އެކު ކޯލިޝަން ހަދާފައިވާ ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ، އެ ހަމަނުޖެހުމުގައި އިދިކޮޅުގެ އެއްވެސް އަތެއް ނެތް ކަމަށެވެ. އަދި އެ ހަމަނުޖެހުން އިދިކޮޅުގެ ބޮލުގައި ސަރުކާރުން އަޅުވަން މަސައްކަތް ކުރާ ކަމަށް އޭނާ ތުހުމަތު ކުރެއްވިއެވެ.
ޔޯގާ ދުވަސް ފާހަގަ ކުރުމަށްޓަކައި ގަލޮޅު ދަނޑުގައި ބޭއްވި ހަރަކާތް ކުރިއަށް ދިޔަ ވަގުތު ހިންގި ހަމަނުޖެހުން ތަހްގީގުކޮށް، އެ ކަމުގައި އިސްކޮށް ހަރަކާތްތެރިވި ފަރާތްތައް އިންސާފުގެ ކުރިމައްޗަށް ގެންނާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެފައިވާއިރު، އެ މައްސަލަ ބެލުމަށްޓަކައި ސަރުކާރުން ވަނީ ހަތް ވަޒީރުން ހިމެނޭ ސަބް ކޮމިޓީއެއް ވެސް އެކުލަވާލައިފައެވެ.
ޔޯގާ ދުވަހާ ގުޅިގެން ކޮންމެ އަހަރަކު ވެސް ސަރުކާރުން ހަރަކާތްތައް ކުރިއަށް ގެންދެއެވެ.
