2019 ވަނަ އަހަރު އަނިޔާވެރިކޮށް މަރާލާފައިވާ ޓެކްސީ ޑްރައިވަރު ގާސިމް ހަސަން މަރާލި މައްސަލާގައި ދައުވާ ލިބޭ އަދުހަމްގެ މައްޗަށް އުފުލާ ދައުވާގެ އަޑުއެހުން ކެންސަލް ކޮށްފިއެވެ.
އެއަޑުއެހުން ތާވަލްކޮށްފައި އޮތީ މިއަދު 11:00އަށެވެ. ނަމަވެސް އަދުހަމްގެ ދިފާއީ ވަކީލާ ނުގުޅިގެން މި އަޑުއެހުން ކެންސަލްކޮށްފައިވާ ކަމަށް ކްރިމިނަލް ކޯޓުން ވަނީ ބުނެފައެވެ.
ޑްރައިވާ ގާސިމްގެ މައްސަލައިގައި އެންމެ ފަހުން އަޑުއެހުމެއް ބާއްވާފައި ވަނީ މިދިޔަ އެޕްރީލް މަހު 13ގައެވެ.
އދ މާމިގިލި/ ކަނީރުމާގެ 59 އަހަރުގެ ގާސިމް ހަސަން ކަރަށް ވަޅި ހަރައި މަރާލި މައްސަލާގައި އެދުވަހު ކްރިމިނަލް ކޯޓުގައި ކުރިއަށް ދިޔަ އަޑު އެހުމުގައި، ޑީއެންއޭ ތަހުލީލު ރިޕޯޓު ތައްޔާރު ކުރި އޮފިސަރު ހެކި ބަސް ދެމުން ބުނީ، ހާދިސާ ހިނގި ސަރަހައްދާއި، ގާސިމް ދުއްވި ކާރުން ނާއި އޭނާ މަާލަން ބޭނުން ކުރި ވަޅިން ސާމްޕަލްތަކެއް ނަގާފައިވާ ކަމަށާއި އޭގެތެރޭގައި ގާސިމްގެ ލޭގެ ސާމްޕަލްއެއް ވެސް ހިމެނޭ ކަމަށެވެ.
މި މައްސަލައިގައި ތުހުމަތު ކުރެވޭ ޅ. ހިންނަވަރު، ބޮޑުހިޔާގެ، އަދުހަމު މުހައްމަދުގެ ޑީއެންއޭ ސާމްޕަލްއެއް މި މައްސަލައާ ގުޅިގެން ހުށަހަޅާފައި ނުވާ ކަމަށާއި ނަމަވެސް އެ ދުވަސްވަރު އޭނާގެ މައްޗަށް ތުހުމަތު ކުރެވޭ ފޭރުމުގެ މައްސަލައަކާ ގުޅިގެން ނަގާފައިވާ ރިފަރެންސް ސާމްޕަލް މި މައްސަލައިގައި ބޭނުން ކޮށްފައިވާ ކަމަށް އޮފިސަރު ބުނެއެވެ. ޑީއެންއޭ ސާމްޕަލްއަކީ ބަދަލުވާނެ އެއްޗެއް ނޫން ކަމުން ކުރިން ނަގާފައިވާ އަދުހަމްގެ ޑީއެންއޭ ސާމްޕަލް ފުދޭނެ ކަމަށް އޭނާ ބުނެއެވެ.
އެ ހާދިސާ ހިނގި ރޭ ހުޅުމާލޭގެ ގަސްތަކެއްގެ ތެރޭގައި ހުރި ވަޅުގަނޑެއްގެ ތެރެއިން ނެގި 12 އިންޗިީގެ ވަޅިން ސާމްޕަލްތަކެއް ނަގާފައިވާ އިރު، އޭގެ ތެރޭގައި 3 މީހެއްގެ ޑީއެންއޭ ހިމެނޭ ކަމަށް އޮފިސަރު ބުނެއެވެ. އެއީ އަދުހަމްގެ ޑީއެންއޭއާއި، ގާސިމްގެ ޑީއެންއޭ އާއި ކާކު ކަން ނޭނގޭ މީހެއްގެ ޑީއެންއޭއެއް ކަމަށް އޭނާ ބުނެއެވެ.
ދައުލަތުން މި މައްސަލައިގައި ޖުމްލަ 11 ހެކިބަސް ހުށަހަޅަން ވަނީ އެދިފައެވެ.
