މިދިޔަ ބުދަދުވަހުގެ ހެނދުނު މާލޭ ހެންވޭރު ރޯޝަނީ ބިލްޑިން ކައިރީގައި ޒުވާނެއްގެ ކަރަށް ވަޅި ހެރި މައްސަލައާ ގުޅިގެން އެކަކު ހައްޔަރުކޮށް ޝަރީއަތް ނިމެންދެން ބަންދުކުރުމަށް އަމުރު ކޮށްފިއެވެ.
"ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ އޮގަސްޓް 25، ވަނަ ދުވަހުގެ ހެނދުނުގެ ވަގުތެއްގައި ރޯޝަނީ ބިލްޑިން ކައިރިން ޒުވާނެއްގެ ކަރަށް ވަޅި ހަރައިފައިވާ މައްސަލައިގައި އިއްޔެ 18 އަހަރުގެ ފިރިހެނަކު މާލެ އިން ހައްޔަރު ކޮށްފައިވާ ކަމަށެވެ.
އަދި މި މައްސަލައިގައި ހައްޔަރު ކުރެވުނު ފަރާތް، މައްސަލައިގެ ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރު ކޮށްފައިވާ ކަމަށް ވެސް ފުލުހުން މައުލޫމާތު ދެއެވެ.
މި ހާދިސާގައި އަނިޔާ ލިބިފައިވަނީ 21 އަހަރުގެ ދިވެހި ފިރިހެނަކަށެވެ. އަދި އެ ޒުވާނާގެ ހާލު ސީރިއަށް ކަމަށް އާއިއލާއިން ކުރިން މައުލޫމާތު ދީފައި ވެއެވެ.
މި ޒުވާނާއަށް ދިން ހަމަލާގައި އޭނާގެ ކަރުގެ ނާރުތަކާ ކާހޮޅި ބުރިވެފައިވާ ކަމަށް ވެސް އާއިލާއިން ވަނީ މައުލޫމާތު ދީފައެވެ.
