މަކަރާ ހީލަތުން ފައިސާ ހޯދި މައްސަލައެއްގެ ތަހުގީގަށް މީހަކު ހޯދަން ފުލުހުން އިއުލާނުކޮށްފިއެވެ.
މި ތަހުގީގަށް ފުލުހުން ހޯދަމުންދަނީ ސ. މަރަދޫ، މީނާޒް އުމުރުން 43 އަހަރުގެ މައުމޫން ނާސީރެވެ.
މައުމޫން ނާސީރުގެ ފޮޓޮއާއެކު ފުލުހުން އާންމުކުރި އިއުލާނުގައި ވަނީ އޭނާ ހޯދަމުންދަނީ މަކަރާއި ހީލަތުން ފައިސާ ހޯދުމުގެ މައްސަލައެއްގެ ތަހުގީގަށް ހާޒިރުކުރުމަށް ކަމަށެވެ. އަދި މައުމޫން ނާސީރު މިހާރު ދިރިއުޅޭ ވަކިތަނެއް ނޭނގޭ ކަމަށާ މިކަމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދު ކުރެވިފައި ނުވާތީ ކަމަށް ވެސް ފުލުހުން ބުނެފަވެއެވެ.
ފުލުހުން ބުނީ މި މައްސަލައިގައި އަމަލު ކުރަނީ ޖިނާއީ މައްސަަތައް ތަހުގީގު ކުރުމުގައި ފުލުހުން އަމަލުކުރާނެ އިޖުރާތުގެ ގަވާއިދުގެ 27 ވަނަ މާއްދާގައިވާ ގޮތުގެ މަތިން ތަހުގީގަށް ހާޒިރުވުމަށް އަންގައި އިއުލާނުކުރުން ކަމެވެ.
މައުމޫން ނާސީރު ފުލުހަށް ހާޒިރު ކުރަނީ ތަހުގީގު ކުރަމުން ގެންދާ މަކަރާއި ހީލަތުން ފައިސާ ހޯދުމުގެ މައްސަލައަކާ ގުޅިގެން ސުވާލުކުރުމަށް ކަމަށް ވެސް ފުލުހުން ބުނެއެވެ.
އަދި މި މައްސަލައިގައި މައުމޫން ނާސީރު ފުލުހަށް ހާޒިރުވާންޖެހޭނީ އޯގަސްޓް 10، 2021 ވަނަ ދުވަހުގެ 11:00 އަށް ޝަހީދު ހުސައިން އާދަމް ބިލްޑިން އަށެވެ.
