ހެންވޭރު އާޓިފިޝަލް ބީޗް ޕާކު ތެރޭގައި ދޫކޮށްލާފައި ތިބި ކުކުޅުތައް ބަޔަކު ހިފާ ކަތިލި މައްސަލަ ބޮޑުވެފައި ވަނިކޮށް އެ ކުކުޅުތައް ކަތިލީ ފުލުހުން ކަމަކަށް ނުބެލެވޭ ކަމަށް އެ މުއައްސަސާއިން ބުނެފިއެވެ.
ފުލުހުން ބުނީ ކުޑަ ހެންވޭރު ސަރަހައްދުގައި ދޫކޮށްލާފައި ތިބި ކުކުޅުތަކެއް ހިފައި ކަތިލާފައިވާ ކަމުގެ މައްސަލައެއް އިއްޔެ ގާތްގަނޑަކަށް ހެނދުނު 8:05 ހާއިރު ފުލުހުންނަށް ހުށައަޅާފައިވާ ކަމަށެވެ.
އެހެންނަމަވެސް މިހާތަނަށް ބެލިބެލިމުން ފުލުހުން އެކަމުގައި ބައިވެރިިވެފައިވާ ކަން އެނގިފައިނުވާ ކަމަށް އެ މުއައްސަސާއިން ވަނީ ބުނެފައެވެ. އެ މުއައްސަސާއިން އެހެން ބުނީ، އެ ކުކުޅުތައް ހިފާ ކަތިލީ ފުލުހުން ކަމަށް ބައެއް ފަރާތްތަކުން ވާހަކަ ދައްކާފައި ވާތީއެވެ.
އާޓިފިޝަލް ބީޗް ޕާކުތެރޭގައި ތިބި ކުކުޅުތައް:
މިދިޔަ އީދު ދުވަހު ފައިމަގުގައި އުޅެން މާލެ ސިޓީ ކައުންސިލުން ހަމަޖެއްސުމާއެކު މާލެ ތެރެ ފޮޓޯނަގަން އުޅުނު "ދަ ޕްރެސް" ގެ ޓީމަށް އެ ކުކުޅުތައް ފެނުނެވެ. އެ ކުކުޅުތައް ތިބީ އެމްޑީޕީ ހަރުގެއާ ދިމާވާނެހެން އާޓިފިޝަލް ބީޗްގައި މަގާ ވީ ފަރާތަށް ހުރި ގަސްތަކުގެ ތެރޭގައެވެ. "ދަ ޕްރެސް" ގެ ކެމެރާގެ ލެންސަށް ކުކުޅުތައް އެރުމާއެކު ފޮޓޯ ނަގަމުން ދިޔަ އިރު ފާހަގަ ވީ، ހަމަ ރަނގަޅަށްވެސް ކުކުޅު ގެންގުޅޭ ތަނެއްގެ ގޮތުގައެވެ. ހައެއްކަ ކުކުޅާއި ހާލާއި އެތާ ތިއްބެވެ.
ކުކުޅުތައް ގެއްލިގެން އެވާހަކަ ފެންމަތިވީ ޖެހިގެން އައި ދުވަހުއެވެ. އޭރު ފެނުނީ ކުކުޅުތައް ކަތިލާފައި ގާތަކުގެ މަތީގައި ލޭ ހޭކިފައި ހުރި ތަނެވެ.
ހިފިބައެއް، ކަތލި ބައެއް، ކޭ ބައެއް ސީސީޓީވީންވެސް ނުފެންނަ އިރު، މި މައްސަލައިގެ އިތުރު ތަފްސީލެއް އަދި މި މައްސަލާގައި އެއްވެސް މީހަކާ މެދު ފިޔަވަޅެއް އަޅާފައިވާ ކަމެއް އަދި ނާޅާ ކަމެއް ފުލުހުން ހާމައެއް ނުކުރެއެވެ.
އާޓިފިޝަލް ބީޗަށް ދޫކޮށްލާފައި ތިބި ކުކުޅުތަކެއް ކަަތިލިކަމަށް ބުނެ، މީސް މީޑިއާގައި ދަނީ ފޮޓޯއެއް ދައުރުވަމުންނެވެ. އެ ފޮޓޯ އާންމު ކުރި ފޭސްބުކު ޕޭޓްތަކުގައި ބުނެފައިވަނީ މިދިޔަ އަންގާރަ ދުވަހުގެ ރޭ ފުލުހުންގެ ޔުނީފޯމްގައި ތިބި ބަޔަކު އެތަނަށް ގޮސް އެ ސަރަހައްދުގައި ދޫކޮށްލާފައި ތިބި ކުކުޅުތައް ހިފާ ކަތިލީ ކަމަށެވެ.
ފުލުހުން ބުނީ ޔުނިފޯމްގައި ތިބި ބަޔަކު އެތާ ހުރި ސީސީޓީވީން ނުފެންނަ ކަމަށެވެ.
