އިގުތިސޯދީ އަދި މާލީ ގޮތުން އިނދަޖެހިފައި ވާ އަވަށްޓެރި ސްރީލަންކާއިން ގިނަ އަދަދެއްގެ ބޭރު ފައިސާ ހިފައިގެން ދުބާއީއަށް ފުރަން މަސައްކަތް ކުރި 5 ފަސެންޖަރަކު ބަންޑާރަނަޔަކަ އިންޓަނޭޝަލް އެއާޕޯޓް (ބީއައިއޭ) އިން ހިފަހައްޓައިފިއެވެ.
ބީއައިއޭގައި ހަރަކާތްތެރިވާ ކަސްޓަމްސް ނާކޮޓިކްސް ޑިވިޝަނުން މި 5 ފަސެންޖަރުން ހައްޔަރު ކުރި އިރު އެމީހުން ދިޔައީ، ގާޓްގަނޑަކަށް 25 މިލިއަން ސްރީލަންކަން ރުޕީޒްއަށް ވާ ބޭރު ފައިސާ، އެ ގައުމުން ބޭރު ކުރުމުގެ މަސައްކަތް ކުރަމުން ކަމަށް ލަންކާ ކަސްޓަމްސްގެ ތަރުޖަމާނަކު ވަނީ ވިދާޅުވެފައެވެ.
ހައްޔަރު ކުރި 5 ފަސެންޖަރުންގެ އަތުން ފެނުނު ފައިސާގެ ތެރޭގައި 95000 އެމެރިކާ ޑޮލަރާއި، 18000 ޔޫރޯ އަދި 37000 ސައުދީ ރިޔާލުވެސް ހިމެނެއެވެ.
ކަސްޓަމްސްގެ ތަރުޖަމާނު ވިދާޅުވީ، އެ 5 ފަސެންޖަރުންވެސް ހައްޔަރު ކޮށްފައި ވަނީ ދިގު ދެމިގެން ދިޔަ ތަހުގީގުތަކަކަށް ފަހުގައި ކަމަށެވެ.
މި ދަނޑިވަޅަކީ ސްރީލަންކާގެ ބޭރު ފައިސާގެ ރިޒާވް އިންތިހާއަށް ދަށްވެ، ޑޮލަރުން ލިބުން ދަތިވެ، އެ ގައުމުގެ ޒަރޫރީ ހިދުމަތްތަކަށް އިންތިހާއަށް ބުރޫ އަރަމުންދާ ދަނޑިވަޅެކެވެ.
