އެހެން ދީނެއް ރަމްޒުކޮށްދޭ ކުރެހުން ހިމެނޭ ޗޮކްލެޓެއް ވިއްކާކަމުގެ ޝަކުވާ ލިބުމާ ގުޅިގެން ފުލުހުން އެކަން ބަލަން ފަށައިފިއެވެ.
ފުލުހުން ބުނީ އެހެން ދީނެއް ރަމްޒު ކޮށްދޭ ކުރެހުމެއް ކުރަހާފައިވާ ޗޮކްލެޓެއް ވިއްކާކަމުގެ ޝަކުވާ ފުލުހުންނަށް ލިބިފައިވާ ކަމަށެވެ. އެ ޝަކުވާއާ ގުޅިގެން ކަމާ ގުޅުން ހުރި އެހެން އިދާރާތަކާއެކު އެކަމުގައި ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ވަނީ ބުނެފައެވެ.
މައުލޫމާތު ލިބިފައިވާ ގޮތުން އެ ޗޮކްލެޓަކީ ހިންދޫ ދީނަށް ކުޑަކުދިން ލޯބި ޖައްސައި ޕޮރޮމޯޓު ކުރުމަށް ހަދާފައިވާ ކާޓޫނު "ޗޯޓާ ބީމް" ގެ ޗޮކްލެޓެވެ.
އެހެން ނަމަވެސް ކޮން ދީނެއް ރަމްޒު ކޮށްދޭ ކުރެހުމެއް ކަމެއް އަދި ކޮން ނަމެއް ކިޔާ ޗޮކްލެޓެއް ކަމެއް ފުލުހުން ހާމައެއް ނުކުރެއެވެ.
"ޗޯޓާ ބީމް" ކާޓޫނަކީ ރާއްޖޭގައި ބްރޯޑްކާސްޓު ކުރުން މަނާކޮށްފައި ވާ، އަދި އެ ކާޓޫނު ދައްކާވަގުތު މީޑީއާނެޓުން އެ ކޮންޓެންޓު ބްލޮކްކުރަމުން އަންނަ ކާޓޫނެއްކަން ފާހަގަ ކޮށްލަން ޖެހެއެވެ.
ބާތިލް ދީންތަކާއި އަގީދާތަކުގެ އެއްވެސް އެއްޗެއް ވިއްކުމަކީ ރާއްޖޭގެ ދީނީ އެއްބައިވަންތަކަމާއި ބެހޭ ގާނޫނުން މަނާކަމެކެވެ.
