މަކަރާ ހީލަތުން ފައިސާ ހޯދި މައްސަލައެއްގެ ތަހުގީގަށް މީހަކު ހޯދަން ފުލުހުން އިއުލާނުކޮށްފިއެވެ.

މި ތަހުގީގަށް ފުލުހުން ހޯދަމުންދަނީ ހއ ބާރަށް، ކޭސީވިލާ އުމުރުން 36 އަހަރުގެ އިބްރާހިމް ރަޝީދެވެ.

އިބްރާހީމް ރަޝީދުގެ ފޮޓޮއާއެކު ފުލުހުން އާންމުކުރި އިއުލާނުގައި ވަނީ އޭނާ ހޯދަމުންދަނީ މަކަރާއި ހީލަތުން ފައިސާ ހޯދުމުގެ މައްސަލައެއްގެ ތަހުގީގަށް ހާޒިރުކުރުމަށް ކަމަށެވެ. އަދި އިބްރާހީމް ރަޝީދު މިހާރު ދިރިއުޅޭ ވަކިތަނެއް ނޭނގޭ ކަމަށާ މިކަމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދު ކުރެވިފައި ނުވާތީ ކަމަށް ވެސް ފުލުހުން ބުނެފަވެއެވެ.

ފުލުހުން ބުނީ މި މައްސަލައިގައި އަމަލު ކުރަނީ ޖިނާއީ މައްސަަތައް ތަހުގީގު ކުރުމުގައި ފުލުހުން އަމަލުކުރާނެ އިޖުރާތުގެ ގަވާއިދުގެ 27 ވަނަ މާއްދާގައިވާ ގޮތުގެ މަތިން ތަހުގީގަށް ހާޒިރުވުމަށް އަންގައި އިއުލާނުކުރުން ކަމެވެ.

އިބްރާހީމް ރަޝީދު ފުލުހަށް ހާޒިރު ކުރަނީ ޖޫން 5، 2021 ވަނަ ދުވަހު މީހަކަށް ގުޅައިގެން މަކަރާ ހީލަތުން 60،186 ރުފިޔާ ހޯދާފައިވާކަމަށް ތުހުމަތުކުރެވޭ މައްސަލައިގައި ސުވާލު ކުރުމަށް ކަމަށް ވެސް ފުލުހުން ބުނެއެވެ.

އަދި މި މައްސަލައިގައި އިބްރާހީމް ރަޝީދު ފުލުހަށް ހާޒިރުވާންޖެހޭނީ އޯގަސްޓް 8، 2021 ވަނަ ދުވަހުގެ 16:00 އަށް ޝަހީދު ހުސައިންއާދަމް ބިލްޑިން އަށެވެ.

ހަބަރު ޕޮލިސް