ޓޯކިޔޯ އޮލިމްޕިކްސްގެ 100 މީޓަރު ސްޕްރިންޓުގެ ޕްރިލިމިނަރީ ބުރުގައި ވާދަކުރި ރާއްޖޭގެ ހަސަން ސާއިދު ހަތަރު ވަނަ ހޯދައިފިއެވެ.
ސާއިދު އެ ރޭސް ނިންމީ 10.70 ސިކުންތުންނެވެ.
ސާއިދު ވާދަކުރި ހީޓުން އެއް ވަނަ ހޯދި ޒިމްބާބްވޭގެ މަކްޝާ ނޮގާނީ ރޭސް ނިންމީ 10.32 ސިކުންތުންނެވެ. އަދި ދެ ވަނަ ހޯދި ދުވުންތެރިޔާ ރޭސް ނިންމީ 10.57 ސިކުންތުންނެވެ. ތިން ވަނައިގައި ރޭސް ނިންމީ ނިކަރާގްއާގެ އެތުލީޓު، ޔެކިލް އެލިއުތު ރޮމޭރޯއެވެ. އެއީ 10.67 ސިކުންތުންނެވެ.
ފަސް ވަނަ ބެލީޒުގެ އެތުލީޓް ޝައުން ގިލް ހޯދިއިރު އޭނާ އެރޭސް ނިންމީ 10.88 ސިކުންތުންނެވެ. ހަ ވަނަ ހޯދި ކެމްބޯޑިއާގެ ސޯކޮންގް ޕެން ރޭސް 11.02 ސިކުންތުން ނިންމިއިރު ހަތް ވަނަ ހޯދި އަފްގާނިސްތާންގެ ނޫރު މުހައްމަދު ޝާހް ޒާހީ ރޭސް ނިންމީ 11.04 ސިކުންތުންނެވެ.
އަށް ވަނަ ކިރީބާސްގެ އެތުލީޓު ލަޓައިސީ މޮޔެއާ ހޯދީ 11.25 ސިކުންތުން ރޭސް ނިންމާގެންނެވެ. އަދި ނުވަ ވަނަ ހޯދި އެމެރިކަން ސަމާއޯގެ ނޭތަން ކްރަމްޓަން ރޭސް ނިންމީ 11.27 ސިކުންތުންނެވެ.
އިންޑިއަން އޯޝަން އައިލެންޑް ގޭމްސް އިން 2015 ވަނަ އަހަރު ރަން މެޑަލް ހޯދައި ބައިނަލްއަގްވާމީ މަލްޓި ގޭމްސްއަކުން ރާއްޖެ އަށް ރަން މެޑަލް ހޯދައިދިން ފުރަތަމަ އެތުލީޓުގެ ޝަރަފް ހޯދީ ސާއިދެވެ.
