މިނިސްޓްރީ އޮފް އެންވާރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ ގެ ފަރާތުން ދިވެހި ރާއްޖެގައި ކަރަންޓު އާލާތުގެ ހަކަތަ ސަމަކާރަ މިންވަރު ދެނެގަނެވޭނޭ ލޭބަލް ޖެހުމުގެ ޕްރޮގްރާމެއް "ހަކަތަރި" ޕްރޮގްރާމުގެ ނަމުގައި ތައާރަފުކޮށް މިއަދު އިފްތިތާހު ކޮށްފިއެވެ.
މިނިސްޓްރީން ބުނީ އެ ޕުރޮގުރާމުގެ މަގްސަދަކީ ރާއްޖެއަށް އެތެރެ ކުރާ ކަރަންޓު ސާމާނަކީ ވަކި ފެންވަރެއްގެ، ހާއްސަ މިންގަނޑުތަކަކަށް ފެތޭ ތަކެތިކަން ޔަގީންކޮށް، އާންމުންނަށް އެތަކެތި ވަކިކުރެވޭނެ ނިޒާމެއް ގާއިމްކުރުން ކަމަށެވެ.
އެ ޕްރޮގްރާމު އިފްތިތާހުކޮށްދެއްވީ މިނިސްޓާ އޮފް އެންވާރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އޮނަރަބަލް އައިމިނަތު ޝައުނާ ކަމަށް މިނިސްޓްރީން ބުނެއެވެ.
ޝައުނާގެ ވާހަކަގައި ހަކަތަރި ލޭބަލިން ޕްރޮގްރާމުގެ ސަބަބުން، ހަކަތައަށް ކުރެވޭ ހޭދަ އިގްތިސާދު ކުރުމަށް މަގުފަހިވެގެން ދާނެ ކަމަށް އުންމީދު ކުރައްވާ ކަމަށާ ރާއްޖޭއިން އަމާޒު ހިފާފައިވާ މޫސުމަށް އަންނަ ބަދަލުތަކުގެ އަމާޒުތަކަށް ވާސިލުވުމަށް ކުރެވޭ މަސައްކަތްތަކަށް ވެސް ކުރިއެރުން ލިބިގެންދާނެ ކަމަށް ވިދާޅުވިއެވެ.
އޭގެ އިތުރުން ކަރަންޓު އާލާތްތަކުގައި ހަރުކުރާ އެ ލޭބަލަކީ ކަރަންޓު މަދުން ބޭނުންކުރާ އާލާތްތައް ދެނެގަތުމަށް ފަސޭހަ ކުރުމަށާ އެފަދަ އާލާތްތަކުން ކަރަންޓު ބޭނުންކުރާ މިންވަރާ ގުޅޭ ސައްހަ މައުލޫމާތު އަންގައިދިނުމުގެ މަގްސަދުގައި ހަރުކުރާ ލޭބަލެއް ކަމަށް ޝައުނާ ވިދާޅުވިއެވެ.
މިނިސްޓްރީން ބުނީ ހަކަތަރި ލޭބަލިން ޕްރޮގްރާމު ހިންގުމަށް ހަމަޖެހިފައިވަނީ އިމްޕޯޓު ކުރާ ފަރާތްތަކުން އެޕްރޮގްރާމުގައި ބައިވެރިވުމަށް އެދިގެން ކަމަސާ އަދި ޕްރޮގްރާމުގެ ދަށުން ފުރަތަމަ ލޭބަލް ޖެހުމަށް ހަމަޖެހިފައިވަނީ އައިސްއަލަމާރި، އޮޓޮމެޓިކް ދޮންނަމެޝިން އަދި އެއާކޮންޑިޝަނާގައި ކަމަށެވެ.
