22 މިލިއަނެއްހާ މީހުންގެ އާބާދީއެއް އޮތް އަވަށްޓެރި ސްރީލަންކާއަށް މިއަދު ކުރިމަތިލާން ޖެހިފައިވާ އިގުތިސޯދީ ކާރިސާ ގޯހުން ގޯހަށް ގޮސް، ކާބޯތަކެތި ލިބުން އިންތިހާއަށް ދަތިވެ، އެ ގައުމު ބަނޑަށް ޖެހިދާނެ ކަމުގެ އިންޒާރު، ސްރީލަންކާގެ ސިޔާސީ މައިދާނުގައި ހަރަކާތްތެރިވެ ވަޑައިގަންނަވާ އިސް ޝަހްސަކުން ދެއްވައިފިއެވެ.
އިނގިރޭސިންގެ އަތުން މިނިވަންކަން ލިބުނު ފަހުން އެ ގައުމުގެ ތާރީހު ދުށް އެންމެ ގެއްލުން ބޮޑު މާލީ ކާރިސާގެ ދުވަސްތައް ގުނަން ޖެހިފައި ވާ ސްރީލަންކާގައި ސަރުކާރާ ދެކޮޅު މުޒާހަރާތައް ވަރުގަދަ ކުރަމުން ދާ މި ދަނޑިވަޅުގައި، ގާނޫނު ހަދާ މަޖިލީހުގެ ތަޅުމުގައި ވާހަކަދައްކަވަމުން މަޖިލީސް ރައީސް މަހިންދަ ޔަޕާ އަބޭވަރުދަނާ ވަނީ، މިހާރު އެ ގައުމުން ފެނިގެންދަނީ "ކޮޅުމަތި" ކަމުގެ އިންޒާރު ދެއްވާފައެވެ.
މި ރޫހުގައި ވާހަކަދައްކަވަމުން އަބޭވަރުދަނާ ވިދާޅުވީ، ކާބޯތަކެއްޗާއި، ގޭހާއި ކަރަންޓުގެ ހީނަރުކަން އަދި ގޯހުން ގޯހަށް ދާނެ ކަމަށާއި، ކާބޯތަކެތި ލިބުން އިންތިހާ ތަދުވެ، ބަނޑުހައިހޫނުކަމާވެސް ކުރިމަތިލާން ޖެހޭނެ ކަމަށެވެ.
ބުދަ ދުވަހަކީ ސްރީލަންކާގެ އިގުތިސޯދު އަނެއްކާވެސް ހީނަރުކަމުގެ ވަޅުގަނޑުގެ އިތުރު ފުންމިނަކަށް ވެއްޓިގެން ދުވަހެކެވެ.
އެގޮތުން އެމެރިކާ ޑޮލަރާ އަޅާ ބަލާއިރު އެ ގައުމުގެ ފައިސާގެ އަގު ވަނީ އިހުނަށް ވުރެ ބޮޑަށް ވެއްޓި، ދުނިޔޭގެ ނިސްބަތުން އެންމެ އަގެއް ނެތް ފައިސާއަށް ސްރީލަންކަން ރުޕީޒް ވަނީ ވެފައެވެ. ސްރީލަންކަން ރުޕީޒްއަކަށް މިހާރު ޖެހެނީ 0.0033 ޑޮލަރެވެ. ނުވަތަ ޑޮލަރަކަށް 299.96 ސްރީލަންކަން ރުޕީޒްއެވެ.
އަދި ސްރީލަންކާގެ ހިއްސާގެ ބާޒާރުގެ އަގުތައްވެސް ވަނީ 2 ޕަސެންޓް ދަށަށް ގޮސްފައެވެ.
ސްރީލަންކާ މިއަދު ވެއްޓިފައިވާ ހީނަރުކަމުގެ ފުން އަނދަވަޅާ ހިސާބަށް އެ ގައުމު ދިއުމުގައި ގިނަ ސަބަބުތަކެއް އެބަހުއްޓެވެ. އެގޮތުން މުޅި ދުނިޔެ އިނދަ ޖައްސާލި ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ސަބަބުން ސްރީލަންކާގެ އިގުތިސޯދަށް ކުރިމަތި ކުރުވި ތަކުލީފުތައް ފާހަގަ ކުރަން ޖެހެއެވެ. މީގެ އިތުރުން ބޭރު ފަރާތްތަކަށް ލަންކާއިންދާ ދަރާފައިވާ ދަރަނި ބޮޑުވުމާ، ބާޒާރުގައި ތަކެތީގެ އަގުތައް އުފުލުމުގެ އިތުރުން، ރައީސް ގޮތަބާޔާ ރާޖަޕަކްސަގެ ސަރުކާރުން އެކަށީގެން ވާ ގޮތެއްގައި އިގުތިސޯދީ ކަންކަން ނުބެހެލެހެއްޓުން ފަދަ ސަބަބުތައްވެސް ހިމެނެއެވެ.
ސްރީލަންކާގެ ބޭރު ފައިސާގެ ރިޒާވް އިންތިހާއަށް ހީނަރުވެފައި ވާ އިރު، ކާބޯތަކެއްޗާއި، ގޭހުގެ އިތުރުން ބޭސްފަރުވާ ފަދަ ޒޫރީރީ މުދާ ލިބުން ވަނީ ދަތިވެފައެވެ. ސްރީލަންކާގެ ސިއްހަތާ ބެހޭ އެންމެ މަތީ ޖަމިއްޔާއިން ވަނީ އެ ގައުމުގައި ސިއްހީ ކުއްލި ނުރައްކާވެސް އިއުލާން ކޮށްފައެވެ.
ސްރީލަންކާއަކީ އެކި ބޭނުންތަކުގައި ގިނަ އަދަދަކަށް ދިވެހިންވެސް ވަޒަންވެރިވެގެން ދިރިއުޅެމުން އަންނަ ގައުމަކަށް ވާ އިރު، ދިވެހި ރާއްޖޭގެ ފޮރިން މިނިސްޓްރީއިން ވަނީ ބުދަ ދުވަހުގެ ހަވީރުގެ ނިޔަލަށް، ހާލުގައި ޖެހިގެން އެއްވެސް ދިވެއްސަކު ދިވެހި ސަރުކާރުގެ އެހީއަށް އެދިފައި ނުވާކަން، ދަ ޕްރެސްއަށް ކަށަވަރު ކޮށްދީފައެވެ.
