އަންނަ މަހު 1 އިން 16 އަށް ބާއްވާ ސާފް ޗެމްޕިއަންޝިޕަށް ތައްޔާރުވާ ރާއްޖޭގެ ގައުމީ ޓީމުގެ ކޯޗު އަލީ ސުޒޭން ކޮވިޑް-19 އަށް ޕޮޒިޓިވް ވެއްޖެއެވެ.
ކޮވިޑަށް ޕޮޒިޓިވްވުމުން ސުޒޭން މިހާރު ހުރީ ހޯމް ކަރަންޓީންގައެވެ. ސުޒޭން ޕޮޒިޓިވް ވި އިރު ގައުމީ ޓީމުގެ އެހެން ކުޅުން ތެރިން ވަނީ ކޮވިޑަށް ޓެސްޓް ހަދާފައެވެ. ނަމަވެސް ޓީމުގެ ކުޅުންތެރިންނާއި އެހެން ސްޓާފުންގެ ކޮވިޑް ޓެސްޓްގެ ނަތީޖާ ވަނީ ނެގެޓިވް ވެފައެވެ.
ސުޒޭން ޕޮޒިޓިވްވެ ކަރަންޓިންގައި ހުރި އިރު ކުރިއަށް އޮތް ސާފް ޗެމްޕިއަންޝިޕަށް ތައްޔާރު ވުމަށް ގައުމީ ޓީމް މާދަމާ ރޭ ގަތަރަށް ފުރުމަށް ވަނީ ހަމަޖެހިފައެވެ. އަދި އެ ޓީމް އެނބުރި މާލެއަށް އަންނަން ހަމަޖެހިފައި ވަނީ މި މަހުގެ 28 ވަނަ ދުވަހުއެވެ.
މި މުއްދަތުގައި ގައުމީ ޓީމްގެ ކޯޗު ސުޒޭން ކަރަންޓީންގައި ހޭދަކުރަން ޖެހޭތީ، ޓީމުގެ ޓްރޭނިންތައް ލީޑު ކުރަން ޓީމާއެކު ދާނީ އެސިސްޓެންޓް ކޯޗް އިސްމާއީލް މަހްފޫޒު (އިންމަ) އެވެ.
ރާއްޖެ ކުޅޭ ފުރަތަމަ މެޗު އޮކްޓޯބަރު 1 ވަނަ ދުވަހަށް ތާވަލުކޮށްފައި ވާއިރު ގައުމީ ޓީމް ވާދަކުރާނީ ނޭޕާލާއެވެ. ރާއްޖޭގެ ދެ ވަނަ މެޗު އޮކްޓޯބަރު 7 ވަނަ ދުވަހު ބާއްވަން ތާވަލް ކޮށްފައިވާ އިރު، އެ ދުވަހު ވާދަކުރާނީ ބަންގަލަދޭޝް އާއެވެ. ހަމައެއާއެކު ރާއްޖެ ވާދަކުރާ ތިން ވަނަ މެޗުގައި އޮކްޓޯބަރު 10 ގައި ކުޅުމަށް ހަމަޖެހިފައި ވަނީ ލަންކާއާ ދެކޮޅަށެވެ. އަދި އޮކްޓޯބަރު 13 ވަނަ ދުވަހު ރާއްޖެއާއި އިންޑިއާ ކުޅޭ މެޗު ވަނީ ތާވަލް ކޮށްފައެވެ.