އެތަކެތި ރާއްޖެއަށް އެތެރެކުރުމުގެ ކުރިން އެ ތަކެއްޗަކީ ރާއްޖޭގެ އެނާޖީ އެފިޝަންސީ މިންގަނޑަށް ފެތޭ ތަކެތިތޯ ބަލާ، ލޭބަލްޖެހުމުގެ ހުއްދަ ހޯދަން ޖެހޭނެ ކަމަށް މިނިސްޓްރީން ބުނެއެވެ. އަދި ރާއްޖެއަށް އެތެރެކުރާއިރު ހުންނާނީ ހުއްދަ ދީފައިވާގޮތުގެ މަތިން އެތަކެތީގައި ލޭބަލް ހަރުކުރެވިފައި ކަމަށް ވެސް މިނިސްޓްރީން ވަނީ ބުނެފައެވެ. މިނިސްޓްރީން ބުނީ ކަރަންޓު ބޭނުންކުރާ މިންވަރާ ހަކަތަ ސަމަކާރަ މިންވަރު އަންގައިދޭ ސަމަކާރަ ލޭބަލް ހުންނާނީ އެކަކުން ފެށިގެން ފަހަކާ ހަމައަށް ދަރަޖަ ގިންތި ކޮށްފައި ކަމަށެވެ.
އެގޮތުން އެންމެ ފުރަތަމަ ދަރަޖައިގެ ލޭބަލް އަކީ ހަކަތަ ސަމަކާރަ މިންގަނޑަށް ފެތޭ އެންމެ ދަށްމިންވަރު އަންގައިދޭ ލޭބަލެއް ކަމަށާ ފަސްވަނަ ދަރަޖައިގެ ލޭބަލަކީ ހަކަތަ ސަމަކާރަ މިންގަނޑުގެ އެންމެ މަތީ ދަރަޖަ އަންގައިދޭ ލޭބަލެއް ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ހަކަތަރި ލޭބަލިން ޕްރޮގްރާމު އެކުލަވާލާފައި ވަނީ ގްލޯބަލް އެންވާރަމަންޓް ފެސިލިޓީ (ޖެފް) ގެ އެހީއާއެކު އ.ދ ގެ ތިމާވެއްޓާބެހޭ ޖަމްއިއްޔާ ޔުނައިޓެޑް ނޭޝަންސް އެންވާރަމަންޓް ޕްރޮގްރާމް (ޔޫއެން އެންވާރަމަންޓް) އާ ގުޅިގެން މިނިސްޓްރީން ހިންގަމުން އަންނަ "ސްޓްރެންތެނިން ލޯ ކާބަން އެނާޖީ އައިލެންޑް ސްޓްރެޓެޖީސް" މަޝްރޫއުގެ ދަށުން ކަމަށެވެ.
އެމަޝްރޫއުގެ މައިގަނޑު މަގްސަދަކީ، އިމާރާތްތަކުން ޖައްވަށްބޭރުކުރެވޭ ވިހަގޭސް (ގްރީންހައުސް ގޭސް) މަދުކޮށް އެދާއިރާއިން ހަކަތަ އިސްރާފްކުރުން މަދުކުރުރުމާ އަދި ތިމާވެއްޓާ ރައްޓެހިގޮތުގައި ހަކަތަ ބޭނުން ކުރުން އިތުރުކުރުން ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ދިރިއުޅުމުގައި ބޭނުންކުރާ ތަފާތު ބާވަތުގެ ކަރަންޓު އާލާތްތަކުގެ ސަބަބުން ދިރިއުޅުމުގެ މަސައްކަތްތައް ފަސޭހަވީ ނަމަވެސް ކަރަންޓު ހަރަދު ބޮޑުވެގެން ދިއުމަކީ އެކަމުގެ ސަބަބުން ތަކުލީފު ތަކެއް ވެސް ކުރިމަތިވާ ކަމަކެވެ.
އެހެންކަމުން ހަކަތަރި ޕްރޮގްރާމުގެ އެހީގައި ކަރަންޓު އާލާތްތައް ހޯދުމުގައި ހަކަތަރި ލޭބަލުގައިވާ މައުލޫމާތުގެ އަލީގައި ސަމަކާރަ ތަކެތި ހިޔާރުކުރުމަކީ ވަރަށް މުހިންމު ކަމެއް ކަމަށް މިނިސްޓްރީން ބުނެއެވެ.
