އއ. ބޮޑުފުޅުދޫގައި ގާތުން ކިރު ދެނިކޮށް 1 މަހާއި 5 ދުވަހުގެ ތުއްތު ކުއްޖަކު މަރުވެއްޖެއެވެ.
"ދަ ޕްރެސް" އަށް މިކަމާއި ގުޅިގެން މައުލޫމާތު ދެއްވަމުން ބޮޑުފުޅުދޫ ކައުންސިލްގެ ރައީސް ސުޖާއު އާދަމް ވިދާޅުވީ މި ހާދިސާ ހިނގާފައިވަނީ އިއްޔެ މެންދުރު ގާތްގަނޑަކަށް 11:30 ހާއިރު ކަމަށެވެ.
އެ ހާދިސާ ހިނގީ އެއް މަހުގެ ތުއްތު ކުއްޖާއަށް ގާތުން ދިނުމަށް އެ ކުއްޖާގެ މަންމަ އޮށޯވެގެން އޮއްވާ ނިދުނު ވަގުތުގައި ކަމަށް ސުޖާއު ވިދާޅުވިއެވެ. އަދި އެ ކުއްޖާގެ މަންމައަށް ހޭލެވުނުއިރު ކުއްޖާ އޮތީ ހޮޑުލެވި، ނޭފަތުން ލޭ ވެސް އައިސްފައިވާ ކަމަށް ސުޖާއު ވިދާޅުވިއެވެ.
އާއިލާ އިން ކުއްޖާ ހޮސްޕިޓަލަށް ގެންދިޔަ އިރު ވެސް އެ ކުއްޖާ އޮތީ މަރުވެފައި ކަމަށް ކައުންސިލްގެ ރައީސް ވަނީ ވިދާޅުވެފައެވެ.
ފުލުހުންނަށް މި މައްސަލަ ހުށައަޅާފައިވާ ކަން ސުޖާއު ވަނީ ފާހަގަކުރައްވާފައެވެ.
މައުލޫމާތު ލިބިފައިވާ ގޮތުން އެ ކުއްޖާ މަރުވީ ފުއްޕާމެއަށް ކިރު އެޅިގެން ނޭވާ ނުލެވިގެންނެވެ.
