މާލޭގައި ދިމާވާ ދަތިތަަކަށް ހައްލު ހޯދައި ދިނުމަށްޓަކައި އެއްގަމު އުނޅަދު ފަހަރު ލިމިޓްކޮށް ގެންގުޅެވޭނެ އަދަދު ވަރަށް އަވަހަށް ކަނޑައަޅާނެ ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ މާލޭ ސިޓީން ރޭ މައްޗަން ގޯޅީގެ ރައްޔިތުންނާ ބައްދަލު ކުރުމަށް ޖަމާލުއްދީން ސްކޫލް ހޯލުގައި ބޭއްވި ބައްދަލުވުމުގައި ވާހަކަ ދައްކަވަމުންއެވެ.
މޭޔަރު ވިދާޅުވީ މާލޭގައި އެއްގަމު އުޅަނދުފަހަރު ގިނަވުމުގެ ސަބަބުން އާމުންނަށް ދިމާވާ އުނދަގޫތައް ވަރަށް ބޮޑަށް އިތުރުވެފައިވާ ކަމަށެވެ. އެ މައްސަލަ ހައްލު ކުރުމަށް މާލޭ ސިޓީގައި ގެންގުޅެވޭނެ އެއްގަމު އުޅަނދުފަހަރުގެ އަދަދު ވަރަށް އަވަހަށް ކަނޑައަޅުއްވާ އިއުލާން ކުރައްވާނެ ކަމަށް މުއިއްޒު ވިދާޅުވިއެވެ.
މި ބައްދަލުވުމުގައި ކައުންސިލްގެ ޕްލޭން ހުށަހަޅުއްވައި ރައްޔިތުންގެ ހިޔާލު ހޯދަވާފައި ވާ އިރު، މިހާރު ހިނގަމުންދާ ބައެއް މަޝްރޫއު ތަކުގެ ތަފްސީލް މުއިއްޒު ވަނީ ރައްޔިތުންނާ ހިއްސާ ކުރައްވާފައެވެ. އެގޮތުން މައްޗަން ގޯޅި ސަރަހައްދާ ގުޅޭ ގޮތުން އެ ސަރަހައްދުގެ މަގު ހެދުމުގެ މަޝްރޫއުތަކާއި ބިން ބޭނުން ކުރުމަށް ކުރެވިދާނެ ކަންތައްތަކާއި، ޕާކިން މައްސަލަތައް ހައްލުކުރަން ކުރެވޭނެ ކަންކަމުގެ މައުލޫމާތު މުއިއްޒު ވަނީ ހިއްސާ ކުރައްވާފައެވެ.
މި ބައްދަލުވުމަކީ މާލޭ ސިޓީގެ ތަރައްގީގެ ޕްލޭނާއި، ފައިނޭންޝަލް ޕްލޭނާއި، އަންނަ އަހަރަށް ލަފާކުރާ ބަޖެޓާއި، އެކްޝަން ޕްލޭނަށް ރައްޔިތުންގެ ހިޔާލު ހޯދުމަށް ބާއްވާ ބައްދަލުވުމެކެވެ. ރޭ މައްޗަންގޯޅީގެ ރައްޔިތުންނާ ބައްދަލުކޮށްފައިވާ އިރު މާދަމާ ރޭ ބައްދަލު ކުރުމަށް ހަމަޖެހިފައި ވަނީ މާފަންނުގެ ރައްޔިތުންނާއެވެ. ހެންވޭރުގެ ރައްޔިތުންނާ މި މަހުގެ 14 ވަނަ ދުވަހު ބައްދަލު ކުރަން ނިންމާފަިއވާ އިރު ހުޅުމާލެ ރައްޔިތުންނާ ބައްދަލު ކުރަން ނިންމާފައި ވަނީ މި މަހުގެ 22 ވަނަ ދުވަހެވެ.
އެގޮތުން ކުރިއަށް ޕްލޭންކޮށްފަިއވާ ބައްދަވުންތައް ބާއްވާނެ ތަން އިއުލާން ކުރާނެ ކަމަށް އެ ކައުންސިލުން ބުނެއެވެ.
