ރާއްޖެއިން ބޭރުގައި ތަމްރީނު ހަދަމުން ދިޔަ އއ. ހިމަންދޫ ރޯސް މީޑް، އުމުރުން 22 ގެ ލާންސް ކޯޕްރަލް މުހައްމަދު ސުލްތާން މަރުވީ މިއަދު މެންދުރު އޮތް ޓްރޭނިންގައި ދުވަމުން ދަނިކޮށް ވެއްޓިގެން ކަމަށް އެމްއެންޑީއެފުން ބުނެފިއެވެ.
އިންޑިއާގެ ޕޫނޭގައި ހުންނަ ނޭޝަނަލް ޑިފެންސް އެކަޑެމީގައި ތަމްރީނު ހަދަމުން ދަނިކޮށް މަރުވި ދިވެހި ސިފައިންގެ މީހާ ލާންސް ކޯޕްރަލް މުހައްމަދު ސުލްތާން މަރުވުމާ ގުޅިގެން އެމްއެންޑީއެފުން ބުނީ، އޭނާ މަރުވެފައި ވަނީ ނޭޝަނަލް ޑިފެންސް އެކަޑެމީގެ، ކޭމްޕް ގްރީންހޯންގައި މިއަދު އޮތް އެންޑިއުރެންސް ރަންއެއް ފުރިހަމަ ކުރަން އުޅުމުގެ ތެރޭގައި ކަމަށެވެ.
މިއަދު މެންދުރުފަހު އޮތް އެ ދުވުމުގެ ތެރޭގައި ލާންސް ސުލްތާނު ވެއްޓުނު ކަމަށާއި އަދި ވަގުތުން އެމަޖެންސީގައި 1:58 ހާއިރު ވަނީ ހޮސްޕިޓަލަށް ގެންގޮސްފައި ކަމަށް އެމްއެންޑީއެފުން ބުނެއެވެ. ހޮސްޕިޓަލަށް ގެންދިޔަ އިރު ވެސް އޭނާ ވަނީ މަރުވެފައި ކަަމަށް އެމްއެންޑީއެފުން މައުލޫމާތު ދެއެވެ.
ސުލްތާން އެމްއެންޑީފާ ގުޅިފައި ވަނީ އޭޕްރީލް 8، 2018 ގައެވެ. އިންޑިއާގައި އޭނާ ފުރިހަމަ ކުރަމުން ދިޔައީ މާޗް 1، 2021 އިން މާޗް 15، 2024 އަށް ޕޫނޭ ނޭޝަނަލް ޑިފެންސް އެކެޑެމީގައި ކުރިއަށް ގެންދިޔަ 145 ވަނަ އޮފިސަ ކެޑޭޓް ކޯހެވެ. މިކޯހަށް ދިއުމުގެ ކުރިން އޭނާ މަސައްކަތް ކޮށްފައި ވަނީ އިންޓަގްރޭޓެޑް ހެޑްކްއޯޓާޒް (ޖޭ-1) ގައެވެ.
ލާންސް ކޯޕްރަލް ސުލްތާނައަށް ލާންސް ކޯޕްރަލް ކަމުގެ ރޭންކް ލިބިފައި ވަނީ މި ކޯސް ފުރިހަމަ ކުރަމުން ދަނިކޮށް ކަމަށް އެމްއެންޑީއެފުން ބުނެއެވެ.
މިހާރު އޭނާގެ ހަށިގަނޑު މާލެ ގެނައުމުގެ މަސައްކަތް ކުރަމުންދާ ކަމަށް އެމްއެންޑީއެފުން ބުނެއެވެ.
