ރަޝިއާގެ އަސްކަރީ ބާރުތަކުން މަސައްކަތް ކުރަމުން ދަނީ ޔޫކްރައިންގެ އާންމުން ގަސްތުގައި ނައްތާލުމަށް ކަމަށް، ރަޝިއާގެ ހަމަލާތައް އެންމެ ވަރުގަދަ ކޮށްފައި ވާ ޔޫކްރައިންގެ 2 ވަނައަށް އެންމެ ބޮޑު ސިޓީ ކަމަށް ވާ ހަރްކީވްގެ މޭޔަރު، އިހޯރް ތެރެކޯވް ވިދާޅުވެއްޖެއެވެ.
މަދަނީ ސަރަހައްދުތަކަށް އަމާޒުކޮށްގެން ރަޝިއާއިން ހަމަލާ ދެމުން ދާ ކަން ފާހަގަ ކުރައްވާ ތެރެކޯވް ވިދާޅުވީ، ހާލަތު އިންތިހާއަށް ދަތިވެފައި ވާ ކަމަށެވެ. މެދުކެނޑުމެއް ނެތި ބޮން އަޅަމުން ދިއުމުގެ ސަބަބުން ހަރްކީވްއަށް ބޮޑު އަސަރެއް ކޮށްފައި ވާ ކަމަށް މޭޔަރު ވިދާޅުވިއެވެ. މަތިންދާ ބޯޓުތައް މެދުކެނޑުމެއް ނެތި އުދުހެމުން ދާ ކަމަށާ، ރޮކެޓާއި ގްރެނޭޑް ހަމަލާތައްވެސް ދެމުން ދާ އިރު، ހަމަލާ އަމާޒު ވަނީ އާންމުން ދިރިއުޅޭ ގެތަކަށް ކަމަށްވެސް ތެރެކޯވް ވަނީ ފާހަގަ ކުރައްވާފައެވެ.
ތެރެކޯވް ވިދާޅުވީ އާންމުން ދިރިއުޅޭ ބްލޮކްތަކުގައި ޔޫކްރައިންގެ އަސްކަރީ ފައުޖުތައް މަރުކަޒު ކޮށްފައި ނުވާ ކަމަށެވެ. އޭގެ މާނައަކީ، އާންމުން ދިރިއުޅޭ އިމާރާތްތަކަށް ރަޝިއާއިން ހަމަލާ ދެނީ ގަސްދުގައި އަމާޒު ކޮށްގެން ކަމަށް ތެރެކޯވް ވަނީ ވިދާޅުވެފައެވެ.
ތެރެކޯވް ވިދާޅުވީ އާންމުންގެ ގިނަ ބައެއްގެ ފުރާނަ ގެއްލިފައި ވާ ކަމަށާ، އަދި ގިނަ ބަޔަކު ޒަހަމް ވެގެން ހޮސްޕިޓަލުގައި ފަރުވާ ހޯދާ ކަމަށެވެ.
ޔޫކްރައިންގެ ސްޓޭޓް އެމާޖެންސީ ސާވިސާސް އިން ބުރާސްފަތި ދުވަހު އާންމު ކުރި މައުލޫމާތަށް ބަލާއިރު ހަރްކީވް ސަރަހައްދުން 24 ގަޑިއިރުގެ ތެރޭގައި 34 އާންމު ރައްޔިތެއްގެ ފުރާނަ ގެއްލި، 285 މީހަކު ވަނީ ޒަހަމް ވެފައެވެ.
