ކުޑަކުދިން ލައްވާ އިމާމްވެ ނަމާދު ނުކުރުވުމަށް އިސްލާމިކް މިނިސްޓްރީ ދައްކާ ވާހަކައާ ކުރީގެ އިސްލާމިކް މިނިސްޓަރު އަދި ދިވެހިރާއްޖޭގެ އިސްލާމީ ޔުނިވާސިޓީގެ ކުރީގެ ޗާންސެލާ ޑރ. މުހައްމަދު ޝަހީމް އަލީ ސައީދުގެ ހިޔާލު ތަފާތު ވެއްޖެއެވެ.
ޝަހީމް މިފަދައިން ވިދާޅުވެފައި ވަނީ ރާއްޖޭގެ މިސްކިތްތަކުގައި ކުޑަކުދިން ލައްވާ އިމާމްވެ ނަމާދު ކުރުވާ މައްސަލަ ފެންމަތިވުމުމާ ގުޅިގެން އެކުދިން ލައްވާ އިމާމުވެ ނަމާދު ނުކުރުވުމަށް އިސްލާމިކް މިނިސްޓްރީ އިން މިސްކިތްތަކަށް އެންގުމާ ގުޅިގެންނެވެ.
ޝަހީމް ކުރެއްވި ޓްވީޓެއްގައި ވިދާޅުވީ ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13، 15 އަހަރު ކުދިން އިމާމުވެ ނަމާދު ކުރުމަކީ ދީނީ ގޮތުން މައްސަލައެއް އޮތް ކަމެއް ނޫން ކަމަށެވެ. ހާއްސަކޮށް ރީތިކޮށް ޤުރުއާން ކިޔަވާ، ގުރުއާން ހިތުދަސް ކުޑަކުދިންނަށް ފުރުސަތު އޮތުމަކީ ރަނގަޅު ކަމެއް ކަމަށް ދެކެވަޑައިގަންނަވާ ކަމަށް ވެސް ޝަހީމް ވިދާޅުވިއެވެ.
އޭގެ އިތުރުން ރަސްމީ އިމާމުންނަކީ ވަކި ފާހެއް އޮންނަން ޖެހޭ ބައެއް ނަމަވެސް ރީތިކޮށް ކިޔަވާ ގުރުއާން ހިތުދަސް ކުދިންނަށް ފުރުސަތު އެއްކޮށް ބަދަލުވެގެން ނުވާނެ ކަމަށް ޝަހީމް ވިދާޅުވިއެވެ. އަދި އިސްލާމީ އުސޫލަކީ ވެސް އެއީ ކަމަށް ޝަހީމް ފާހަގަކުރެއްވިއެވެ.
ނަމާދު ކުރަން މިސްކިތުުގެ ކުރީ ސަފުގައި ކުޑަކުއްޖެއް އިނަސް އެކުދިން ފަހަތު ސަފަށް ޖައްސާ ބޭރުކޮށްލުމަކީ ކޮށްގެންވާނެ ކަމެއް ނޫން ކަމަށާއި ކުރީ ސަފުގައި ޖާގަ ތަކަކީ އެތަނުގައި ކުރިން އިންނަ މީހެއްގެ ހައްގެއް ކަމަށް ޝަހީމް ވިދާޅުވިއެވެ. އަދި ކުޑަކުއްޖަކު ގޮސް ކުރިން އިށީނދެއްޖެނަމަ އެކުއްޖަކު ބޭރު ނުކުރެވޭނެ ކަމަށް ވެސް ޝަހީމް ވިދާޅުވިއެވެ. ހާއްސަކޮށް 7 އަހަރުގެ ކުދިން ބޭރު ނުކޮށްލެވޭނެ ކަމަށް ޝަހީމް ފާހަގަކުރެއްވިއެވެ.
ޝަހީމް ވިދާޅުވީ ކުޑަކުދިން މިސްކިތަށް ލޯބި ޖެއްސުމާ މިސްކިތުން އެކުދިން ބަލައިގަންނަކަން އެކުދިންނަށް އިހުސާސް ވާން ޖެހޭނެ ކަމަށެވެ. އަދި ސުންނަތަކީ ކުޑަކުދިންނަށް މިސްކިތުން ލޯތްބާއި އިހިތިރާމު ދިނުމާއި އެކުދިންނަކީ ޖަމާއަތުގެ ބައިވެރިން ކަމުގެ އިހުސާސް ވުން ކަމަށް ވެސް ޝަހީމް ވިދާޅުވިއެވެ.
ޜާއްޖޭގައި ވަރަށް ހުނަރުވެރި ކުދިން އެބަތިބި. އެކުދިންނަށް ފުރުސަތު ދިންވަރަކަށް ޖީލަށް ފައިދާ ކުރާނީ.