ދިއެފްއެމް ރޭޑިއޯގެ ކުރީގެ ސީއީއޯ އަދި މޯލްޑިވްސް މީޑިއާ ކައުންސިލް (އެމްއެމްސީ)ގެ ކުރީގެ މެންބަރު މަސްއޫދު ހިލްމީއަށް ހަމަލާދީ އިންޒާރުދިން މައްސަލައިގެ ތުހުމަތުގައި މީހަކު ހައްޔަރުކޮށްފިއެވެ.
ރޭ ސޯޝަލް މީޑިއާގައި އާންމުވި ވީޑިއޯއެއްގައި ފެންނަގޮތުންނަމަ މަސްއޫދު ސައިކަލެއްގައި ދަނިކޮށް އެހެން ސައިކަލެއްގައި އައި މީހަކު ވަނީ އޭނާއަށް ހަމަލާދީފަ، އެތަނުން ފިލާފައެވެ.
ފުލުހުން ބުނީ މާރާމާރީއާއި ގުޅިގެން ކޯޓް އަމުރެއްގެ ދަށުން 36 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށާއި އެމީހާ ހައްޔަރުކޮށްފައިވަނީ ރޭ ގާތްގަނޑަކަށް 02:18 ހާއިރު ކަމަށެވެ.
ފުލުހުން ބުނީ ރޭ ގާތްގަނޑަކަށް 21:13 ހާއިރު ދަނގަޑު ބުރިޔަކުން ހަމަލާ ދީ މާރާމާރީ ހިންގާފައިވާ މައްސަލައެއް ލ. ފޮނަދޫ ޕޮލިސް ސްޓޭޝަންއަށް ހުށައަޅައިފައިވާކަމަށެވެ.
މި މައްސަލައިގައި އަނިޔާވި މަސްއޫދަށް ފޮނަދޫ ހެލްތު ސެންޓަރުން ވަނީ ފަރުވާދީފައެވެ. މި މައްސަލަ މިހާރު ފުލުހުން ތަހުގީގު ކުރަމުންދާކަމަށެވެ.
މިއީ މަސްއޫދަށް އަމާޒުކޮށް މިގޮތަށް ހިނގައިދިޔަ ފުރަތަމަ ހާދިސާއެއް ނޫނެވެ. މީގެ ކުރިން މަސްއޫދުގެ ކާރުގައިވެސް ވަނީ ރޯކޮށްލާފައެވެ.
