މޯލްޑިވިއަންގެ ފްލައިޓެއް ހައިޖެކް ކުރާނެ ކަމަށް ބުނެ މީހަކު އިންޒާރު ދިން މައްސަލާގައި ހައްޔަރު ކުރި މީހާ ދޫކޮށްލައިފިއެވެ.
އެ މައްސަލަގެ ތުހުމަތުގައި ކޯޓު އަމުރެއްގެ ދަށުން ހައްޔަރު ކޮށްފައިވަނީ 34 އަހަރުގެ ދިވެހި ފިރިހެނެކެވެ.
"ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ އަދި އެމީހާ ދޫކޮށްލީ ބަންދުގައި ބަހައްޓައިގެން ތަހްގީގު ކުރިއަށް ގެންދިއުމާ މެދު ގޮތެއް ނިންމަން ފުވައްމުލަކު މެޖިސްޓްރޭޓް ކޯޓަށް އިއްޔެ ހާޒިރުކުރުމުން ކަމަށް ވެސް ފުލުހުން ބުނެއެވެ.
އަދި އެމީހާ ދޫކޮށްލާފައިވަނީ ޝަރުތުތަކަކާ އެކުގައި ކަމަށް ވެސް ފުލުހުން ވަނީ ބުނެފައެވެ.
ފުވައްމުލަކުން މާލެ އަންނަން އޮތް މޯލްޑިވިއަންގެ ފްލައިޓެއް ހައިޖެކް ކުރާނެ ކަމަށް ބުނެ މީހަކު އިންޒާރު ދިން މައްސަލަ ފުލުހުންނަށް ހުށަހަޅާފައި ވަނީ މިދިޔަ މަހު 30 ވަނަ ދުވަހު 8:50 ހާއިރު ކަމަށް ފުލުހުން ބުނެއެވެ.
ފުލުހުން ވަނީ އެމައްސަލަ ތަހުގީގު ކުރަމުންދާ ކަމަށް ބުނެފައެވެ.
މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލުމަށް ދިން ހަމަލާއާ ގުޅިގެން ސަލާމަތީ ހިދުމަތްތަކުގެ އެލާޓް ލެވެލް ވަނީ މަތިކޮށްފައެވެ.
އަދި ޓެރަރިޒަމަށް ހިތްވަރުދޭ ގޮތަށް ވާހަކަ ދައްކާ މީހުން ދަނީ ހައްޔަރު ކުރަމުންނެވެ.
