ފަލަސްތީނުގައި އިންސާނީ ހައްގުތަކަށް ވަކާލާތު ކުރުމުގައި އެންމެ އިސްކޮށް ހަރަކާތްތެރި ވަމުން އަންނަ އެއްމާބަނޑު ދެބެން ކަމަށް ވާ، މުނާއާއި މުހައްމަދު އަލް-ކުރްދު، ޓައިމް މެގަޒިން އިން ހޮވާ، އަހަރުގެ އެންމެ ނުފޫޒުގަދަ 100 މީހުންގެ ލިސްޓުން ޖާގަ ހޯދައިފިއެވެ.
އަލް-ކުރްދުގެ ދެބެންނާއި އެ މީހުންގެ އާއިލާއަކީ، އިޒްރޭލުގެ ލާއިންސާނީ ޔަހޫދީން ވެރިވެގަތުމަށް މަސައްކަތް ކުރަމުން އަންނަ، އިރުމަތީ ގުދުސްގެ އަވަށެއް ކަމަށް ވާ ޝައިހް ޖައްރާގައި ގެދޮރު ގެއްލުމުގެ ބިރާ ކުރިމަތިވެފައި ވާ ބައެކެވެ.
ޝައިހް ޖައްރާގައި އެތައް އަހަރެއް ވަންދެން ވަޒަންވެރިވެގެން އުޅުނު ފަލަސްތީނުގެ އާއިލާތައް ގެތަކުން ނެރުމާ ދެކޮލަށް، އިޒްރޭލުގެ ހުދުމުހުތާރު ކަމުން ހިންގަމުން އަންނަ މަޝްރޫއާ ދެކޮޅަށް ބައިނަލްއަގުވާމީ ފެންވަރުގައި ހިންގާ ކެމްޕޭންގެ މޫނު ކަމުގައި ވެފައި ވަނީވެސް މުނާއާއި މުޙައްމަދު އަލް-ކުރްދުއެވެ.
އިޒްރޭލުގެ ޔަހުދީ ބާރުތަކުން މިދިޔަ ޖޫން މަހު ވަނީ، އެތައް ގަޑިއިރެއް ވަންދެން މި ދެބެން ހައްޔަރުކޮށް، ސުވާލު ކޮށްފައެވެ.
މުނާއާއި މުޙައްމަދު އަލް-ކުރްދުއާ ބެހޭ ގޮތުން ޓައިމް މެގަޒިންއިން ބުނެފައި ވަނީ، އިޒްރޭލުގެ އަޅުވެތިކަމުގެ ދަށުގައި އިރުމަތީ ގުދުސްގެ ރަށްވެހިން ދިރިއުޅެމުން އަންނަ ގޮތް، މި ދެބެންގެ އޮންލައިން ޕޯސްޓްތަކުގައި، މީޑިއާ ކެމްޕޭންތަކުން ފެނިގެން ގޮސްފައިވާ ކަމަށެވެ. މިކަމުގެ ސަބަބުން، އިޒްރޭލާއި ފަލަސްތީނުގެ މައްސަލާގައި، ދުނިޔެ ދެކެމުން އައި ގޮތަށްވެސް ބަދަލުތަކެއް ގެނުވަން އެހީއަކަށް ވީ ކަންވެސް ޓައިމް މެގަޒިން އިން ވަނީ ފާހަގަ ކޮށްފައެވެ.
ޓައިމް މެގަޒިން އިން ކޮންމެ އަހަރަކުވެސް ހޮވާ އެންމެ ނުފޫޒުގަދަ 100 މީހުންގެ ލިސްޓުން ޖާގަ ލިބުމާ ބެހޭ ގޮތުން އާންމު ކޮށްފައި ވާ ބަޔާނެއްގައި މުޙައްމަދު ބުނެފައި ވަނީ، މިއީ އެދެވޭ ކުރިއެރުމެއް ކަމަށާ، ނަމަވެސް، ރަމްޒީ މަސައްކަތަކީ، ފަލަސްތީނުގެ މައްސަލައަށް އޮތް ހަގީގީ އެހީއެއް ނޫން ކަމަށެވެ.
ޓައިމް މެގަޒިން އިން ހޮވާ އެންމެ ނުފޫޒު ގަދަ މީހުންގެ ލިސްޓު އެކުލަވާލަނީ، ކާރިސާތަކެއްގެ ތެރެއިން، އުޖާލާ މުސްތަގުބަލެއް ބިނާ ކުރަން މަސައްކަތް ކުރާ އާދަޔާ ހިލާފު ލީޑަރުންގެ ދަރަޖަ ދެމުންނެވެ.
މި ލިސްޓުގައި ހިމެނޭ އިތުރު މޫނަކަށް ބަލާއިރު، މީގެ މަހެއްހާ ދުވަސް ކުރިން އަފްގާނިސްތާނުގެ ކޮންޓްރޯލް ނަގާ، އިންތިގާލީ ސަރުކާރެއް އިއުލާން ކުރި ތޯލިބާން ޖަމާއަތުގެ ބާނީއެއް ކަމަށް، މުއްލާ ޢަބްދުލް ޣަނީ ބަރާދަރުވެސް ހިމެނެއެވެ. ބަރާދަރަކީ، ތޯލިބާނުންގެ އިންތިގާލީ ސަރުޚާރުގެ ވަގުތީ، ނައިބު ބޮޑުވަޒީރެވެ.
މީގެ އިތުރުން، އިނގިރޭސި އަމީރު ހެރީއާއި އަންހެނުން މޭގަން މާކެލް އަދި އެމެރިކާގެ ޕޮޕް ސްޓާ ބްރިޓްނީ ސްޕިއާޒްވެސް މި ލިސްޓުން ވަނީ ޖާގަ ހޯދާފައެވެ. ސިޔާސީ ނަންތަކެއްވެސް މި ލިސްޓުގައި ހިމެނޭއިރު، އޭގެ ތެރޭގައި، އެމެރިކާގެ ރައީސް ޖޯ ބައިޑަން، ނައިބު ރައީސާ ކަމަލާ ހެރިސް އަދި އެމެރިކާގެ ކުރީގެ ރައީސް ޑޮނާލްޑް ޓްރަމްޕް ހިމެނިވަޑައިގަންނަވައެވެ.
ވަކި ތަރުތީބެއް ނެތް ގޮތަށް އެންމެ ނުފޫޒުގަދަ 100 މީހުންގެ ނަން ބަޔާން ކުރާ މި ލިސްޓުން، 54 އަންހެނަކު ވަނީ ޖާގަ ހޯދާފައެވެ.
