ވެލާނާ އިންޓަނޭޝަނަލް އެއާޕޯޓަށް ފުރަންދިޔަ ޓޫރިސްޓެއްގެ ދަބަހުން ވަޒަންތަކެއް ފެނި، ހައްޔަރުކުރި މީހާގެ ބަންދަށް ތިން ދުވަސް ޖަހައިފިއެވެ.
ޓޫރިސްޓެއްގެ ދަބަހުން ވަޒަންތަކެއް ފެނިފައިވާ މައްސަލަ ހުށަހަޅާފައި ވަނީ މިމަހު 10 ވަނަ ދުވަހު ހެނދުނު 09:52 ހާއިރުއެވެ. އެމައްސަލާގައި ހައްޔަރުކުރީ އުމުރުން 60 އަހަރުގެ ފިރިހެނެއް ކަމަށާ އެއީ ނެމީބިއާގެ ރައްޔިތެއް ކަމަށް ފުލުހުން ބުނެއެވެ.
އެމީހާގެ ބަންދު އިތުރު ކުރަން އިއްޔެ ކޯޓަށް ގެންދިޔުމުން އޭނާގެ ބަންދަށް ތިން ދުވަސް ޖަހާފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ އެ މައްސަލަ އާ ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ.
އެކަމާ ގުޅޭ އިތުރު ތަފްސީލު ފުލުހުން ދީފައެއް ނުވެއެވެ.
މިދިޔަ މެއި މަހުގެ ހަ ވަނަ ދުވަހުގެ ރޭ، ރައްޔިތުންގެ މަޖިލިހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާ އާ ގުޅިގެން، މާލެ ސަރަހައްދުގެ ސެކުއިރިޓީ ވަރުގަދަކޮށްފައިވާ އިރު، އޭގެ ތެރޭގައި ވެލާނާ އިންޓަނޭޝަނަލް އެއާޕޯޓު ވެސް ހިމެނެއެވެ.
