ކެފޭ އުސޫލުން މަސްތުވާތަކެތި ބޭނުން ކުރާ ތަންތަން ބަންދުކޮށް ފުލުހުން 24 ގަޑިއިރު ފޯރިމަރަން ފަށައިފިއެވެ.
ފުލުހުން ބުނީ އެ އުސޫލުން މަސްތުވާތަކެތި ބޭނުން ކުރާ 25 ތަނެއްގެ ވެރިފަރާތަށް މިހާރު ގާނޫނީ އިންޒާރު ދީފައިވާ ކަމަށެވެ.
މާލޭގައި ކެފޭ އުސޫލުން މަސްތުވާތަކެތި ބޭނުންކުރާ ކަމަށް ފާހަގަކުރެވިފައިވާ ތަންތަނަށް މީހުން ވަނަނުދީ އެކަން ހުއްޓުވުމަށް ހާއްސަ އޮޕަރޭޝަނެއް ފުލުހުން ވަނީ ފަށާފައެވެ. އެ އޮޕަރޭޝަން ފަށާފައި ވަނީ މިއަދު ހެނދުނު 7:00 ޖެހިއިރެވެ.
އެ ގޮތުން އެފަދަ ތަންތަނުގައި 24 ގަޑިއިރު ފުލުހުން ޑިއުޓީ ކުރަމުން ގެންދާނެ ކަމަށް ވަނީ ބުނެފައެވެ.
ކެފޭ އުސޫލުން މަސްތުވާތަކެތި ބޭނުން ކުރާ 8 މައްސަލައެއް ދައުވާ ކޮށްދިނުމަށް އެދި ޕީޖީ އަށް ހުށަހަޅާފައިވާ ކަމަށާއި އިތުރު 4 މައްސަލައެއްގެ ތަހުގީގު ނިންމާ ދައުވާ ކުރުމަށް މަސައްކަތް ކުރަމުން އަންނަ ކަމަށް ފުލުހުން ބުނެއެވެ. އަަދި 1 ގޭގެ މައްސަލަ މިހާރު ޕީޖީ އިން ވަނީ ވެރިފަރާތައް ދައުވާ ކުރުމަށް ކޯޓަށް ފޮނުވާފައެވެ.
މި މަހުގެ 2 ވަނަ ދުވަހު ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވީ ކެފޭ އުސޫލުން މަސްތުވާތަކެތި ބޭނުން ކުރުމަށް ދޫކޮށްފައި ހުރި ކަމަށް ބެލެވޭ މ. ބްރައިޓްފްލާވާ ނަމަކަށް ކިޔާ ގޭގައި އެކަން ހުއްޓުވުމަށް އެންގުމުން ވެސް އެކަން ހުއްޓުވާފައި ނުވާ ކަމަށެވެ.
މ. ބްރައިޓްފްލާވާ ހުސައިން ޔޫސުފްގެ މައްޗަށް ވަނީ ދައުވާ އުފުލާފައެވެ. މި ދައުވާ ކުރަން ޕީޖީން ވަނީ ސެޕްޓެންބަރު 2، 2021 ދުވަހު ކްރިމިނަލް ކޯޓުށް ހުށައަޅާފައެވެ.
ދައުލަތުން ހުސައިން ޔޫސުފްގެ މައްޗަށް ވަނީ މަސްތުވާތަކެއްޗާ ބެހޭ ގާނޫނުގެ ދަށުން ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ގާނޫނުގައިވާ މަސްތުވާއެއްޗެއް، ޓްރެފިކްކުރުމަށް ނުވަތަ ޕެޑެލްކުރުމަށް ނުވަތަ އުފެއްދުމަށް ނުވަތަ އެއިން ކަމެއް ކުރުމަށް ކަމަށް ގަބޫލުކުރެވޭ ހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެ ތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާ ފަރާތުން ހުއްދަ ދިނުން ނުވަތަ ހުއްދަކުރުމުގެ ކުށުގެ ދައުވާ އުފުލާފައެވެ.
މިއީ ކެފޭ އުސޫލުން މާލޭގައި މަސްތުވާތަކެތި ވިއްކާ މައްސަލައިގައި މަސްތުވާތަކެތީގެ ގާނޫނުގެ ދަށުން ގެއެއްގެ ވެރިފަރާތުގެ މައްޗަށް ދައުވާކުރެވުނު ފުރަތަމަ ފަހަރު ކަމަށް ވެސް ޕީޖީ އޮފީހުން ވަނީ ބުނެފައެވެ.
