ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް އެންމެ ފުރަތަމަ ރިޕޯޓް ކުރަން ފެށި ޗައިނާއާއި، މުޅި ދުނިޔެ ސިއްސުވާލި އަދަދުތަކުން ކޭސްތައް ރިޕޯޓް ކުރި އަވަށްޓެރި އިންޑިއާގައި އަނެއްކާވެސް، ކަންބޮޑުވާ ދަރަޖައަށް، މި ބަލީގެ ކޭސްތައް އިތުރު ވާން ފަށައިފިއެވެ.
ޗައިނާގެ ހާލަތަށް ބަލާއިރު ނާންޖިއާންގް ސިޓީއިން ފެނުނު ކޭސްތައް، 5 ޕްރޮވިންސެއްގެ އިތުރުން، ވެރިރަށް ބެއިޖީންގްއަށްވެސް ފެތުރިފައި ވާ ކަމަށް މައުލޫމާތު ލިބެއެވެ. ޗައިނާގެ ދައުލަތުގެ މީޑިއާއިން ސިފަކޮށްފައި ވާ ގޮތުގައި، މިއީ ކޭސްތައް އެންމެ ފުރަތަމަ ރިޕޯޓް ކުރި ވޫހާންގެ ކާރިސާއަށް ފަހު ޗައިނާއަށް ކުރިމަތިލާން ޖެހިފައިވާ އެންމެ ހައްސާސީ ވަގުތެވެ.
ޖުލައި 20 ވަނަ ދުވަހު، ނާންޖިއާންގެ އެއާޕޯޓުން ކޮވިޑް ކޭހެއް ފެނުނު ފަހުން، މިހާތަނަށް 200 އެއްހާ މީހުން ވަނީ ޕޮޒިޓިވްވެފައެވެ. މި އެއާޕޯޓުން ދަތުރު ކުރަން ތާވަލު ކޮށްފައި ވާ ހުރިހާ ފްލައިޓެއް، އޯގަސްޓް 11 ވަނަ ދުވަހުގެ ނިޔަލަށް ސަސްޕެންޑް ކޮށްފައި ވާ ކަމަށް މައުލޫމާތު ލިބެއެވެ.
ކަމާ ބެހޭ ފަރާތްތަކުން ފެއިލް ވެފައި ވާ ކަމަށް ބުނެ ގިނަ ބަޔަކު ފާޑު ކިޔަމުން ދާއިރު، ޗައިނާގެ އޮފިޝަލުން ވަނީ، ސިޓީ ފެންވަރުގައި ކޮވިޑަށް ޓެސްޓު ކުރުމުގެ މަސައްކަތް ފައްޓަވާފައެވެ. ނާންޖިއާންގެ 9.3 މިލިއަން މީހުންގެ އިތުރުން، މެހެމާނުންވެސް ކޮވިޑަށް ޓެސްޓު ކުރާނެ ކަމަށް މައުލޫމާތު ލިބެއެވެ.
މި ދަނޑިވަޅަކީ އިންޑިއާއިންވެސް ކޮވިޑް ކޭސް ރިޕޯޓް ކުރާ މިންވަރު އިތުރު ވަމުން އަންނަ ދަނޑިވަޅެއް ކަން ފާހަގަ ކުރަންޖެހެއެވެ. އެގޮތުން، ފާއިތުވީ 24 ގަޑިއިރުގެ ތެރޭގައި އިންޑިއާއިން 44230 މީހަކު ކޮވިޑަށް ޕޮޒިޓިވް ވެފައި ވާއިރު، މިއީ ފާއިތުވެ ދިޔަ 3 ހަފުތާއެއްހާ ދުވަހަށް ބަލާއިރު، އިންޑިއާއިން މިހާ މަތިން ކޭސް ރެކޯޑް ކުރި ފުރަތަމަ ދުވަހެވެ.
ފާއިތުވީ 24 ގަޑިއިރުގެ ތެރޭގައި، ކޮވިޑްގައި އިންޑިއާއިން 555 މީހެއްގެ ފުރާނަ ގެއްލިފައި ވާ ކަމަށްވެސް ހަބަރު ލިބެއެވެ. މިއާއެކު އިންޑިއާއިން މި ބަލީގައި މަރުވި މީހުންގެ އަދަދު ވަނީ 423217 އަށް އަރާފައެވެ.
ސިއްހީ ދާއިރާގެ ތަޖުރިބާކާރުން މިދިޔަ ޖޫން މަހު ވަނީ، މިއަހަރުގެ އޮކްޓޯބަރު މަހުގެ ތެރޭގައި، ކޮވިޑްގެ 3 ވަނަ ރާޅެއް އިންޑިއާއަށް ބިނދާލުން ގާތް ކަމުގެ އިންޒާރު ދެއްވާފައެވެ.
އިންޑިއާއިން ވަނީ ބައިނަލްއަގުވާމީ އުދުހުންތަކަށް އެ ގައުމުގެ ބޯޑަރު ހުޅުވާލަން ކަނޑައެޅި ތާރީހު، އަންނަ އޯގަސްޓް މަހުގެ 11 ވަނަ ދުވަހަށް ފަސްކޮށްފައެވެ. ކުރިން، ބޯޑަރު ހުޅުވާ ގޮތަށް އޮތީ ޖުލައި 31 ވަނަ ދުވަހުއެވެ. އޯގަސްޓް 11 ވަނަ ދުވަހުގެ ނިޔަލަށް ބޯޑަރު ހުޅުވުން ލަސް ކުރި ކަމުގައި ވީ ނަމަވެސް، ކަނޑައަޅާ ވަކި މަންޒިލްތަކާ ދެމެދު ދަތުރު ކުރެވޭނެ ކަމަށް، އިންޑިއާގެ ކަމާ ބެހޭ ފަރާތްތަކުން ވަނީ ހާމަކޮށްފައެވެ.
