އަފްގާން ރައްޔިތުންގެ ހިތުގައިވާ ބިރުވެރިކަން އެންމެ ތަސްވީރަކުން!

ފާއިތުވެ މިދިޔަ 48 ގަޑިއިރެއް ހާއިރު، މުޅި ދުނިޔޭގެ ސަމާލުކަން އެއް ކަމަކަށް ހުއްޓުވާލާފައި ވާ އެއް ކަމަކީ، އަފްގާނިސްތާނުގައި ނިއުޅެމުންދާ ނާމާން ކަމޭ ދެންނެވަމުން ދޮގަކަށް ނުވާނެއެވެ.

ހަތިޔާރު އެޅި ހަނގުރާމަވެރި ތޯލިބާނުންގެ އަތްދަށް، 20 އަހަރަށް ފަހު އެ ގައުމު އަނެއްކާ ގޮސްފައި ވާ އިރު، އެ ބިރުވެރިކަމުން ސަލާމަތްވުމަށް އަފްގާނިސްތާނުގެ ރައްޔިތުން ދައްކަމުން އަންނަ އާދަޔާ ހިލާފު ހިތްވަރުގެ މަންޒަރުތައް ދައްކުވާދޭ ތަސްވީރުތަކުން، އެންމެ ހަރު ހިލަ ހިތުގެ ވެރިޔާއަށްވެސް އަސަރު ތަކެއް ކުރުވާނެ ކަން ގައިމެވެ.

މިއީވެސް އެފަދަ ތަސްވީރެކެވެ. ބަލާބެލުމަށް ސިފަވަނީ، މެޑިޓަރޭނިއަން ކަނޑުގެ ސަރަހައްދުން، ރެފިއުޖީން ގޮވައިގެން ދަތުރު ކުރާ އާގުބޯޓެކެވެ. ނަމަވެސް، މި ފޮޓޯ ނަގާފައި ވަނީ ތޯލިބާނުންގެ ބާރުގެ ދަށަށް ގެންގޮސްފައި ވާ ވެރިރަށް ކާބުލްއިން އުދުއްސާލި، އެމެރިކާގެ އަސްކަރީ މަތިންދާ ބޯޓެއްގެ ތެރޭގައެވެ.

ރީޗް 871 ނުވަތަ ސީ-17 ގްލޯބްމާސްޓާ އަސްކަރީ މަތިންދާ ބޯޓުގައި، އަފްގާނިސްތާނަށް ނިސްބަތްވާ 640 މީހުން ތިއްބެވެ. އެއީ އެ ބޯޓުގެ ކެޕޭސިޓީއަށް ވުރެ 5 ގުނަ އިތުރު އަދަދެކެވެ. ނަމަވެސް، އެހެން ގޮތެއް ނެތި، ފުރާނަ އަތް މައްޗަށް ލައިގެން، ވައިގެ އުދުހުންތަކުގެ އުސޫލުތަކާ ހިލާފަށް އެ ބޯޓަށް އެރީއެވެ.

އަދި މާޔޫސްވެ، މުސްތަގުބަލުގެ އަލިކަން ގެއްލިފައި ތިބި އެ ރައްޔިތުން ބޯޓުން ނުބާލާ، އެ މީހުން ގޮވައިގެން އުދުހުމަށް ބޯޓުގެ ކުރޫއިންވެސް ނިންމިއެވެ. މި އެންމެނަކީވެސް އަފްގާނިސްތާނުގެ ފުރުމުގެ ހުއްދަ އޮތް މީހުން ކަމަށް މައުލޫމާތު ލިބެއެވެ.

ކާބުލްގެ ބައިނަލްއަގުވާމީ ވައިގެ ބަނދަރުން ރީޗް 871 އުދުއްސާލީ ރެކޯޑަކާވެސް އެކުގައެވެ. ސީ-17 މަރުކާގެ އަސްކަރީ މަތިންދާ ބޯޓުތަކަކީ އެމެރިކާއާއި އެމެރިކާއަށް ވާގިދޭ ގައުމުތަކުން ބޭނުން ކުރަމުން އަންނަތާ 30 އެއްހާ އަހަރު ވެފައިވާ މަތިންދާ ބޯޓުތަކެކެވެ. ނަމަވެސް، މިއީ، މިހާ ގިނަ އަދަދަކަށް މީހުން އަރުވައިގެން މީގެ ބޯޓެއް އުދުއްސާލި ފުރަތަމަ ފަހަރު ކަމަށް ބެލެވެއެވެ.

ރެކޯޑް އަދަދެއްގެ ފަސެންޖަރުންނާއެކު އުދުއްސާލި ފްލައިޓް، ކާމިޔާބުކަމާއެކު މިހާރު ވަނީ ގަތަރުގައި ޖައްސާފައެވެ.

އދގެ ސެކްރެޓަރީ ޖެނެރަލް، އެންޓޯނިއޯ ގުޓެރޭޒް ވަނީ، އަފްގާނިސްތާނުގެ ރައްޔިތުން ބާކީކޮށް، އެކަހެރި ނުކުރުމަށް ބައިނަލްއަގުވާމީ މުޖުތަމައަށް ގޮވާލައްވާފައެވެ. އެ ގައުމުތަކަށް އަންނަ އަފްގާނިސްތާނުގެ ރެފިއުޖީން ޑީޕޯޓް ނުކުރުމަށްވެސް ގުޓެރޭޒް ވަނީ އެދިވަޑައިގެންފައެވެ. އަފްގާނިސްތާނުގެ ރެފިއުޖީންނަށް މަރުހަބާ ކިއާނެ ކަން، މިހާރުވެސް ބައެއް ގައުމުތަކުން ވަނީ ހާމަކޮށްފައެވެ.