މަސްރަހު ނުތަނަވަސްވެފައިވާ އަފްގާނިސްތާނުގެ ވެރިރަށް، ކާބުލްއިން މީހުން ބޭލުމަށް ދަތުރުކުރި ޔޫކްރައިންގެ އަސްކަރީ މަތިންދާބޯޓެއް ހައިޖެކްކޮށް، އީރާނަށް ޖައްސާފައި ވާ ކަމަށް ވިދާޅުވެ، ޔޫކްރައިންގެ ޑެޕިއުޓީ ފޮރިން މިނިސްޓަރު ޔެވްގެނީ ޔެނިން ދެއްކެވި ވާހަކަތައް، ޔޫކްރައިންގެ ފޮރިން މިނިސްޓްރީގެ މަންދޫބަކު ދޮގު ކުރައްވައިފިއެވެ.
ޔޫކްރައިން ފޮރިން މިނިސްޓްރީގެ މަންދޫބު ވިދާޅުވީ، ޑެޕިއުޓީ މިނިސްޓަރު ޔެނިން މަސައްކަތް ކުރެއްވީ، ކޫބުލްއިން މީހުން ބޭލުމުގައި ޔޫކްރައިންގެ ޕައިލެޓުންނަށް ކުރިމަތިލާންޖެހިފައިވާ ގޮންޖެހުންތައް ތަފްސީލު ކޮށްދެއްވުމަށް ކަމަށެވެ.
ދަ ޖެރޫސެލަމް ޕޯސްޓާ ހަވާލާދީ، ބައިނަލްއަގުވާމީ މީޑިއާއިން ރިޕޯޓް ކުރާ ގޮތުގައި، އީރާންއާއި ޔޫކްރައިންއިންވެސް ވަނީ، އަފްގާނިސްތާނުން ދަތުރުކުރި ޔޫކްރައިންގެ ޖެޓެއް ހައިޖެކް ކުރި ކަމުގެ ވާހަކަތައް ދޮގު ކޮށްފައެވެ.
އީރާންގެ ސިވިލް އޭވިއޭޝަން އިދާރާއިންވެސް ހައިޖެކްގެ ވާހަކަ ދޮގު ކޮށްފައި ވާއިރު، އެ މަތިންދާބޯޓު އީރާނުގެ މަޝާދަށް ޖެއްސީ ތެޔޮ އެޅުމަށް ކަމަށް ވަނީ ބުނެފައެވެ. އަދި ތެޔޮ އެޅުމަށްފަހު، ޔޫކްރައިންގެ ވެރިރަށް، ކިއޭވްއަށް ދަތުރު ކޮށްފައި ވާ ކަމަށްވެސް އީރާންގެ ސިވިލް އޭވިއޭޝަން އިދާރާތަކުން ވަނީ ބުނެފައެވެ.
އަފްގާނިސްތާނުން މީހުން ބޭލުމަށް 3 ފްލައިޓެއް އޮޕަރޭޓް ކޮށް، 256 މީހަކު ބާލާފައި ވާ ކަމަށާ، މި ހުރިހާ ފްލައިޓެއްވެސް މިހާރު އޮތީ ޔޫކްރައިންގައި ކަމަށް އެ ގައުމުން ވާހަކަ ދެއްކި ތަރުޖަމާނު ވަނީ ވިދާޅުވެފައެވެ.
